ШОР ЧОНЫ УЗЫН КӦЗІТКЕН
11.10.2017
Хабарлар
Асхыстағы Культура туразының фойезінде столлар изере турча. Оларны ибіре кізілер хайынысчалар. Пірсі, столға ниме-ноолар салып, маң чохтанча. Пасхазы, тізең, ол нимелерні кӧрче.
Позырах кӱн Асхыста шорларның фестивальы ирткен. Шор чоны ас саннығ чоннар санына кірче. Хакас Республикада олар Асхыс паза Таштып аймахтарында чуртапчалар. Олар - хаҷаннаң тайғада чуртапчатхан чон.
Культура туразынзар кірзеңӧк, сол саринда им оттар столға толдыра салылых. Пу иренні удаа кӧредірбін, ол - Семён Иванович Кискоров, хости ипчізі Валентина Ефимовна. Ол Асхыста иртчеткен ярмаркаларда удаа аралазадыр, им оттар сатча. Пӱӱн дее им оттар толдыра, итсе, піс ол оттарны таныпчабыс, че олар им полчатханнарын пілбиндеечебіс. Хости Матурдаң килген Светлана Ивановна Чебодаева хайынча. Аның столында ас-тамах, ағас самнах-айахтар паза даа пасха нимелер.
Мына пір ипчі монҷыхтарнаң айғас парча. Аның алнында пос холынаң иткен кӧклӧлер, монҷыхтар. Пу ипчінің ады - Сундуз Ислямовна Фаткулина. Ол Междуреченск городтаң. Ол піссер удаа кил парадыр. Пірсінде мин Палыхтығ суғ аалда аның тоғыстарынаң танысхам.
Писхамҷыдағылар килтірлерӧк. Чиит ипчі Людмила Николаевна Тимовкина наа тӧстелген «Элим» ӧменең устап парча. Оларнаң хости аңчулдағылар хайынчалар, оларның устағҷызы - Борис Григорьевич Шулбаев. Оларға чоохтазарға даа маң чоғыл. Оларның столы иң пай полған полар: чистек-мискенің аймағы, харағат чистегі ам на тееріп алғанға тӧӧй, харалта пыс партырлар. Мына санах, олар аны «шанах» тидірлер, ол кічиҷек иділтір. Ол санахнаң шор чоны тайғаҷа ниме-нооларын тарт чӧредір. Андағ санахты мин кічігде кӧргем.
Ол туста залда фестивальның эстрада пӧлии тоғызын пастаан. Кӧзідігні Аңчулдағы «Тамыр» ӧме пастаан, сарын толдырған. Оларның соонаң Писхамҷыдағы «Элим» ӧменің хызыҷахтары теелбек салғаннар. Мына Мадырдаң килген «Талай суғ» ӧмее теес читті. Сценаа сығып, оолағас сарнап парча, ол Артём Чебодаев полтыр. Анаң аның ӧӧрелері теелбек салғаннар, соонаң Междуреченсктең килген хыстар сценаа сыхханнар. Олар шор чонның наа стилизованнай кӧгенектерін кӧзіткеннер. Оларнаң устапча Таяна Торчакова. Пу ӧме Москвада, кип-азахтарын кӧзідіп, Гран-при алтыр. Кӧрзе дее, іле кӧрінче: киптері пай. Сағыс тӧріпче: пу ӧмее чахсы полысчаттырлар. Пістің ӧмелер прай пос кӱзінең тимненгеннері іле кӧрінче.
Халғанҷызында Асхыстағы чайаачы палалар школазының теелбек клазына чӧрчеткен хызыҷахтар устарын кӧзіткеннер. Рустам Иптышев устапчатхан «Алтын хыл» ӧме нинҷе-де сарын толдыр пирген.
Анаң сценаа С.П.Кадышевтің адынаң культура кінінің тоғынҷызы Алла Николаевна Шаламова сыххан. Ол алғыстас чооғы соонаң фестивальда араласхан ӧмелерге Аарластығ пічіктер читірген. «Шория» ӧменің устағҷызы Наталья Николаевна Федотованы таныхтаан. Удур алғыстас сӧзінең Таяна Торчакова сыххан, ол Алла Шаламоваа сувенир читірген.
Мыннаң эстрада пӧлии тоғызын тоосхан, анаң мастер-класстар ирткен.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы