«КИИ ХААЛХАЛАРЫ» ААЛҶЫЛАРҒА АЗЫЛҒАН
23.08.2017
Хабарлар
Сомда: Андрей САМОЖИКОВ Аселия паза Алина хызыҷахтарынаң хада.
Ирткен позырахта, 20 августта, 12.00 частаң пасти 16.00 часха теере «Ағбан» аэропорт Хакасияның чуртағҷыларына ізіктерін асхан. Мындағ оңдайнаң тӧртінҷі чылы аэропорт Россияның Кии флодының кӱнін таныхтапча. Ирткен чылда чахсы кӱн турған, аннаңар аалҷылар саны пис муң кізіні асхан.
Пӱӱл, тізең, иртенӧк оох наңмыр тохтабин тоолапчатханда, аэропорт устағ-пастаа паза тоғынҷылар аалҷылар поларына ікінҷілееннер. Че 12.00 час читкелекке дее чон чыылызып пастаан.
Перронда аалҷыларны ікі кічіг самолёт, пір вертолёт паза Ил-76 пассажир самолёды сағаан. Самолёттарны істі-тастынаң кӧріп аларға оңдай пирілген. Кӧбізін аэропорттың азых ізіктер кӱніне іҷе-пабалар палаларынаң хада, аға-ууҷалар пархаларынаң хада, саарбахтар паза чииттер килгеннер. Оларның пірсі Андрей Саможиков Аселия паза Алина хызыҷахтарынаң хада килген.
Пабаның чооғынаң, улии Аселия самолёттығ учуғарға хорыхча, олар, тізең, сӧбіренең чылығ чирлерзер тынанарға парарға пӧгінчелер. Андрей Александрович, хызыҷах самолёт істінде пол килзе, хорыхпиныбызарына ізенче. Очызы, тізең, хайдар даа учуғарға тимде. Чоохчыл хызыҷах туюххан сағыстарынаң ӱлесче: «Мин, - тидір ол, - айзар учуғарға сағынчам!» Пабазы, хызыҷаан истіп, кӱлінче. Ана андағ ікі пасха кӧңніліг пиҷе-туңма.
- Піс сынап таа чочынғабыс, наңмыр чаапчатханда, чуртағҷылар ибде одырарға чарадьібызарлар тіп, - ӱлесче сағыстарынаң аэропорттың пресс-секретарьы Мария Килумина. - Че, пістің ӧрінізібіске, илееде кізі мындағ чахсы оңдайнаң тузаланарға паза Россияның Кии флодының кӱнін піснең хада ӱлӱкӱннирге чаратхан. Кии транспорттарынаң пасха чуртағҷылар чолларны, самолёттарны арығлапчатхан аймах техниканаң танысчалар. Аэровокзал істінде, тізең, ідӧк Д.И.Каратановтың адынаң олғаннарның хоосчылар школазының ӱгренҷілерінің хоостар паза кибірге кір парған споттинг араласчыларының сомнар кӧзідии иртче. Июньда чиит хоосчыларға пастағызын на аэропорт чирінде пленер иртіргебіс. Ол тоғыстарны пӱӱн кӧріп аларға чарир.
Аннаң пасха 14.00 - 15.00 частарда аалҷыларға В.Г.Чаптыковтың адынаң Хакас филармониязының артисттері, ол санда Мария Васильева паза Артур Марлужоков эстрада сарыннарын толдырғаннар. Олох кӱн Хакасияның транспорт паза чол хонии министрі Александр Попов министерствоның Аарластығ паза алғыстас пічіктерін аэропорт тоғынҷыларына читірген.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде