ДАЧА АМНИСТИЯЗЫ ХООСТЫРА АЛЫЗЫҒЛАР
08.08.2017
Хабарлар
Прокуратура искірии
Тибіреділбинчеткен хай пірее ис-пайның пічіктерін оой тимнир оңдайларны піс «дача амнистиязы» тп адирға кӧнік парғабыс. Ол правонаң он чыл азыра тузалан таа паризабыс, пӱӱнгі дее кӱнде пілдізі чох сурығлар сығыс ла килче. Ағаа хоза, пічіктерні тимнир оңдайларзар алызығлар киріл парған.
Амды тибіреділбинчеткен хай пірее ис-пайға пічіктер хайди тимнирдеңер чоохтап пирербіс.
Чир участогы Россия Федерациязының Чир кодексі тоғынып пастир алнында (30.10.200l чылға теере) холға кирілген полза, ағаа дача амнистиязы теелче. Пічікте чир участогы хайдағ право хоостыра пирілгені кӧзіділбеен полза алай ол улуғлардаң халған ис-пай полза, алай тӧреміл тузаланысха пирілген полза, андада аны посха пастыр саларға чарир. Пос хониинаң айғазарға кӧріл парған чир участогына пічіктер чох полза, чир участогын посха пастыртарға похозяйственнай книгадаң выписка алып аларға чарир. Выписка аал чӧбінде пирілче.
Алынҷа чуртаҷаң тураларға (ИЖС) дача амнистиязы 2018 чылның 1 мартында тоозылча. Ол кӱнге теере, чуртты посха пастырар ӱчӱн, чарадығ аларға кирек чоғыл. Че хайығ саларға кирек, чурт пӱдіреріне чарадығ, техническай план тимнепчетсе, хайди даа киректелче. Алынҷа чуртаҷаң тура ӱс хадыллығ турадаң пӧзік полбасха кирек. Анда пір ле сӧбіре чуртапча. Ікі квартиралығ тураларға дача амнистиязы теелбинче. Россия Федерациязының Градостроительнай кодексі хоостыра, кӧп квартиралығ тураларны пӱдірерге паза оларнаң тузаланарға чарадығ аларға киректелче.
Пӱӱл дачадағы тураларға, гаражтарға паза служебнай пӱдіріглерге пічіктер тимнирге сала сидік пол парған. Пастап чир участогының ээзі тибіреділбинчеткен ис-пайдаңар декларацияны, позы тимнеп алып, айланыс пічиинең хада хазна регистрациязына пирібісчең. Амды ағаа декларация орнына техническай план кӧзідерге кирек. Техническай планны, объектті синеп алып, кадастр инженері тимнепче. Андада тибіреділбинчеткен ис-пайдаңар танығлар реестрзер алҷаас чох кирілчелер, кадастр паа даа орта саналча. Паза хонҷыхтарнаң чир ӱчӱн хырызарға кирек чоғыл.
Удаа сурығ турыбысча: садтардағы паза дачалардағы участоктарда чуртаҷаң тура алай чуртирға чарапчатхан пӱдіріг турарға кирек пе?
Закон хоостыра, садтардағы чир участоктарда чуртирға ла чарапчатхан пӱдіріг турарға кирек, дачадағы чир участокта - чуртаҷаң тура алай чуртирға чарапчатхан пӱдіріг.
Андағ оңдайнаң, дача амнистиязы хоостыра тибіреділбинчеткен ис-пайны, асхынах пічік тимнеп, посха пастырып аларға чарир.
Айланыс пічиин прай киректелчеткен документтернең хада почтаҷа даа ызарға чарир. Пічіктерні почтаҷа ысчатса, айланыс пічиинде ээзінің хол салғаны нотариус пастыра киречілелік поларға кирек.
Автор :
Лехте НАУМОВА, «ФКП Росреестра» ФГБУ-ның Хакасияҷа филиалының ӧӧн технологы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде