ХАЙДА ТИЛІС ПАР, АНДА ӰЗӰРЛИРГЕ ЧАРАБАС
24.10.2017
Хабарлар
Хакасияның пазы Виктор Зимин 20 октябрьда Абазада, город пазының инаугурациязы ирткен соонаң, республикадағы СМИ-лар устағҷыларынаң тоғасхан. Пресс-конференцияда республика устағҷызы аймах сурығларға нандырған, ол санда политикадаңар паза экономикадаңар.
Сурығларның пірсі республика правительствозынаң палғалыстығ полған. Хабарҷылар пілерге сағынғаннар: ноға Хакасия пазының орынҷылары ам даа «тоғызын толдырчатхан» хозымнығ чӧрчелер? Виктор Зиминнің искіриинең, пу чағында прай ниме пӧгіл парар.
- Кем-де парыбызар, кемні-де албасха чӧп пирілген (сыныхтағ органнарынаң), - теен Хакасияның пазы. - Килер неделяда прай ниме пӧгіл парар, орынҷыларның 60 проценті алыс парар.
Ідӧк чоох парған республиканың хазна алымынаңар. Хакасияның пазы Виктор Зиминнің таниинаң, хайда тиліс пар, анда ӱзӱрлирге чарабас. Республика, тізең, халғанҷы чылларда чахсы тиліс кӧзіткен, тӧреміл ӧс турған. Пір ле хати, хаҷан 2013 чылда тилекейде алюминийге паза хара тасха паалар тың тӱс парған, республика парыстарын илееде чідір салған. Паза республика суға паза ӧртке кірген, Сойан-Сус ГЭС-тағы саайдаңар ундирға чарабазох. Ағаа хоза, тиліс парда, хорадығлар ідӧк ӧзіп турча. Аннаңар республиканың хазна алымы пілдірте ӧс парған. Че хайди таныхтаан Виктор Зимин, республиканың ӱлгӱлері ол сурығны пӧгерінҷе тоғыс апарчалар, хазна алымы кӧместең хызырылча.
«Хабар» газетаның ӧӧн редакторы Радион Сунчугашев, кічіг, ыраххы аалларны хайраллирынҷа паза тилідерінҷе программаның тузазын таныхтап, Хакасияның пазына сурығ пирген:
- Нинҷе ӱр тоғынар ол программа?
Виктор Зимин нандырған:
- Сӧс пирчем, мин Хакасияның пазы полғанҷа, ол программа тоғынар.
Республика устағҷызы таниинаң, аалдағы чуртағҷылар, аал хонииндағыларох чіли, аал хонии ас-тамаан сығарчалар, андағох улуғ тоғысты толдырчалар. Аннаңар оларға хайди даа хабазарға кирек. Ағаа хоза, ол программа аалдағыларны тоғысха кӧӧктірче, салтарында аалларда тоғыс чохтарның саны 60 процентке хызырыл парған.
- Че иң ӧӧні - піс аалларны, андағы культураны хайраллапчабыс, - таныхтаан Хакасияның пазы.
Регион устағҷызы ідӧк дачниктерге хабазарға киректелчеткенінеңер чоох апарған. Виктор Зимин «Минсуғдағы помидор» ӱлӱкӱнге атархапчатханынаңар чоохтаан. Нӧӧс Хакасиядағы помидорлар уйаннар? Чох. Че минсуғдағылардаң амды ол брендті пылап полбассың, аннаңар, республика пазының кӧрізінең, Хакасияа мында постың таниин тілирге киректелче. Аның ӱчӱн дача культураларынҷа изерістіре мероприятиелер иртірерге кирек: «Иң чахсы мӧӧт», «Иң чахсы ӱгӱрсӱ» паза аннаң даа пасхазы.
Автор :
Альберт ТОЛМАШОВ Сом Максим АХПАШЕВТИ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде