ПОСТЫҢ ПАРЫСТАРЫН ӦСКІРЕР ПӦГІННЕҢ
16.06.2017
Хабарлар
Хакасияның Ӧӧркі Чӧп президиумы 14 июньда теестегі чыылиин иртірген. Комитеттернің паза комиссияларның устағҷылары пу чыылығда 10-ға чағын сурығ кӧрібіскеннер. Ӧӧн сурығларның пірсі ахчанаң палғалыстығ полған - 2017 чылға республика бюджедінзер алызығлар кирерінең.
Чыылығны Ӧӧркі Чӧп кнезі Владимир Штыгашев апарған. Республика бюджедінзер алызығлар федеральнай бюджеттең кірчеткен ахчаларны паза постың парыстарын ӧскірер кӧстегні санға алып кирілчелер тіп чарытхан Хакасияның финанстар министрі Ирина Войнова. Алызығлар хоостыра 2017 чылға республика бюджедінде постың парыстары 1 миллиард 764 миллион салковайға ӧскірілче.
- План аар, че ол федеральнай бюджеттең кредит аларына киректелчеткен оңдайларның пірсі полча, - таныхтаан финанстар министрі Ирина Войнова.
Постың парыстарының ӧӧн чардығын, 1 миллиард 411 миллион салковайны, Хакасия правительствозы организацияларның парыстарына налогтаң чыып аларға пӧгінче. Олаңай кізілернің парыстарына налогты 66,8 миллион салковайға кӧп чыып аларға пӧгін турча. Акцизтерӌе чыылчатхан налог 127,8 миллион салковайға кӧп арах полар тіп сахталча.
Чир алтындағы ис-пайны аныпчатхан ӱчӱн налог ахчазын 72,1 миллион салковайға кӧп чыып аларға кӧстег турча. Ідӧк ибіркі чир-чайаанға ӱрег ӱчӱн тӧлегні 28,4 миллион салковайға кӧп чыып алары кӧрілче.
Федеральнай бюджеттең пирілчеткен ахчаның тиксі сині 122 миллион салковайға тиңнелче. Ол ахчаның ӧӧн чардығы, 119 миллион салковай, чолларны тыхтирына парар. 928 муң салковай Социализм Істенізі Матырларына, Россия Федерациязының Істеніс Матырларына паза Істеніс Славазы орденнің толдыра кавалерлеріне социальнай хабазығ пиреріне ызылча. Ідӧк 528 муң салковай «Россияның Аарластығ доноры» кӧксіне хазанӌаң танығнаң сыйыхтатханнарға чылда пір хати пирілчеткен тӧлег идеріне парар. Халған ахчазы аймах-пасха кӧстеглерге позыдылча.
Ӧӧркі Чӧп кнезі Владимир Штыгашев финанстар министріне отпуск ахчазы хайди тӧлелерінеңер сурығ пирген. Ӧӧнінде чоох ӱгретчілердеңер парған, оларның отпуск тузы чағдап килген нооза. Финанстар министрі Ирина Войнова отпуск ахчазын тӧлирінӌе сидіксіністер чох полар тіп ізендірген. Ӱгретчілерге отпуск ахчазы тудығ чох тӧлелер тіп кӧрілче. Ағаа хоза министр Пенсия фонды алнында полған ӧдістер прай чабылчатханынаңар паза учреждениелерні тударына пӱӱлгі хорадығлар 200 миллион салковайға ӧскірілчеткенінеңер искір пирген.
Ӧӧркі Чӧп кнезінің орынӌызы, бюджетче комитеттің кнезі Сергей Комаров бюджеттің постың парыстарын ӧскірерінӌе тоғыста оларның комитеді араласханын таныхтаан. Аның кӧрізінең, республиканың мынӌа кӧп арах налог ахчазын чыып алӌаң оңдайы пар. Ӧӧркі Чӧп президиумы республиканың 2017 чылға бюджедінзер алызығлар кирӌең закон проектін чағынғы сессияның ӱзӱриине сығарарға чарат салған. Сессия 28 июньда иртер тіп кӧрілче.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде