СИБІҶІН СӦӦГІНІҢ ТОЛМАШОВТАРЫ ТОҒАСХАННАР
23.08.2017
Хабарлар
Орғах айының 19 кӱнінде Толмашовтар тӧреен чирінде, Чоғархы Асхыс аалда, чыылызып, улуғ той-пай иттілер. Сибіҷін сӧӧкке кірчеткен туған-чағыннар ӱр тус чыылыспаан полғаннар. Халғанҷы чыылығдаң онҷа чыл ирт парған осхас. Аннаңар Толмашовтарның пу род чыылии, удур-тӧдір сағыныс парғаннардаңар, улам чапсых паза хынығ ирткен.
Тоғазығ аалның Культура туразында иртенӧк пасталған. Килген чонны мындох санға ал турғаннар, салтарында 180 артиинаң кізі чыылысхан тіп кем-де искірген. Пу тоғазыға Толмашовтар хайдаң на килбиндірлер - Камчаткадаң, Новосибирсктең, Хызылчардаң паза пасха даа чирлердең. Украинада даа Толмашовтарның тӧлі пар полтыр, че олар кил полбааннар. Интернет парда, аны пастыра прай Толмашовтарға чолабит ыстырлар. Андағ чылығ алғыстасты ӱр чыллар Киевтегі милицияда тоғынған Дмитрий (хакас ады - Мадрук) Михайлович Толмашовтың хызы сӧбірезінең хада ыстыр.
Тоғазығның пайрамнығ чардығын пістің чонға чахсы таныс ырҷы Игорь Толмашов паза Жанна Дектярова (Толмашова) апарғаннар. Пастап, чыылығны азып, Толмашовтар родының улуғларының пірсі Владимир Алексеевич Толмашов чоох тутхан. Ол чыылысхан Толмашовтарны родтың тархынынаң таныстырған. Суғ харғалары родының Сибіҷін сӧӧгіне кірчеткен Толмашовтарның ӧбекелері пурунғыда Мрассу суғ хазында чуртаптырлар, оларның ызых Падың тағ полтыр. Анаң Тохпағас теен кізі Асхыс суғ хазынзар кӧстір, аның ӱс оол полтыр: Чочый, Идем паза Чудон. Чочыйдаң Чочиевтер сыхтыр, Идемнең - Идимешевтер, Чудоннаң - Толмашовтар.
Таныхтирға кирек, Толмашовтарның род ағазы тимнел парғанох. Хаҷан-да аны родыбыстың аарластығ кізізі, журналист Алексей Егорович Толмашов, улуғлардаң искіріглерні чыып, тимнеп салған. Аннаңар амды килгеннер постарын паза родты узаратчатхан палаларын ол ағассар хоза пазып турғаннар.
Хайдағ пайрам сыйыхтар чох, аннаңар пу даа хати иң турыстығларны, аймах-пасха сфераларда пӧзік чидіглерге чидіп, Толмашовтарны сабландырчатханнарны улуғ нимес, че чапсых сыйыхтарнаң таныхтааннар. Андағох сыйыхтарға кӧп палалығ сӧбірелер паза чахсы ӱгренчеткен чииттер турысханнар. Кӧп палалығларға ідӧк школаа тимненерге полыс пирер пӧгіннең канцелярия сыйлалған.
Чыылысхан чонға родтың улуғлары, алғыстап, алғас сӧстерін читіргеннер. Аразында чапсых концерт номерлері кӧзіділ турған.
Ӧӧн кӧгҷілер родыбысты сабландырчатхан Сергей Толмашов паза Игорь Толмашов полғаннар. Че улуғ частығлар даа, чииттер дее оортах тур халбааннар, кем-де тахпахтап пирген, кем-де кӧг тириинең ойнап пирген. Іди тоғазығның пайрамнығ чардығы уғаа чапсых паза хынығ ирт парыбысхан, клуб істінде хатхы-кӱлкі паза айа сабызы ла истіл турған.
Анаң Толмашовтар чоны, машиналарына одырып, Асхыс суғның озархы саринзар, хайда пурунғыларыбыстың ааллары (Калпак аалы, Сандыр аалы) орныххан, пайрамны узарадарға тибіреен. Анда ӱлӱкӱнге азынада тимненіс парған - хазаннарға толдыра ит хайнап турған, пай стол салылған. Наңмырдаң чазынарға хакас ибі осхас улуғ шатер турғызылған паза тенттер тартылған. Итсе, тӱрчедең наңмыр даа тохтап парған.
Прай чон тимнелген орынзар читкенде, родтың пазына наа табылған Юрий Алексеевич Толмашов, ирбен отты хамызып, кибір иртірген, Ӧӧркі чайааннардаң родыбысха кӱс пирерге сурынған.
Іди ӱлӱкӱннің ікінҷі чардығы пасталған, ӱр кӧріспеен туған-чағыннар, чоох алызып, ирткен тусты сағысха киргеннер. Хатхы-кӱлкіде аймах ойыннар ирткен, ол санда спорт кӧрімнерінҷе. Кӱн, пілдіртпин дее, табырах ирт парыбысхан, анымҷохтазарға тус читкен. Толмашовтар, род чыылии чахсы ирт парғанына чӧпсініп, удаа арах тоғазарға чӧптерін искіргеннер. Род чӧбінің чыылиинда ӱс чыл пазынаң тоғас турарға чарадығ алылған, андох кирек полза, чуртастың сидік оңдайларына кір парған туғаннарға ахча чыыбыс турарға чӧптес салғаннар. Анзы орта, удур-тӧдір полызызып, пір чӧптіг чуртирға кирек, андада родыбыс улам кӧдірілер паза сабланар.
Автор :
Апьберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде