«ЧИТІГЕН» КӦРІГҶІЛЕРНІ ЧАПСЫТХАН
04.10.2017
Хабарлар
Ирткен неделяда «Читіген» театр наа сезонын асхан. Сӧрӧн кӱскӱ кӱннерде кӧрігҷілернің кӧңнін кӧдірерге пӧгініп, артисттер «Миске тузы» кӱлкістіг ойынны кӧзіткеннер.
Ойынның полтазы мындағ. Ікі оол тирек мискезін тееріп, оларны чол хазында сатча. Аалдағылар чахсы парыс идіп аларына ізенчелер. Сынап таа, мындағ морсымнығ мискелерні пір-ікі ле садыбызарға чарир. Че кирек пасха парыбысча. Садығ тузында ӧӧн матырларға аймах кізілернең тіл алызарға килісче. Олар машиналығ чахсы чӧр полбинчатхан хысха, олаңай чоннаңар «сағыссырапчатхан» депутатха, идінҷек ипчее, бандитке тоғасчалар. Полған на матырның омазын артисттер уғаа чахсы кӧзітчелер.
Спектакльда аймах сурығлар кӧдірілче. Иң пурун чайаачы ӧме кӧрігҷілернің хайиин тіл суриина тартхан. Матырлар орыс паза хакас сӧстерін араластырып чоохтасчалар. Андағ оңдайнаң, артисттер амғы хакастар тӧреен тілінең турыстыра тузалан полбинчатханын кӧзіткеннер. Ідӧк пір ниме таныхтирға кирек. Кізілер миске сатчатхан оолларны алаахтырып аларға кӱстенчелер. Итсе, машиналығ чахсы чӧр полбинчатхан хыстаң олар постары ахча хызып пастааннар. Бандит, тізең, аалдағы чуртағҷылардаң, пір дее ниме, сурбин, киліп ле, пір кӧнек миске пылап алған. Хомзынысха, пӱӱнгі кӱнде андағ нимені удаа кӧрерге килісче. Іди дее полза, полған на кізінің чолында чахсы сағыстығ чон тоғасча. Аалдағы «бизнесменнерге» тузалығ чӧп пирче идінҷек Галина Кирилловна. Аның чооғынаң, мискені теерерге ле нимес, аны теплицада чахсы ӧскіріп аларға чарир. Андағ оңдайнаң чиит ооллар чыл сай парыстығ поларлар.
Чоохтирға кирек, «Миске тузы» спектакль Орыс драма театрының артизі Фарит Загидулиннің пьесазы хоостыра чайалған. Автор 2012 чылда пу чайаачы тоғызы ӱчӱн хакас драматургияҷа V республика марииның чиңісчізі полыбысхан. Олох чыл декабрьда «Читігеннің» директоры Виталий Канзычаков ойынны турғызыбысхан. Виталий Николаевич чыл сай наа кӱлкістіг ойын турғызарға кӱстенҷең. Аның таниинаң, амғы аар туста артисттер чир-суғҷыларының кӧңнін кӧдірерге киректер. Виталий Канзычаков хакас чонның турыстығ оолғы полған. Аның ады хаҷанға даа чонда халар.
Спектакль тоозылғанда, кӧрігҷілерге ӧріністіг хабар искіргеннер: сцена узы Валерий Топоев «Хакасияның чон артизі» аарластығ атха турысхан. Валерий Валентинович пістің чонның иң хынчатхан артисттерінің пірсі полча. Ол «Читіген» театрда 1991 чылдаң сығара істен парир. Ол син тус аразына ағаа хайдағ ла рольлар толдырарға киліспеен. Бахтый («Абахай Пахта» ойын), Тахей («Тигір палғалыстарының олтырығы»), Макбет («Хазыр тус») паза аннаң даа пасха матырлар кӧрігҷілерні паза критиктерні аптааннар. Аарластығ атты киречілепчеткен пічіктерні Валерий Топоевке Хакасияның культура министрінің тоғызын толдырчатхан Татьяна Чаптыкова читірген. Татьяна Владимировна театрның ӧмезін сезон азылғанынаң алғыстаан. Ол чоохтаан: «Читіген» - хакас чонның кибірлерін хайраллапчатхан театр. Кӧрігҷілер чайаачы ӧменің ойыннарына хынадырлар. Пӱӱл театрда тӧрт наа спектакль турғызылар. Ізенчем, олар кізілернің кӧңніне кірерлер».
Ідӧк чыылған чонны пір чапсых ниме сахтаан. «Читіген» театр ӱс кӧрігҷее «алтын» билеттер читірген. Мындағ акция Хакасияның театрларында пастағызын на иртірілді. «Алтын» билеттіг кізі чайаачы ӧменің хайдағ даа спектакльын тикке кӧріп аларға оңдайлығ. Аарлығ сыйыхнаң «Читігеннің» сын кӧрігҷілерін таныхтааннар. Билеттерні Светлана Ивандаева, Татьяна Топоева паза Галина Бурнакова алғаннар. Светлана Иннокентьевна «Читігеннің» тӧстегҷізі Василий Ивандаевтің ипчізі полча. Ол артисттерге, Василий Ивановичтің сағынған сағызын толдырып, хакас чонның кибірлерін, тілін хайраллир тоғысты мыннаң мындар апарарға чахаан. Театровед Галина Николаевна «Читіген» театрның ойыннарына сыбыра чӧрче. Аның театрның тоғызына чарыдылған статьялары «Хабар» газетада сыхханнарох. Режиссёр Михаил Топоевтің ипчізі Татьяна Даниловна чайаачы ӧмее ідӧк тӱзімніг тоғынарға алғаан.
Хынығ спектакль кӧрігҷілернің кӧңнін кӧдірген. Театрның наа сезоны кӧп ӧрініс ағыларына ікінҷілес чоғыл.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде