ПӰӰН - ТИКСӀ ТИЛЕКЕЙДЕГӀ ТУРИЗМ КӰНӀ
27.09.2017
Хабарлар
Чыл сай тилекейде туризмнең айғасчатханнарның саны ӧсче. Кізілер чапсых орыннар кӧріп аларға, пасха чоннарның чозах-кибірлерінең танызып аларға, им-томнығ чирлерде хазыхтанып аларға сағынчалар. Россияның чуртағҷылары хырығ озаринда тынанарға кӱстенҷеңнер, че халғанҷы туста хазнада істіндегі туризм тиліпче, ол санда Хакасияда.
ПӀСТӀҢ РЕСПУБЛИКА - ЧАПСЫХ ОРЫННАРҒА ПАЙ ЧИР
Туроператорларның таниинаң, республиказар ӧӧнінде Сибирьдегі регионнарның чуртағҷылары килерге хынадырлар. Ӱс-пис кӱн полып, чайғызын олар кӧллерде тынанчалар, ағын суғларҷа кимеліг инчелер, чазағ чорыхтарға сыхчалар. Хысхызын, тізең, аймах базаларда тынанчалар. Туристтернің хайиин Хакасияның чир-чайааны паза пай тархыны тартча. Олар хайди даа Салбых кӱргенде, Оңно тағларда, Сӱлек пічіктерінде полып аларға кӱстенчелер. Чорыхчыларның чооғынаң, пурунғыдаң хайраллал халған хумартхы тастар кізее кӱс хосчалар. Кӧп чапсых ниме туристтерні «Казановка», «Улуғ Хуртуйах тас» паза Сос пилтірі аалдағы музейлерде сахтапча. Мында Ӧкӱн культурадағы кӧзеелерні, хайадағы хоостарны кӧріп аларға чарир. Ідӧк музей тоғынҷылары аалҷыларны хакас чонның кибірлерінең, культуразынаң таныстырчалар паза хакастарның ас-тамаанаң сыйлапчалар. Чарбалығ ӱгре, хан, хыйма, талған чорыхчыларның кӧңніне тың кірче. Республикада национальнай ӱлӱкӱннер паза фестивальлар тӧреміл иртірілчелер. Чыл пазын, Тун пайрамны, Ӱртӱн тойын чыл сай кӧріп аларға кӧп кізі чыылысча. Анда чорыхчыларға хакас сарыннарын паза тахпахтарын истіп аларға, спорт марығларынаң танызып аларға чарир.
Улуғ тоғыс «Хакасский» заповедник апарча. Пӱӱл Оғлах тағда аның кӱстенізінең «Ӧбекелер аалы» наа комплекс азылған. Амды чуртағҷыларға паза аалҷыларға пістің ӧбекелерібістің чурттарын кӧріп аларға оңдай пар. Туристтернің хайиин Хакасиядағы наа культура кіннері тартча. Кӧзідімге, пӱӱл азылған республиканың музей-культура комплексі ырах сабланча. Аның ӧмезі тӧреміл хынығ кӧзідіглер иртірче. Мыннаң мындар музейде кӧрігҷілер саны хозылар тіп ікінҷілес чоғыл. Нымырттығ посёлокта орныхчатхан Сойан-Сустағы ӱгредіг-производственнай искіріг кінін алынҷа таныхтирға кирек. Мында гидроэнергетикаа чарыдылған интерактивнай музей тоғынча. Пу музейде олғаннар поларға хынадырлар. Экскурсия тузында палаларға прай экспонаттарны холнаң тударға чарадылча. Ідӧк кічіг кӧрігҷілерні улуғ диорамалар, 3D пазллар хайхатчалар.
ХЫРЫҒ ОЗАРИНДАҒЫ ТУРИСТТЕРНІ ТАҢНАТЧА
Хакас чирінде ідӧк хырығ озаринаң килген чон тӧреміл тынанча. Итсе, тилекейдегі халғанҷы алызығлар сылтаанда, пасха хан чирлеріндегі чорыхчыларның саны кӧмес хызырыл парған. Хакасияҷа МВД-ның миграция сурығларынҷа управлениезінің таниинаң, турист пӧгіннең пістің республиказар аалҷылар Германиядаң, Хыдаттаң, Италиядаң, Великобританиядаң, Австралиядаң, США-даң, Франциядаң, Монголиядаң, Швейцариядаң, Ӱстӱнзары Африкадаң килчелер.
Пӱӱл регион Чехияның чорыхчыларын удурлаан. Делегацияда 44 кізі полған, мындағ улуғ ӧме хырығ озаринаң республиказар пастағызын на килген. Чехтерні тӧреен чирібістің сілии паза хакас чонның кибірліг культуразы таңнатхан. Ідӧк олар Хакасияда чалахай кӧңніліг чон чуртапча тіп таныхтааннар. Республикадағы туризмнің читпес сариларын чехтер таныхтааннарох. Аалҷыларның кӧрізінең, Хакасияда турист инфраструктуразын тилідерге кирек. Наңмырлығ кӱнде чорыхчылар хай пірее объекттерзер чидіп аларға сидіксінчелер.
ХЫСХЫЗЫН ТЫНАНҶАҢ БАЗАЛАР
Тӱрчедең Хакасияда хысхы турист сезоны пасталар. Тынанҷаң базаларда ағаа тимненіс хыызында парча. Хакасия правительствозының кӱстенізінең пістің регионда хысхызын тынанҷаң кӧп орын тӧстелген. Анда чуртағҷыларға, аалҷыларға даа пос тузын иртірерге чарир. Кӧзідімге, Орджоникидзе аймаандағы Приисковай аалда саналығ паза сноубордтығ чыларға хынчатхан улус чыылысча. Пеер тынанарға кізілер Россияның аймах регионнарынаң килчелер. Анзы тиктең нимес, анда хар ноябрьдаң пасти майға теере чатча. Сноубордтығ чыларға сағынчатсаң, мыннаң артых орын таппассың даа. Таштып аймаанда «Сюгеш» тағ индіре чылҷаң комплекс кӧп чыл маңнаныстығ тоғынча. Мында палалығ сӧбірелер тынанарға хынадырлар.
ГРАНТТАР МАРИИ ТУРИЗМНІ ТИЛІТЧЕ
2015 чылдаң сығара Хакасияда туризм индустриязына хабазар гранттар марии иртірілче. Аның чиңісчілері пирілген ахчаа наа тынанҷаң орыннар тӧстепчелер. Кӧзідімге, Асхыс аймаандағы Палыхтығ суғ аалда «Горная жемчужина» тағ индіре чылҷаң комплекс тоғынча. Комплекстің ээзі Юрий Соколов грант ахчазын 2016 чылда утып алған. Комплексте наа ла чыларға пастапчатханнарға даа, экстремалларға даа чылҷаң оңдай пар. Чиңісчілернің пірсі Ымай тас аалның чуртағҷызы Валерий Дудкин полча. Ол тӧреен аалының хыринда «Пристань» турист комплексін пӱдірібіскен. Пу базада кізілер хысхызын тынанчалар. Анда чахсы трасса, кафе пар. Ідӧк Казанов аалда чуртапчатхан Марина Саражакованы таныхтирға кирек. Кӱлӱк ипчі, марығда аралазып, аалдағы туризм кӧстегҷе утып алған. Пирілген ахчаа ол аалҷыларға тураны пӱдір салған, амды чылытчаң системаны турғысча. Марина Саражакова туристтерге мастер-класстар иртірерге, тайғаҷа ал чӧрерге, хакас сӧбіреде чуртир оңдай пирерге пӧгінче. Аалдағы туризм кӧстегҷе идінҷек Евгений Кайлачаков тоғынарға сағынча. Ол грант ахчазына Асхыста тастаң хакас ибін пӱдірче.
Пӱӱл грант марии узарадылча. Хакасияның культура министерствозы анда коммерческай нимес халых пірігістерін аралазарға хығырча. Марығ ӱс кӧстегҷе иртер: піліс алғытчаң туризм, этнотуризм паза социальнай туризм. Халғанҷы кӧстегҷе аралазарға сағынчатханнарға, тынағдағы паза хазии уйан улусты туризмге коніктірер проект тимнирге кирек. Сурыныс пічіктерін 7 октябрьға теере пу адресче ағыларға кирек: Ағбан г., Крыловтың ор., 72 № тура, 406 каб. Марығдаңар хоза 8(3902)295-151 телефонҷа піліп аларға чарир.
ХАКАСИЯ - ТУРИЗМҶЕ МАРЫҒНЫҢ ЧИҢӀСЧӀЗӀ
Туризм сферазында аймах марығлар тӧреміл иртірілче. Олар араласчыларға постарын кӧзіт пирерге оңдай пирчелер. Пылтыр Хакасия пастағызын на саблығ «National Geographic» журнал чарлаан марығда, аралазып, «Россиядағы этнотуризм» номинацияҷа чиңіс тутхан. Ікінҷі орынға Тағлығ Алтай сыххан, ӱзінҷізі Саха (Якутия) полыбысхан. Прай тоғысты Туризмҷе хабарлар кіні апарған. Пӱӱл регион хатап пу марығда кӱзінең сынасча. Амды «Россиядағы арығ чирлерде тынанары» номинациязар сурыныс пічіктері ызылған. Пӱӱнгі кӱнде Хакасия ӱннер пирілчеткен хоостыра пастағы орында. Регионның чуртағҷылары паза аалҷылары http://www. nat-geo/ngt-awards-2017/nomination/ сайтта республиканың ӱчӱн ӧткін ӱн пирзелер, піс хатап марығда утып аларға оңдайлығбыс.
27 сентябрьда Тиксі тилекейде туризм кӱні таныхталча. Хакасияда пу ӱлӱкӱнге чарыдылған аймах мероприятиелер паза акциялар иртер. Республиканың культура министерствозы туризм кӱніне чарыдылған ікі марығ чарлапча. Пастағы марығ «Хакасиядаң хыныснаң» адалча. Аны хоостыра кізілер тӧреен чирінеңер почта открыткаларын чайирлар. Ікінҷі марығ - «Хакасияның чапсых орыннарынаңар минің энциклопедиям». Марығлар республика синінде 29 сентябрьдаң сығара иртірілер, олардаңар хоза министерствоның сайтында піліп аларға чарир.
Хакасияда чорыхтарға хынчатхан чон чуртапча, аннаңар прайзын туризм кӱнінең алғыстапчабыс. Чолға тимнелген хапчыхтарың ниик ползын, ибіркее ӧкерсінгені чӱрекке толзын.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде