КӦРІГҶ|ЛЕРГЕ ӦРІНІС СЫЙЛААННАР
11.10.2017
Хабарлар
Ирткен пятницада драма театрының кічіг залында пос орын чох полған. Кізілер «Хазыр суғ» ансамбльның ыр-сарыннарын истіп аларға килгеннер. Пу фольклор ӧмезі 2014 чылда тӧстелген. Аның кӧглері Хакас драма театрының ойыннарын тӧреміл чазапча.
Ансамбльнаң музыкант паза композитор Тамара Чустеева устапча. Тамара Николаевнаны пістің кӧрігҷілер чахсы таныпчалар. Студент тузындох ол музыка колледжінде «Читі хыс» чайаачы ӧме тӧстеп алған. Анаң таланттығ хыс «Ӱч сӱмер» ансамбльда кӧг тиріглерінең ойнап, сарнаан. Хакас драма театрында Тамара Чустеева 1998 чылдаң істен парир. Ол кӧп ойынға килістіре кӧглер таллаан, «Музыканың хакас ибі» программа тӧстеен. Пу ӱгредіг программазына олғаннар тың хынадырлар.
2014 чылда театрда Тамара Николаевнаның кӱстенізінең «Хазыр суғ» ансамбль тӧстелче. Хысхаҷах тус аразына музыканттар «Хан Мирген», «Тарынҷах харға», «Алып Пил Тараан», «Пыром таста, чирім», «Алаахтыртхан хорхло» паза пасха даа ойыннарда аралазарға маңнанғаннар. 2014 - 2015 чылларда «Хазыр суғ» ансамбль, Тувада паза Тағлығ Алтайда ирткен марығларда устарын сыназып, лауреат атха турысхан. 2016 чылда чайаачы устар гастрольларнаң Хыдатсар чӧргеннер. Че музыканттарның таниинаң, оларның иң хынчатхан кӧрігҷілері Хакасияда чуртапчалар. Аннаңар, тус полза, олар хакас аалларынҷа концерттернең чӧріп, ӧрініс сыйлапчалар. Музыканттарның «Театрда тӧреен музыка» программазын кӧрігҷілер пӧзік паалапчалар, хатап килерге хығырчалар.
Пастап чайаачы ӧмеде тӧрт музыкант полған, 2016 чылда ансамбльға Хакас драма театрының чиит артисттері хозылғаннар. Амды ӧмезер алты кізі кірче: музыканттар Тамара Чустеева, Вячеслав
Албычаков, Анна Кыстоякова, Наталья Албычакова паза артисттер Николай Бельтерековнаң Валентин Ульчугачев. «Хазыр суғ» ансамбльның репертуары аймах сарыннардаң паза тахпахтардаң пӱтче. Оларны 6 октябрьда иирде толдырып, музыканттар кӧрігҷілернің чӱректерін хайылдырғаннар.
Концертті сцена устары ойын оңдайынаң пӱдірібіскеннер. пастап Тамара Чустееванаң Николай Бельтереков, тӱӱр саап, кізілернің хайиин тартханнар. Анаң залға толдыра ыр-сарыннар чайылғаннар. Номерлер аразында В.Ульчугачевнең Н.Бельтереков поэт М.Е.Кильчичаковтың паза хайҷы С.П.Кадышевтің кибелістерін хығырғаннар. полған на сарын тӧреен чир-суубысха, аның ағын суғларына, пӧзік тағларына, чалбах чазыларына чарыдылған. Ідӧк ансамбльның ырлары кӱлӱк, ырах сағыстығ чоныбысха поғдархирға, аны аарлирға ӱгретчелер. Кӧрігҷілерні «Хыстың чобалызы» чон ыры чӱрексіндірген. Ах Ӱӱс хазында чуртапчатхан абахайны Ағбан саринзар ирге пирібіскеннер. Іҷе-пабазынаң чара парыбызып, ол хомзынызынаң ӱлесче. Пу сарынны «Хазыр суғ» ансамбль «Пыром таста, чирім» ойын тузында толдырча. Тамара Чустеева
- Хакасияның чон артизі, Алиса Кызласованың очы хызы. Алиса Алексеевна кӧп сарын чайап салған. Аның «Ах тасхыллар» ырын истіп, кізілернің кӧңні кӧдірілген. Ансамбльның устағҷызы позы даа сарыннар пасча. Концертте ол «Хызымай» ырын толдырған.
«Хазыр суғ» ансамбльның музыканты Наталья Албычакова ідӧк сарыннар чайирға хынадыр.
Хакас ӧменің полған на араласчызы - изебі чох таланттығ ус кізі. Чайаачы кӧңніліг Вячеслав Албычаков хайди хайлапча! Аның пӧзік узына чӧпсініп, кізілер матап айа сапханнар. Анна Кыстоякова чіли хобырахнаң Хакасияда саннығ ла кізі ойнапча полар. Ідӧк артисттерні Николай Бельтерековнаң Валентин Ульчугачевті таныхтирға кирек. Хысхаҷах тус аразына ооллар хакас чонның кӧг тиріглерінең ойнирға ӱгреніп алғаннар.
«Хазыр суғ» ансамбль хакас сарыннарын кибірли толдырарға кӱстенче. Оларның кӧглері кізілерге кӱс хосча, таңдағы кӱнге ізеніс пирче.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы