ЧИИТ ХАБАРҶЫЛАРНЫҢ УЗЫ ӦСЧЕ
08.09.2017
Хабарлар
Пу наада «Хабар» республика газетазы «Сибирь - ізеніс чирі» регионнар аразындағы хабарҷылар узының дипломына турысхан. Пу марығ СМИ-лар, газеталар паза хабарҷылар аразында иртірілче. Пӱӱл андар аймах номинацияларҷа пір муң азыра тоғыс ызылған. Араласчыларның аразында пістің редакцияның хабарҷылары Татьяна Кыштымованың, Наталья Субракованың паза Майя Кильчичакованың тоғыстары полған.
Пістің газетаның хабарҷылары профессияҷа марығларда сыбыра аралазарға кӱстенчелер. Хабарҷылар мариинда аралазып, чиит журналисттернің узы ӧсче паза опыттары алғыпча. Ирткен чылда «Сибирь - ізеніс чирі» марығда араласхан пістің журналисттер жюринің ӧнетін сыйиина турысханнар.
Пу наада, тізең, Хакасия журналисттерінің аразында ідӧк улуғ нимес марығ ирткен. 23 - 29 сентябрьда Дагомыста (Краснодар крайы) «Прай Россия» хабарҷылар фестивальы иртер. Андар парар ӱчӱн, республика хабарҷыларының аразында хатығ харбазығ парған. Хакасияның чуртағҷылары хынчатхан СМИ тоғынҷызына Интернет пастыра ӱн пиргеннер. Пис журналисттің аразында «Хабар» газетаның экономика пӧлиинің редакторы Наталья Субракова иң алнында полған. Че пастағы орынға ағаа нинҷе-де ле ӱн читпин парған. Андағ даа полза, Наталья Чорыевнаның тоғызын хығырығҷылар пӧзік паалааннар.
Мыннаң мындар пістің редакцияның тоғынҷылары ідӧк профессияҷа марығларда аралазарлар паза хығырығҷыларны чапсых материалларынаң ӧріндірерлер.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы