ПІСТІҢ ТЕАТРЛАР НАА ОЙЫННАРЫНАҢ ӦРІНДІРГЕННЕР
09.08.2017
Хабарлар
Ағбанда ирткен «Чир Чайаан» чоннар аразындағы кӧклӧлер театрларының IX фестивальы кӧп ӧрініс ағылған. Ол Хакасияның чуртағҷыларына наа ойыннар кӧріп аларға, аймах театрларның чайаачызынаң танызып аларға оңдай пирген.
НАА СПЕКТАКЛЬЛАР
Пу материалымда пістің театрлардаңар чоох апарарға сағынчам. «Чир Чайаанда» олар ӧткін араласханнар. Орыс драма театры М.Лермонтовтың «Садығҷы Калашниковтаңар ыр» поэмазы хоостыра чайалған ойынны кӧзіткен. «Читіген» театр фестивальға «Соох чир» спектакльны таллап алған. «Нымах» паза Хакас драма театры наа ойыннарнаң ӧріндіргеннер.
Мында иң пурун «Нымахты» таныхтирға кирек. Пу чайаачы сезонда театрның ӧмезі тӧрт ойын турғызарға маңнанған. Кӱскӱзін «Правитель и шут» спектакльның премьеразы ирткен, декабрьда - «Хайхастығ хараа, алай Хаҷан ойнаҷахтар тірілчелер», мартта артисттер «Малыш и Карлсон» ойынны кӧзіткеннер, июльда, тізең, «Мария Стюарт» спектакльның премьеразы ирткен. Аны Санкт-Петербургтағы чиит режиссёр Чакчи Фросноккерс (сын ады Дмитрий Петров) чайаан. Фридрих Шиллернің трагедиязын режиссёрлар турғызарға хынадырлар, че пастағызын на хайран Мария Стюарттың ӱлӱзі кӧклӧ театрында кӧзіділген. Итсе, прай рольларны артисттер толдырчалар. Че аймах оңдайнаң иділген кӧклӧлер полбаан полза, спектакль кӧрігҷілерні іди хайхатпасчых. Олар полған на матырның хылиин кӧзідерге полысчалар. Кӧклӧлерні Санкт-Петербургтағы хоосчы Ульяна Елизарова иткен. Ідӧк ол сценаны чазаан. Театрның улуғ нимес сценазы харибге, ӧргедегі аймах пӧліктерге айлан парчатханын кӧрерге чапсых полған. Чайаачы ус режиссер Чакчи Фросноккерснең хада илееде ойын турғызыбысхан. Алынҷа композитор Полина Найденцеваны таныхтирға кирек. Ол пасхан музыкаа спектакльға килген чон аптаттырған.
Ойынны тиксі алза, минің кӧрізімнең, мында ипчі кізінің ӱлӱзі чахсы кӧзіділ парған. Королеваларға даа хыныс паза часка кирек. Олох туста ӱлгӱ ол сидік паза хорғыстығ ниме. Аның ӱчӱн I Елизавета Тюдор Шотландияның королевазы Мария Стюарттың пазын ӱзе сабызарға чахығ пирче. Спектакльның халғанҷызында пілбинчезің кемге айирға: таң ах чарыхтаң піди парыбысхан Марияа, таң улуғ чазых ит салған Елизаветаа. Пу ойын тузында кӧрігҷілернің харах частары матап аххан.
Хакас драма театрының наа ойыны «Чил хайы» адалча. Аны театрның ӧӧн режиссёры Баатр Колаев чайаан. «Орфей паза Эвридика» спектакль пурунғы гректернің саблығ кип-чооғы хоостыра турғызылған. Ӧӧн матыр Улан, ӱреен хызын пу чирзер айландырарға пӧгініп, Ирлік ханзар айланча. «Чилнің хайы» - сӧстер чох спектакль. Чиит артисттер пу кип-чоохты кӧрігҷілерге теелбектер полызиинаң чоохтап пиргеннер. Ойынның ӧӧн сағызын читірерге Татьяна Шалгинованың хайхастығ кӧӧ полысча. Сизінгенде, пір час артиинаң парчатхан спектакль чииттернің кӧңніне кірген.
Орыс драма театрының ӧмезі фестивальға «Садығҷы Калашниковтаңар ыр» ойынны таллап алған. «Чир Чайаан» - эколого-этническай фестиваль, аннаңар артисттер орыс чонның культуразын, кибірлерін пу ойын пастыра кӧзідерге сағынғаннар. Олох пӧгіннең араласчыларның кӧбізі фестивальға орыс нымахтарын ағылған. Кӧзідімге, Кемеров облазының кӧклӧ театры «Крошечка-Хаврошечка» спектакльны кӧзіткен, Озёрсктағы артисттер - «Кӧйтік тӱлгӱҷектеңер нымах» ойынны. Голландиядағы ӧменің дее «Ах ханаттар» ойыны Кидеркі Европаның культуразына тӧстеніп чайалған.
«Читіген» театрның ӧмезі пасха чол таллап алған. Кӧрігҷілерні паза критиктерні хакастарның кибір-чозахтарынаң таныстырар орнына саблығ ӧме «Соох чир» драманаң чоннар аразындағы хайызығларға хайығ айландырған. «Соох чирнің» премьеразы пылтыр декабрьда ирткен. Амғы драматургияа критиктернің кӧбізі тың на хынминча, че мындағ ойыннар кӧрігҷілерге кирек. Олар кізілерге пӱӱнгі чуртастың сурығларына нандырарға, удур-тӧдір пілізерге полысчалар.
ТЕАТР ЛАБОРАТОРИЯЗЫ
Хакасияның театрларына «Чир Чайаан» фестивальда лабораториялар ирткеннер. Нинҷе-де кӱн аразына ӧнетін хығыртылған режиссёрларға пістің артисттернең хада наа ойыннарның эскизтерін тимнеп саларға кирек полған. Оңдай полза, оларның иң артыхтарын театрларда турғызарлар.
«Соох чир» спектакльны чайаан Тимур Кулов Хакас драма театрының ӧмезінең хада писатель Сергей Довлатовтың «Харибдегі хадағҷының пічіктері» тоғызы хоостыра ойын турғызарға чаратхан. Эскизте Виктор Коков, Арлекин Толмачёв, Сергей Доможаков, Нонна Галецкая паза Алексей Чаптыков араласханнар. Баатр Колаев Орыс драма театрынаң тоғынған. Ол Софоклның «Антигона» трагедиязын тимнеен. Критик Александр Вислов, пу эскизті кӧріп, ӧӧн рольларны толдырчатхан Валентина Прокопенконың паза Александр Израэльсоның тоғызын пӧзік паалаан. «Читіген» театрның артисттері, хығырған режиссёр фестивальға кил полбаан сылтаанда, лабораторияда араласпин халғаннар.
Чоохтирға кирек, Хакасияның драма театрларына лабораториялар тӧреміл иртірілчетселер, «Нымахтың» артисттері оларның тоғызынаң пастағызын на танысханнар. Пис хати «Алтын маска» сыйыхха турысхан ӧменең хада тӧрт режиссёр тоғынған. Полған на чайаачы устың позының кӧрізі. Санкт-Петербургтағы режиссёр Александр Стависский, «Евгений Онегин» романның V чардығына тӧстеніп, эскиз турғысхан. Пу чардыхта Татьянаның тӱзінеңер чоох парча. Артисттер, кибелістерні ӧменең хығырып, Александр Пушкиннің саблығ романының сілиин, пайын чалтырама кӧзіт пиргеннер. Александр Хромов ідӧк Санкт-Петербургта чуртапча, ол «Минің пабам-хус» спектакльның эскизін чайаан. Ойын кӧрігҷілерні сағынған сағыстарны толдырарға ӱгретче. Чакчи Фросноккерс артист Элла Девишеванаң хада «Пу сууласта прай ниме полған» эскиз тимнебіскен. Чарым час аразына сценаның узы олған тузынаңар чоохтап пирген. Элла
Девишева Узбекистанда тӧреен. Совет тузындағы Ташкенттеңер піліп аларға чапсых полған. Ағаа хоза, ӧӧн матыр гранатты орта арығлирға, ол фрукттаң сӱзӱн тимнирге ӱгреткен, анаң кӧрігҷілерге аны читірген. Мындағ ойыннарны критиктер «татхыннығ спектакльлар» адапчаттырлар. Халғанҷы эскиз перфоманс полған, ол Москвадағы режиссёр Владислав Костиннің устаанынаң ирткен. Пу эскизте артисттернең хада кӧрігҷілер араласханнар.
Тиксі алза, лабораториялар тузында алты театр эскизі кӧзіділген, оларның піреезі чағдапчатхан чайаачы сезонда Хакасияның театрларында хайди даа турғызылары ікінҷілес чоғыл.
«Чир Чайаан» чоннар аразындағы кӧклӧлер театрларының IX фестивальы кӧрігҷілерні чапсых спектакльларнаң хайхатхан, сағысха тӱзірген. Аның тузында премьералар ирткеннер, театр лабораториялары тоғынғаннар. Хакасияның чуртағҷыларының сағызында ол саңайға халар, че ікі чыл пазынаң кӧклӧлер театрларының X фестивальы полар. Піс аны чидікпин сағыпчабыс.
Автор :
Майя КИЛЬЧИЧАКОВА Сомнар Максим АХПАШЕВТИ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде