ДИСПАНСЕРИЗАЦИЯ КЕМГЕ КИРЕК?
29.09.2017
Хабарлар
Cыннаң чоохтаза, мин имҷілерзер чӧрерге хынмас кізібін. Че хайдағ даа кізі, хаҷан полза, пірее ағырыға хаптырча. Андағ туста пос кӱзінең, имненіп, чазылып аларға харасчазың. Имҷілерзер парзаң, оларның холынаң позып аларға оой нимес - иді-ханыңда имнеҷең пірее ағырығ таап ла аларлар. Аннаңар оларны пілбезе, чуртирға даа ниик полча, хазыхпын на тіп сағын чӧрчезің.
Че амды имнег кирее тиліпче, ол сферада наа технологияларнаң тузаланчалар, наа оборудованиенең тирінчелер. Имҷілер пірее ағырығ пасталчатханын азынада піліп алар пӧгіннең профилактика тоғызын апарарына кӧп хайығ айландырчалар. Ағырығны хайди ирте таап аларлар, аны имнебізерге, чох идібізерге ідӧк асхынах ахча хорадылар, сидік операциялар даа идерге кирек чох полар. Ана андағ пӧгіннерні толдырарға диспансеризация адалчатхан сыныхтағ чуртасха кирілген. Аны полған на кізее ӱс чыл пазынаң иртчедерге кирек. Анзы кізілернің чазынаң, хазии хайдағ полчатханынаң палғалыстығ.
Пу статьяда мин имҷілерні махтирға даа, хомайлирға даа сағыс тутпаам. Ол сферада кӧбізі пӧзік квалификациялығ профессионаллар, тоғызына пирін салған кізілер істенчелер. Олар хараа-кӱнӧрте, пос тузынаң санаспин, кізілерге полыс пирерге маңзырапчалар. Андағ оңдайнаң олар Гиппократтың сӧс пиргеніне турысчалар. Итсе, имҷілер тоғызында даа хай пірее читпестер табыл парчалар. Аннаңар мин позым хайди диспансеризация ирткенімнеңер искір пирерге сағынчам.
Пӱӱл мин тӧреен чылдағы кізілерге диспансеризация иртерге теес читтір. Мин Ағбандағы имнег туразында 26 № участокта санға алылған полтырбын. Андағы участковай терапевт Колмакова паза медсестра чыл пасталғаннаң сығара мині диспансеризация иртерге кӱстеп турғаннар. Пасха кізі пастыра, мині чӧптеп, пічіктер ысчалар. Ағаа хоза, хайдағ-да прививка турғызар тус чит килген осхас. Маң чохха састырып, пір дее парбинчам. Нанҷыларымның чооғынаң, олар, диспансеризацияны нинҷе-де ле часха иртібізіп, иртенінде аның салтарларын піліп алчалар.
Іди табырах иртіп парыбысчатханнарын піліп алып, 4 сентябрьда (пу кӱнге хайығ айландырарға кирек) городтың имнег туразының диспансеризация пӧлиинзер пардым. Андар илееде кізі айланчаттыр. Мағаа улуғ анкета толдырарға пиргеннер. Анда кӧп сурыға нандырарға кирек полған: хайдағ ағырығларнаң позың, туғаннарың ағырғаннаң пасти, тамкы тартчазың ма, чох па сурыға теере.
Аның соонда хайдағ кабинеттерде сыныхтағлар иртерге кирек чаҷынах пиргеннер. Андох харах давлениезін сыныхтааннар, че харах одын пір дее кабинетте сыныхтабааннар. Хан даа кӧдірілізін сыныхтабинчаттырлар. Пастап ханны анализке пирібізіңер тіпчелер. Пілчем, ханны анализке пирер алнында азыранмасха кирек. «Мин иртен азыранғам, кофе іскем...» - чоохтапчам. «Иртіңер, иртіңер, хайтпас, іди дее чарир», - тіпчелер мағаа.
Электрокардиограмма, УЗИ, флюорография, тиксі сыныхтаҷаң кабинетті иртібіскем, ідӧк хай пірее анализтер пирерге киліскен.
Прай анализтернің салтарлары участковай терапевтте таңда полар тіп искірчелер, флюорографияның кӧзідиин посха апарарға кирек.
Пазағы кӱнде, 14.00 часта, флюорография кӧзідиин тудынып, участковай терапевтсер чол тутчам. 26 № участоктың кабинедін тӧртінҷі хадылында таап алдым, ізіктегі табличканы хығырчам: участковай терапевт Олеся Владимировна Тюкпиекова, медсестра Елена Николаевна Ханжина. Имҷілер алыс парған осхас.
Тохладып, кірчем: «Мағаа киҷее ирткен диспансеризация салтарларын піліп аларға кирек», - тіпчем. «Тоғыс тузыбыс тоозыл парды, ам пу кабинетте пасха участоктың имҷізі тоғынар», - ніске, нымзах ӱннең чоохтапча ах халаттығ ӧкер хакас ипчі. Ағаа мин флюорография кӧзідиин пирібіскем. «Хаҷан килерге чарир?» - сурчам. Компьютерзер кӧріп, ол имҷі мағаа килер тусты искірче: «Мин Сірерні 12 сентябрьда 16.45 часта килерге пас салдым. Анда диспансеризацияның прай салтарларын искір пирербіс...»
Азынада турғызылған тусха 12 сентябрьда пазох ол имҷілерзер парчам. Кабинетсер кіргенімде, имҷілер анда-мында хасхлан сыхтылар, диспансеризация ирткен пічіктерімні таппадылар. «Арса, олар статистте?» - ікінҷілепче медсестра. «Че, чох нимені хайдаң табарзар, - хылыхтанып пастапчам, - сірер мині пу тусха хығырғазар нооза...» Паза чоохтанҷаң даа сӧстер таппинчам. «Диспансеризация материалларын таап, мин Сірерге телефонҷа сығдырадарбын», - молҷапча участковай имҷі.
Іди, пір дее ниме піл полбин, пазох айланарға килісче. Прививкадаңар сурғанымда, медсестра анзын пасхазынаң тӱптестіріңер тіп нандыр пирген. Участоктағы кізілерні диспансеризация иртірдірерге имҷілердең хысча поларлар, аның ӱчӱн хызааннапча даа поларлар. Че кізілерге аның салтарларын читір пирерге, аны чарыт пирерге кирегӧк полар тіп санапчам.
Амды сентябрь ай тоозыл парир, мағаа пірдеезі сығдыратпады. Хайди за, кізіні сыныхтағны кӱстеп иртірчелер, че аның салтарлары пірдеезіне кирек чох пол парча.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы