РАЗРЕЗТЕРНІҢ НАЛОГ АХЧАЗЫНДА ПІР НУЛЬ ЧИДІСПИНЧЕ
01.09.2017
Хабарлар
Владимир Штыгашев 30 августта Хакасияның Ӧӧркі Чӧп президиумының парламент каникуллары соондағы пастағы чыылиин иртірген. Ӧӧркі Чӧп комитеттерінің устағҷылары пу чыылығда 10 артиинаң сурығ кӧрібіскеннер. Ӧӧн сурығларның пірсі республика бюджеді 2017 чылның пастағы чарым чылына хайди толдырылғанына чарыдылған.
Пӱӱлгі чылның республика бюджеді пастағы чарым чылға хайди толдырылғанынаң Хакасияның финанстар министрі Ирина Войнова таныстырған. Министрнің сан пирізінҷе, пастағы чарым чылға республика бюджеді хомай нимес толдырылтыр. Парыстарҷа 11 миллиард 185 миллион салковайға толдырылтыр, чылға кӧрілген санның 51,1 %-і.
- Ирткен чылның пастағы чарым чылынаң тиңнестірзе, 2 миллиард 281 миллион салковайға (алай 25,6 %-ке) кӧп, -таныхтаан Ирина Войнова.
Олох туста хорадығларның саннары сала тӧбін полған. Чарым чылға бюджет хорадығлары 12 миллиард 805 миллион салковайға толдырылған, чылға кӧрілген санның 47,5 %-і. Ирткен чылның андағох тузынаң тиңнестірзе, 1 миллиард 356 миллион салковайға ( алай 9,6 %-ке) асхынах.
Республиканың финанстар министрі хорадығларның ӧӧн чардығы социальнай сфераа килісчеткенін таныхтаан. Андағ хорадығларның сині 8 миллиард 700 миллион салковайға тиңнелген, ахча ӧӧнінде бюджетниктерге чал ахчазын тӧлиріне, тоғынминчатхан чуртағҷыларның имнег страхованиезіне паза социальнай тӧлеглерге партыр.
Министр позының сан пирістіг чооғында республика бюджеді пастағы чарым чыл аразына пос парыстарын ӧскіріп алғанына хайығ айландырған. Кӧзідімге, организацияларның парыстарына налог ахчазы, ирткен чылның пастағы чарым чылынаң тиңнестірзе, 806 миллион салковайға кӧп кіртір. Ӧӧркі Чӧп кнезі Владимир Штыгашев ол чидіг ӱчӱн финанстар министерствозына алғызын читірген, че олох туста пу тоғыс ам даа читкіҷе апарылбинчатханын таныхтаан. Аның кӧрізінең, республикадағы хара тас аныпчатхан разрезтер налог ахчазын читкіҷе тӧлебинчелер.
- Олар пірее 7-ҷе миллиард салковай тӧлирге киректер, тӧлепчелер, тізең, 700-че ле миллион, - таныхтаан Ӧӧркі Чӧп кнезі. - Хара тасты кӧптең кӧп аныпчалар нооза. Олох Аршандағы разрез 1 миллиардча салковай налог тӧлирге кирек.
Депутаттарның кӧңніне кірбиндір ӧӧнінде разрезтер артисттерге, улуғ фейерверктерге (чоох парча Ағбанда ирткен Харатасчы кӱніне чарыдылған улуғ концерттеңер, хайзында Россияның 20-ҷе саблығ артизі араласхан - Авт.) кӧп ахча хоратчатханнары, олох туста республика бюджедінзер налог ахчазын ас тӧлепчеткеннері. Салтарында Владимир Штыгашев республиканың финанстар министрін пу сурығҷа хати тоғынарға сурынған.
Ідӧк Ӧӧркі Чӧп президиумы Хакасияның пазы Виктор Зиминнің чӧбін ӱзӱрібіскен. Анда регион устағҷызы Ӧӧркі Чӧп депутаттарынзар Россияның налог кодексінің 25.8 статьязынзар алызығлар кирердеңер федеральнай закон проектін тимнеп, аны Хазна Думазынзар кирерге чӧпнең айланча. Нимедеңер чоох парчатханын финанстар министрі Ирина Войнова чарытхан.
2014 чылда, Хазна Думазының депутады Надежда Максимованың паза ол туста республиканың экономика министрі полған Татьяна Краснованың кӱстенізінең Хакасия Россия субъекттері санына кіріп алған, хайзыларының чирінде наа производстволар тӧстир, пар полғаннарының тилізін айныдар пӧгіннең льготалығ оңдайлар азылған. Хайдағ инвестиция проекттеріне льготалар пирерін регионнар постары кӧрҷеңнер. Андағ налог преференцияларын пир полҷаң субъекттер санында Ыраххы Востоктағы паза Сибирьдегі хайзы-да ла регионнар полған.
Че 2016 чылда федеральнай закон алыс парған - салтарында Россияның прай субъекттері андағ льготалығ режимнең тузаланар оңдайлығ пол парғаннар. Ағаа хоза, льгота ал полчатханнарның санына кірҷең оңдайлар нииктел парған - амды региондағы ӱлгӱлернің чарадии киректелбинче. Чарыда чоохтаза, чир алтындағы ис-пайны аныпчатханнар проектке кирексіністе кӧзіділген иң ас ахча синін (50 миллион салковай ӱс чыл аразына) хорат салзалар, оларның, налог органнарынзар айланып, парысха налогча паза чир алтындағы ис-пайны анир налогча преференциялар алып алар оңдайы пар. Хайди чарытхан бюджетче комитеттің кнезі Сергей Комаров, андағ ниме пол парза, республика бюджеді пір чылда 700-800 миллион салковай чідір сығар. Аннаңар чӧп кирілче - Хакасияны субъекттер санынаң сығарыбызарға, хайзыларының чирінде инвестиция проекттерін чуртасха кирчетсе, пірігісті региондағы инвестиция проекттерінің араласчылары санына кирері киректелбинче. Ӧӧркі Чӧп президиумы Хакасия пазының Хазна Думазынзар андағ айланыснаң сығарға чӧбін чағынғы сессияда ӱзӱрібізерге чарадығ алған.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы