ЧИР-ЧАЙААНЗАР ПОЗЫДЫЛҒАННАР
22.08.2017
Хабарлар
Ағбандағы зоопарктаң 18 августта чир-чайаанзар ікі пулан позыдылған. Пу кирек Ағбандағы зоопарктың 45 чылына чарыдылған. Хакасияның пазы Виктор Зимин аңнарны позыдарында араласхан.
- Тіріг чир-чайаан кінінің тоғынҷылары паза нинҷе-де чыл мының алнында зоопарксар полызығ кирексіпчеткен аңнарны пирген республика чуртағҷылары чахсы кирек иткеннер. Олар Хакасияның аң-хустарын хайраллирына хозым иткеннер. Республикаа мындағ чахсы сыйых пирген ӱчӱн Тіріг чир-чайаан кініне алғыс, - таныхтаан Хакасияның пазы Виктор Зимин.
Хакасияның чир-чайаан ис-пайы паза экология министерствозының специалисттерінің чооғынаң, пуланнар чир-чайаанда пос алынҷа чуртирға ӧнетін ӱгреділгеннер.
Ӱс чыл мының алнында кізілер арығда кічіг пуланнар таап алып, Ағбандағы зоопарксар пирібіскеннер. Зоопаркта ӱс чыл аразына чахсы ӧс парғаннар.
- Аңнарны алынҷа хайраллалчатхан чирзер позытчабыс - «Кискачинский» заказниксер, хайда браконьерлер оларға хорғыс ағылбастар, - теен Ағбандағы зоопарктың директоры Геннадий Лагутко.
«Кискачинский» хазна чир-чайаан заказнигі 2010 чылда туйғахтығ паза арам учурапчатхан аңнарны хайраллир ӱчӱн тӧстелген. Ол Ағбан пилтірі аймаанда Пӱӱр пилтірі аалдаң ырах нимес орныхча.
Автор :
Александра ШЛЫК
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде