ІКІ ААЛ ЧӦБІ ПІРІКТІРІЛЕР
20.10.2017
Хабарлар
Хакасияның Ӧӧркі Чӧп президиумы 18 октябрьда УК теестегі чыылиин иртірген. Чыылығның ӧӧн сурығларының пірсі республиканың ікі муниципальнай пӱдізін піріктірердеңер закон проекті полған. Чоох парған Пии аймаандағы Пии аал чӧбін паза Новотроицкай аал чӧбін піріктірердеңер.
Чыылығны пастир алнында, президиумдағылар адынаң Оӧркі Чӧп кнезінің пастағы орынҷызы Юрий Шпигальских Владимир Штыгашевті тӧреен кӱнінең алғыстаан. Владимир Николаевичке 18 октябрьда 78 час толды. Республиканың Оӧркі Чӧп устағҷызының адына аймах-пасха чирлердең алғыстастығ пічіктер килген, Штыгашевті Россия субъекттері ӱлгӱ органнарының устағҷылары алғыстап, чылығ сӧстерін читіргеннер. Ідӧк Хазна Думазы депутаттары паза Федерация Чӧбінің кізілері алғыстастарын ысханнар. Федерация Чӧбіндегі Хакасияның кізізі Евгений Серебренников Россия парламентінің ӧӧркі палатазының кнезі Валентина Матвиенконың адынаң Владимир Николаевичті тӧреен кӱнінең алғыстаан. Ідӧк Оӧркі Чӧп кнезін Хакасия пазы Виктор Зимин, республикадағы муниципальнай ӱлгӱ органнарының, федеральнай паза республикадағы структураларның устағҷылары алғыстааннар.
Пии паза Новотроицкай аал чӧптерін піріктірердеңер закон проектінең Пии аалның пазы Иннокентий Стряпков таныстырған. Ікі муниципальнай пӱдісті пірге піріктірер пастағнаң адалған аал чӧптерінің пастары сыхтырлар. Ноға пірігерге сағыныбысханнар? Хайди кӧзітче чуртас, улуғ нимес муниципальнай пӱдісте тиліҷең оңдай чоғыл, налог ахчазы асхынах чыылча, прай парыстар аал чӧбінің тоғынҷыларын на тударға парыбысча тіп таныхтаан Стряпков. Аннаңар аал пастары мындағ пастағнаң сыхтырлар.
Муниципальнай пӱдістернің чуртағҷылары ол пастаға хабазығ пиртірлер, анзын ол аалларда ирткен азых ӱзӱріглернің салтарлары киречілептір. Аны хоостыра орындағы депутаттар ікі аал чӧбін піріктіреріне чарадығ пиртірлер. Мында таныхтирға кирек, Хакасияның финанстар министерствозы ікі муниципальнай пӱдісті піріктіреріне ідӧк хабасчаттыр - олар піріктіріл парзалар, муниципальнай пӱдістернің хайзы алымнары чох иділер осхас.
Оӧркі Чӧп кнезінің пастағы орынҷызы Юрий Шпигальскихтің таниинаң, ол оой ла тоғыс нимес. Кӧп сурығларны пӧгерге килізер, ол санда наа тӧстелчеткен муниципальнай пӱдістің хырығларын орталадарынҷа. Аннаңар закон проектін, сессияда кӧріп, пӱкӱлее албин, пастағы хығырығда ла аларға чӧп пирілген. Ағаа хоза, закон алылған тустаң сығара чарым чыл ирткенҷе, табығлар иртірерге киректелчеткені таныхталған, наа тӧстелчеткен муниципальнай пӱдістің орындағы пос устаныс органнарын тӧстир ӱчӱн. Оӧркі Чӧп президиумы закон проектін ноябрьдағы сессияда депутаттарның ӱзӱриине сығарарға чаратхан.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде