ИҢ ЧАХСЫ ӰГРЕТЧІЛЕР СЫЙЫХХА ТУРЫСХАННАР
23.08.2017
Хабарлар
Алла СТОЯКИНА «Хакасияның саблығ ӱгретчізі» атха турысхан
Ӱгредіг чылы пасталар алнында, Хакасияда иң чахсы ӱгретчілерні таныхтапчалар. Киҷее республиканың правительство туразында Хакасия пазының орынҷызы Олег Нам ӱгредіг киреенде чалтырама чидіглерге читкен ӱгретчілерге «Хакасияның істеніс сабланызы» медаль читірген паза «Хакасияның саблығ ӱгретчізі» атха турысхан ӱгретчілерні алғыстаан.
Хайди чооғында таныхтаан Олег Валерьевич, Хакасияда ӱгредігнің тилізіне улуғ хайығ салылча. Чыл сай республикада наа школалар, олған садтары пӱдірілче паза нааҷылалча. Пӱӱл Ӱӱс паза Индіркі Сир аалларда школалар пӱдірии пасталды, тӱрчедең олар тоғынып пастирға киректер. Ідӧк часхызын Ағбанда наа школа пӱдірии пасталған.
- Хакасия пазы Виктор Зимин ӱгредігнің тилізін сыбыра хайығда тутча. Тиктең нимес ол килчеткен чылны Хакасияда ӱгредіг чылы тіп чарлабысхан, - чооғында таныхтаан Олег Нам.
Ағбандағы 25 № школаның директоры Нина Богинская «Хакасияның істеніс сабланызы» медальнаң таныхтатхан. Пу ӱгредіг учреждениезі республиканың иң чахсы школалар санына кірче. Мында пірге хазна сыныхтағны 100 баллға тудыбысхан ӱгренҷілернің саны иң кӧп. Ідӧк пу ӱгредіг учреждениезі ЮНЕСКО ассоциированнай школа полча. Пӧзік чидіглерге чидер ӱчӱн, школаның директоры Нина Фёдоровна улуғ тоғыс апарча.
- Ӱгренҷілерімнің чидіглері мині поэт сыйыхха сығардылар, - тіпче Ағбандағы 20 № школаның орыс тілі
паза литература ӱгретчізі Алла Стоякина. Ол «Хакасияның саблығ ӱгретчізі» атха турысхан. Аның ӱгренҷілері орыс тілінең пірге хазна сыныхтағларын тӧреміл пӧзік балларға тутчалар.
- Минің кӧрізімнең, полған на ӱгренҷі экзаменні пӧзік баллға тудыбызарға оңдайлығ. Ӧӧні - кӱстеніс. Ӱренҷі кӱстеніп ӱгрензе, ол хайдағ даа сидіксіністерні тобыр полар паза чуртаста пӧзік чидіге чидер, - таныхтапча Алла Владимировна.
Танығлығ кӱнде Ағбандағы пӱдіріг техникумының мастері Алексей Островерхов паза аның студенті Никита Родионов Хакасия пазының алғыстас пічиине турысханнар. Никита Родионов, пӱӱл «Чиит профессионаллар» чоннар аразындағы чемпионатта аралазып, сыйыхтығ орынға турысхан.
Хайди искірче Хакасияның ӱгредіг паза наука министерствозы, наа ӱгредіг чылынаң республикада 11 муң азыра ӱгретчі істеніп пастир, оларның 25 проценті - 35 час толдырғалах ӱгретчі. Ідӧк пӱӱл пастағызын на ӱгредіг киреензер 160 чиит ӱгретчі килген. Олар прайзы даа республиканың пӧзік ӱгредіг учреждениезін тоосханнар.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде