ЧАЛПАН ТАҒ ХЫРИ АРЫҒЛАЛДЫ
22.08.2017
Хабарлар
Шира аймаанда Тиксі Россиядағы «360 минута» экомарафон хоостыра экология акциязы ирткен. Орындағы волонтерлар, Чалпан тағның хыриндағы сӧп-саптарны чыып, хайаларны сырнаң пазылған пічіктердең арығланнар. Аны аймахтағы культура, чииттер политиказы, спорт паза туризм управлениезі иртірген.
Иртен иртӧк Ширадағы Культура туразы хыринаң автобус Пілӧ кӧл саринзар чол тутхан. Ол кӱн аалдағы чииттер чир-чайаанға чарыдылған акцияны иртірерге тимненгеннер.
Чайғыда Шира аймаанзар ибіркі хонҷых чирлердең чон кӧп килче. Олар кӧлліг чирлерде тохтапчалар. Анда палаткаларын турғысчалар алай турбазаларда, тохтап, чуртапчалар. Кӱнӧрте суға соомчалар. Піреелері, идер ниме таппин, тағларзар сығып, андартын ибіре харахсынчалар. Хомай сағыстығлар, постарының мында полғаннарын прай чонға кӧзідер ӱчӱн, тастарда паза хайаларда аттарын алай чуртап турған городтарын сырнаң пас салчалар. Олар пеер пазох килерлерін сағынминчалар паза ибіркі чирлерге улуғ ӱрег итчеткеннерін пілінминчелер.
Андағларның соонаң пістің чиит хыс-ооллар хайаларны сырнаң пазылған пічіктердең арығланнар. Волонтерларны андар Шира аймааның культура, чииттер политиказы, спорт паза туризм управлениезінің специализі Светлана Барахоева апарған. Хайаларны арығлаан соонда чииттер, кӧл ибіре тасталған сӧп-саптарны хаптарға чыып, кӧлнің чарларын арығлааннар. Пу тоғысты идерге олар ӱс группаа чарылғаннар. Ол кӱн илееде тоғыс иділ парған. Пос чирінің улуғ нимес тее чардығын арығлаанда, оол-хыстарның постарының даа кӧңнілері чарых полған. Олар улуғ нимес тоғыстарының тузазын сынап кӧрділер.
Автор :
Надежда СОЛОМАЧЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде