ХАКАС ТӀЛӀН ПІЛЧЕТКЕННЕРНІҢ САНЫ УЛАМ ХОЗЫЛЗЫН
03.10.2017
Хабарлар
Ирткен неделяда Хакасияда хакас тілін чахсы пілчеткен, Пётр Васильевич Курбижековтың «Айдолай» алыптығ нымағын ӧтіг хығырчатхан, сценада ізестіг тудынчатхан олғаннарны паза чииттерні тапханнар. Ағбандағы С.П.Кадышевтің адынаң культура кінінде «Ине тілі» республика фестивальы ирткен. Тіл мариинда пӱӱл алты ӧме сынасхан. Хайзы артых полыбысханын паза хакас тілінең хайдағ аймахтың чииттері артых чоохтасчатханын соонаң піліп аларбыс, амды, тізең, фестивальдаңар алғыда...
Марығда Хакас хазна университедінің «Хара хустар», Пии аймааның Хызыл хара суғ аалындағы «Тайға пӱӱрлері», Н.Ф.Катановтың адынаң национальнай гимназия-интернаттың «Чиңісчілер» ӧмелері араласханнар. «Чиңісчілерде» пу ӱгредіг учреждениенің чиит ӱгретчілері паза воспитательлері полғаннар. Асхыс аймаанаң фестивальға ікі ӧме килген - ол Калининдегі ортымах школаның «Таң чарии» ӧмезі паза марығда пастағызын на араластылар Асхыс станцияның ӱгренҷілері. Олар командаларын «Айдолайах» тіп адап алғаннар. Ідӧк алынҷа таныхтирға кирек республиканың алтынзархы аймаанаң килген ӧмені. Пӱӱл Шира аалның чииттері пастағызын на «Ине тілі» фестивальда араластылар. «хос хулах» ӧмедегілер марығда ідӧк чітіг устарын кӧзіткеннер.
«Ине тілі» фестиваль Хакасияның национальнай паза территориальнай политика министерствозының устаанынаң республиканың ӱгредіг паза наука, культура министерстволарының хабазиинаң нинҷе-де чыл изере иртірілче. хайди чооғында таныхтаан республиканың национальнай паза территориальнай политика министрі Михаил Побызаков, мындағ марығлар соонаң пос тілінең чоохтасчатхан, ағаа хынчатхан чииттернің саны улам хозылзын.
Таныхтирға кирек, пӱӱл фестивальны иртірерінде ідӧк «Асхыр» хакас чииттерінің пірігізі ӧткін араласты. Олар, республиканың аймахтарынаң пірге тоғынып, оларны марығда аралазарға чӧптееннер.
Пастағы номинация «изен-минді» адалған. Анда полған на команда удур-тӧдір танысча. Хада-пірге прай хыйға кӱстерін салып, пу сӧстернең изен-минділесчелер:
Хайдағ чирде чирлігзер,
Ноо суғда суғлығзар?
Адаңар, іҷеңер кем полған,
Ады-солаңар ноо чахсы?
Ідӧк медиапрезентация полызиинаң «Айдолайның» пір ӱзігін таллап алып, нинҷе-де хоос хоостап саларға паза, мультимедиа хоостыра кӧзідіп, кӧрбин чоохтирға кирек полған. Ӱзінҷі номинацияда чииттерге алыптығ нымахтың ӱзігін хығырарға, улуғ нимес инсценировка оңдайынаң кӧзіт пирерге кирек полған.
Тиксі алза, хакас тілінең чахсы чоохтасчатхан ӧмелерге пирілген тоғысты толдырарға сидік полбаан тіп сағынчам. Че пос тілін уйан пілчеткеннерге аар полған полар. Асхыс станциязының ӧмезінде алты кізі полған, оларның пос тілін ікі ле пала чахсы пілген. Аның сылтаанда оларға пу тоғысты толдырарға сала сидік арах пілдірген.
«Ине тілі» фестивальда чыл сай «тадырада, табырах чоох» номинация араласчыларның паза кӧрігҷілернің хайиин тартча. Пу марығда олғаннарға пирілген текстті нинҷе-де секундаа табырах, тадырада хығырыбызарға кирек полча. Че пӱӱл фестивальның тӧстегҷілері пу номинацияны иртірбеділер.
- Сынап таа, «Тадырада, табырах чоох» номинация пӱӱл иртірілбеенде, ачырғастығ, че килчеткен чылда піс аны хатабох кирербіс, - чоохтапча фестивальның устағҷызы Зинаида Чертыкова.
Прай марығлар тоозылғанда, чарғыҷылар орыннар ӱлестіргеннер. III орынны Асхыс аймаандағы Калининдегі ортымах школаның «Таң чарии» ӧме алып алған, II орында Пии аймаандағы Хызыл Хара суғдағы «Тайға пӱӱрлері» паза I орында Н.Ф.Катановтың адынаң национальнай гимназияның «Чиңісчілері» полыбысханнар. Сыйыхтығ орынға турысхан ӧмелерге дипломнар паза ахчалығ сертификаттар пирілгеннер. Ідӧк прай араласчыларға сыйыхха книга пирілген - Пётр Курбижековтың «Айдолай» алыптығ нымағы!
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы