МЕТАЛЛУРГТАРНЫ ЧЫЛЫҒ АЛҒЫСТАДЫЛАР
20 ИЮНЬНАҢ 18 ИЮЛЬҒА ТЕЕРЕ РУСАЛ КОМПАНИЯ 15 ЧЫЛ ТОЛЧАТХАНЫНА ЧАРЫДЫЛҒАН КУЛЬТУРА ПАЗА СПОРТ ОЙЫННАРЫН ИРТІРДІ. ІДӦК ПӰӰЛ САЯНОГОРСКТАҒЫ АЛЮМИНИЙ ЗАВОДЫНА 30 ЧЫЛ ТОЛЧА.
САЯНОГОРСКТА АЛЮМИНИЙ ПАЗА ЧАҶЫН САМОЛЕТИКТЕРНІ ПОЗЫДАРЫНҶА ПАСТАҒЫ ЧЕМПИОНАТ ИРТКЕН. КИНОРЕЖИССЕР АНДРЕЙ ЗВЯГИНЦЕВНЕҢ ТОҒАЗЫҒ ПОЛҒАН. РУСАЛ-ның ТОҒЫНҶЫЛАРЫ СПОРТ МЕРОПРИЯТИЕЛЕРІНДЕ АРАЛАСХАННАР, «ВИЗИТ» КУЛЬТУРА ТУРАЗЫНДА ИРТІРІЛГЕН ИИРЛЕРГЕ ЧӦРГЕННЕР. «АЛЮМИНИЙ РАЛЛИЗІ» ХЫНЫҒ МАРЫҒ ПОЛҒАН.
РУСАЛ-ның чииттері Саяногорсктағы «Колорит» хоосчылар школазы алнындағы ачыхта ойыннар иртіргеннер, кӧглер, теелбектер толдырғаннар. Олғаннар пу ойыннарда хынып араласханнар.
Саяногорсктағы чир-суғ ӱгренҷең музейде «Пір сомның тархыны» сомнар кӧзідии 1 июльдаң тоғынча. Сомнар хоостыра САЗ-тың тархынынаңар паза тилізінеңер піліп аларға чарир. Экскурсиялар иртірчеткен Алексей Перевойкин Саяногорсктағы алюминий заводынаңар чоохтап пирген.
САЗ-тың тархыны 1974 чылдаң пасталча. СССР-ның министрлер чӧбі алюминий заводын пӱдірердеңер чарадығ алыбысхан. Че 1982 чылда ла корпустар пӱдірии пасталған. Пӱдіріг табырах парған, 21 апрельде 1985 чылда завод пастағы алюминий сығарыбысхан.
1994 чылдаң пасти заводтың ӧӧн директоры Олег Дерипаска полыбысхан. 2000 чылда Россиядағы улуғ алюминий заводтары пірікчелер, аны хоостыра «Русский алюминий» компания тӧстелген. Хакас алюминий заводы 2006 чылда пӱдірілген, чылда 297 муң тонна алюминий сығарча. Амды суткада 800 тонна металлны пирче. Заводта 430 кізі тоғынча.
САЯНАЛ компания алюминий фольгазын сығарча. Заводтарның алюминий сығарызы чахсы парча.
Хакасияның пазы Виктор Зимин Металлургтар кӱніне паза Саяногорсктағы алюминий заводының пайрамнығ чылына чарыдылған мероприятиеде араласхан.
- Пӱӱнгі кӱнде САЗ, САЯНАЛ, Хакас алюминий заводы РУСАЛ-ның иң чахсы заводтары полчалар, - таныхтаан В.М.Зимин. - Специалисттер, инженерлер устағҷы Олег Дерипасканаң хада кӧп чыллар тобыра істенчелер. Экономикаа сидік туста компания тиліпчеткені уғаа чахсы.
(В.М. Зимин Виктор Покатиловха аарластығ пiчiк читiрче)
Алюминий киреенде істенген ветераннарға алынҷа чылығ сӧстер читірілген. Олар чиит тӧлні ӱгретчелер нооза. Ӧңніг металлургия предприятиезі налог тӧлирінҷе улуғ компания полча. РУСАЛ кӧп чыллар изере халыхтар чуртазында ӧткін араласча. Апрельде, ӧрт полып, ӱреге кіргеннерге пастағыларның санында полызығ пирген. 23 миллион салковай чыып алғаннар, 100 азыра машина гуманитарнай полызығ пиргеннер.
Хакасияның пазы Виктор Зимин «Визит» культура туразында чахсы тоғынчатханнарға Правительствоның Аарластығ пічіктерін читірген. Анаң ӱлӱкӱнге чарыдылған концерт полған.
Саяногорскта ӧӧн орамада - Ленин проспектінде - чон кӱнзіре аар-пеер пазыс чӧрген. Садығҷылар, тізең, аймах ниме-ноолар сат турғаннар: хоостар, ойнаҷахтар, ас-тамах, сувенирлер... Оларның аразында кізі сырайына алай холларына сіліг хоостар салчатхан абахайлар кӧп полғаннар. Олғаннар сырайларында хоостаттырып аларға хынғаннар. Сістеен ит садии чахсы парған. Узбек чон улуғ хазаннарға толдыра плов тимнеп салтыр.
Алты частаң администрация алнындағы сценада ойын парған. Саяногорсктағы ӱбӱрҷең оркестр паза Россияның саблығ «Мираж» ӧмезі ойын турғысханнар. Оларны кӧрерге ӧӧнінде улуғ частығ улус килген.
Тынаға сых парған Владимир Иванович Ағбан пилтірі аймаандағы Московскай аалда чуртапча. Ол Саяногорскта чурттығ оолғынзар ааллап килтір.
- Мин ӱсче хати Металлург кӱнін таныхтапчатханнарын кӧргем, - чоохтаан Владимир Иванович. - Че пу - минің ӱлӱкӱнім нимес, мин ӱгретчібін нооза. Ирткен чылда стадионда полған концертке чӧргем. Кӧглер кӧңніме пір дее кірбееннер. Ойынны читіре кӧрбин, чӧрібіскем. Мин кӧгнең айғасчатхан кізібін, хай пірее «попса» кӧглерін оңнап полбинчам. Алай иргі кӧрістіг кізібін, таң. Ам мында «Мираж» ӧме чон алнынзар сығар. Оларны кӧріп аларға ӧнетін килгем.
Саяногорсктағы «Строитель» стадионзар чон тығырама чыылысхан. Читі час иирде ойын пасталған. Сценадаң алғыстас сӧстері кӧп истілген. Тигірзер шарлар позыдылған. Ӧңніг чаҷыннаң фейерверктер атыла тӱскеннер. РУСАЛ компанияның устағҷыларының пірсі Антон Савченко чоох тутхан: «Изеннер, Саяногорсктың чуртағҷылары паза аарлығ аалҷылар! Прай ӧменің адынаң сірерні пу ӱлӱкӱннең алғыстапчам. Хазых, часкалығ полыңар. Сӧбіреңер пик ползын!»
Саяногорск городтың устағҷызы Леонид Быков чыылған чонны алғыстаан. Ідӧк Хакасия пазының пастағы орынҷызы Олег Нам чон алнынзар сыххан. Ол Хакасия пазының адынаң чонны алғыстаан.
Ойынны хынығ апарған Москвадаң килген Александр Пушной. Сценазар сығып, металлургтарны алғыстаан. Анаң «Голос» телепроекттің араласчызы Ксана Сергиенко кӧглер толдырған. Чыылған чонның кӧңнін кӧдіріп алар ӱчӱн матап сіренген. Чииттер теелбек салғаннар. Ксана кӧг аразында, ізіге сыдаспин, пазынзар пір бутылка суғ урыбысхан. Сцена ӧл пол парғанда, швабралығ ипчі, чӱгӱр киліп, сценаны чысхлап сыххан. Александр Пушной, позы швабраа чапсынып, чысхлап чӧре халған. Чон, аны кӧре, хатхырған.
Ырҷы Глюкоза пістің чир хайхастығ тіп таныхтаан. Мында ӱр арах полып аларың килче теен ол. Хакасияның металлургтарын ол ікінҷізін алғыстапча. Мының алнында Саяногорскта ол полтырох.
Ксана Сергиенко Хакасияда пастағызын на полды. Уғаа чахсы чир теен ол. Ксана рок кӧглерінең палғалыстығ «попса» сарыннарын толдырча. Ікі электрогитара паза барабаннар ойнапчалар. Гитаристтернің пастары хайди «ӱзіл парбинчатханы» таңнастығ полған. Анда ла пастарын икіп, састары ла чайыл турған.
«Мумий Тролль» группа кӧглерін толдырған. Улуғ концерт соонаң тигірзер фейерверк позыдылған.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |