САБЛЫҒ ВИОЛОНЧЕЛИСТТӀҢ ЧАПСЫХ КОНЦЕРТӀ
18.10.2017
Хабарлар
Ирткен тынағ кӱннерінде В.Г.Чаптыковтың адынаң Хакас филармониязында хайхастығ концерт полған. Пістің кӧрігҷілерні чайаачызынаң саблығ музыкант Денис Шаповалов ӧріндірген.
Денис Валерьевич 2000 чылда Москвадағы консерваторияны тоосхан. Студент тузында ол П.И.Чайковскийнің адынаң чоннар аразындағы XI фестивальның чиңісчізі полыбысхан. Денис Шаповаловтың талантын маэстро Мстислав Ростропович пӧзік паалаҷаң. Тиктең нимес музыкантты «Ростроповичтің пархазы» тіп адапчалар.
Чайаачы ус гастрольларнаң тилекейҷе матап чӧрче. Аның узына Лондонның, Нью-Йорктың, Мадридтің, Пекиннің чуртағҷылары сыбыра аптаттырчалар. Денис Шаповалов Хакасиянаң пик палғалыс тутча. 2004 чылдаң сығара ол мында тӧреміл концерттер кӧзітче паза орындағы музыканттарға мастер-класстар иртірче. 2011 чылда виолончелист симфоническай оркестрде хығыртылған дирижер полып істенген. пістің кӧрігҷілер Денис Шаповаловтың чайаачызына хынадырлар, аның концертін кӧріп аларға филармонияның улуғ залына кізілер тығырама чыылғаннар.
Ағбанда саблығ музыкант композиторлар А.Вивальдинің, В.Моцарттың паза Й.Гайднның чайаачы тоғыстарын толдырған. Олар прайзы XVIII векте чуртааннар. Ідӧк залдағы чонны саблығ виолончелист позының чайаачы тоғызынаң таныстырған. Чоохтирға кирек, концерт тузында Денис Шаповалов дирижер полып симфоническай оркестрнең устаан паза виолончельнең ойнаан.
Музыкант симфоническай оркестрнең хада ойнирға пастабысханда, залға толдыра хайхастығ музыка чайылған. Аны истіп, кӧгілбей тигірге, сіліг порчоларға ӧкерсінерің, пар нимее ӧрінерің килче. Минің кӧңніме А.Вивальдинің «Оркестрнең виолончельге концерт» произведениезі кірген. Ол хайди ниик истілче. Харахтар нуубыссаң, сах андох позың филармонияда нимес, пурунғыдағы музыка салонында одырчатхан чіли пілдірче.
Концертті Денис Шаповалов позы апарған. Номерлернің аразында ол кӧрігҷілерге композиторлардаңар хысхаҷахти чоохтап турған. Кӧзідімге, Антонио Вивальди 400 артиинаң концерт паза 40 опера пас салған. Аның иң саблығ тоғызы «Времена года» полча. Минің кӧрізімнең, концерттерде мындағ танығларны хатап
истіп аларға артых полбас.
Денис Шаповалов - эксперименттерге хынчатхан кізі. Ол пастағы классика музыканты, хайзы Алтынзархы полюста концерт иртірген. Виолончелист рок тоғыстарын толдырған. Пылтыр, тізең, ол пастағы концертін пас салған. Чайаачы устың чооғынаң, Москвадағы консерваторияның пайрамына ол пірее чапсых сыйых ит пирерге сағынтыр. Виолончелисттің ипчізі ағаа кӧг пас саларға чӧп пиртір. Денис Валерьевич позы турыстыра тоғыс чайап полбас тіп тың сағыссыраан. Че аның «Concerto di Bravura для виолончели и струнных» тоғызын хада тоғынчатхан арғыстары даа, кӧрігҷілер дее чылығ удурлааннар.
Виолончелисттің произведениезі ӱс чардыхтаң пӱткен. Пастағызы «Йозеф Гайдн рок чайапча» адалча. Мында Денис Шаповалов классика музыказынаң рокты піріктірібіскен. Ікінҷі чардығын ол барокко музыказына тӧстеніп пастыр. Концерттің халғанҷызында амғы кізілердеңер, оларның маң чох чуртазынаңар чоох парча. тиктең нимес чайаачы ус аны «Ритм оф лайф» адап салған. Денис Шаповаловтың тоғызы кӧрігҷілерні сағысха тӱзірген. Хайдар піс піди маңзырапчабыс? Турғысхан пӧгіннерібісті толдырчабыс па? Алай чуртас маңзытта парыбысча, пістің, тізең, сағысха кирҷең дее, поғдархаҷаң даа ниме халбинча.
Амғы композиторларның тоғыстарын пурунғы чайаачы устарның произведениелері хыринда хай-хай сидік истерге. Изебі чох таланттығ В.Моцартты алып алза, аның музыказы хайдағ чарых. Минің сағызымнаң, полған на чайаачы ус позының тузынаңар, аның оңдайларынаңар пасча. Аннаңар хайдағ тус, андағ музыка полча полбас па.
Денис Шаповаловтың концерті уғаа чахсы ирткен. Залдағы чон ағаа, азах узында турып, хазыр айа сапхан. Кӧрігҷілер ізенчелер, таланттығ музыкант Хакасиязар концертнең хатап килерге тус табар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде