КНИГАЛАРДА - ЧОННЫҢ ХЫЙҒАЗЫ
13.10.2017
Хабарлар
ХАКАСИЯДА 10 - 12 ОКТЯБРЬДА СОЙАН-АЛТАЙ КНИГАНЫҢ РЕГИОННАР АРАЗЫНДАҒЫ ФЕСТИВАЛЬЫ ИРТКЕН. ПУ ПАЙРАМНЫ ТИМНЕЕННЕР РЕСПУБЛИКАНЫҢ КУЛЬТУРА МИНИСТЕРСТВОЗЫ ПАЗА Н.Г.ДОМОЖАКОВТЫҢ АДЫНАҢ НАЦИОНАЛЬНАЙ БИБЛИОТЕКА.
МЫНДАҒ КНИГА ӰЛӰКӰНІН ПІСТІҢ НАЦИОНАЛЬНАЙ БИБЛИОТЕКА ІКІНҶІ ХАТИ ИРТІРЧЕ. АМҒЫ ПАЙРАМҒА САНКТ-ПЕТЕРБУРГ, РОСТОВ, ХЫЗЫЛЧАР ГОРОДТАРДАҢ, КЕМЕРОВ ОБЛАЗЫНАҢ, ТУВА ПАЗА АЛТАЙ РЕСПУБЛИКАЛАРДАҢ ААЛҶЫЛАР КИЛГЕННЕР.
ФЕСТИВАЛЬНЫҢ ПАСТАҒЫ КӰНІНДЕ СОЙАН-АЛТАЙ КНИГА ӰЛӰКӰНІНІҢ АРАЛАСЧЫЛАРЫ Н.Г.ДОМОЖАКОВТЫҢ АДЫНАҢ НАЦИОНАЛЬНАЙ БИБЛИОТЕКАЗАР ЧЫЫЛЫСХАННАР. МЫНДА ПИСАТЕЛЬЛЕР, РЕСПУБЛИКАНЫҢ БИБЛИОТЕКА ТОҒЫНҶЫЛАРЫ, КУЛЬТУРА ПАЗА НАУКА ТОҒЫНҶЫЛАРЫ, СТУДЕНТТЕР ПАЗА ӰГРЕНҶІЛЕР ПОЛҒАННАР.
10.00 часта библиотеканың конференц-залында чыылысхан чонны кӧгнең паза айраннаң удурлааннар «Читіген» театрның артисттері. Анаң аалҷыларзар алғыстас сӧзінең айланған Хакасияның культура министрі Татьяна Владимировна Чаптыкова.
Ол чооғында книганың улуғ тузазын таныхтаан. Амғы туста тилекейде чииттернің сағыс-кӧгістері ӱчӱн хатығ харбазығ парча. Аннаңар кӧп книга хығырған кізі саба чолға кір парбазын пілче. Книгада пістің чонның хыйғазын табарға чарир нооза.
Анаң аалҷылар алғыстастарынаң паза сыйыхтарынаң чон алнынзар сыхханнар. Іди Тувадаң А.С.Пушкиннің адынаң республика библиотеказының директор орынҷызы Елена Валентиновна Кравченко, Тағлығ Шориядаң поэт Ольга Николаевна Тенишева, Алтайдаң Хакасияның паза Алтайның саблығ артизі Артур Викторович Марлужоков чоох тутханнар. Артур Марлужоков В.Г.Чаптыковтың адынаң республика филармониязының хоос устағҷызы полча. Пу ӱлӱкӱнде ол сіліг паза кӱстіг ӱнінең алтай тілінең сарын толдыр пирген. Аны ізіг айа сабыстарынаң ӱдескеннер.
Анаң программа хоостыра Сойан-Алтай региондағы республикалар наа сығарылған книгаларының презентациязын иртіргеннер. Ачырғастығ, че олар постарының книгаларын садыға ағылбааннар. Іди Алтайда наа книгаларның санында «Алтайларның чон ойыннары», «Алтай фольклоры», «Алтай чонның нымахтары», «Алтай баатырлары», «Орыс-алтай сӧстігі» 2 томнығ паза даа пасхазы.
Тувада ідӧк хынығ книгалар сыххлапчаттыр. Кӧзідімге алза, «Урянхай. Тува» сомнығ альбом, «Азия кінінің ипчілері», «Тува ипчілер кип-азаа», М.Б.Кенин-Лопсанның «Хамның ӱлӱзі» роман, «Тува литературазының тархыны» паза даа пасха книгалар.
Аннаң пістің республиканың книга сығарчатхан организациялары постарының тоғыстарын кӧзіткеннер. Іди Хакас книга издательствозының директоры В.М.Тутатчиков издательствоның тархынынаңар хысхаҷахти чоохтап пирген паза хайдағ книгалар сыхханын кӧзіт пирген. Издательство кӧбізін хакас тілі учебниктерін паза орындағы писательлернің хоос чайаачы тоғыстарын сығарча.
Андағох хоос литератураны сығарча Хакасиядағы чайаачылар туразы. Ьр ниместе олғаннарға А.Килиже-ковтың «Чылығ кӱнде», И.Миягашевтің «Олғаннарға» паза И.Топоевтің «Иркеҷектерге» сырлаҷаң книгаҷах-тарын сығарыбысхан. Хакасиядаңар сіліг сомнығ «Наследие Хакасии» паза «Культура питания хакасов» альбомнар чарыхха сыхханнар. Ам на чарых кӧрді поэт Моисей Баиновтың «Ӧскей ах хазыңа пӱрлер» кибелістер чыындызы.
Ідӧк постарының наа книгаларынаңар чоохтааннар ХакНИИЯЛИ-ның, ХакИРО паза ПК-ның, ХГУ издательствозының паза национальнай библиотеканың тоғынҷылары.
Анаң библиотека тоғынҷылары краеведение сурығларынҷа семинарда тоғынғаннар. Писательлер хығырығҷыларнаң тоғасханнар. Иирде «Читіген» театрның артисттері А.Чапрайның «Абахай Пахта» паза И.Топоевтің «Чыылығ» ойыннарының ӱзіктерін кӧзіткеннер.
11 октябрьда писательлер паза аалҷылар Ағбан пилтірі аймаандағы Томыҷахтар аалда паза 12 октябрьда Алтай аймаандағы Аршаннар аалда хығырығҷыларнаң тоғасханнар.
Соонаң мындағ книгалар пайрамы улам алғым паза тӱзімніг ирт турарына ізеніс пар. Прай кирек - позыбыстаң.
Автор :
Илья ТОПОЕВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде