КӀЗӀ ЧУРТАЗЫ ИҢ ААРЛЫҒ
Республиканың правительство туразында сағыбаан саайларҷа комиссия чыылии ирткен. Аны Хакасия пазы орынңызының тоғызын толдырчатхан Владимир Крафт апарған.
Ӱр ниместе республика пазы Виктор Зиминнің чахиинаң Харатастағы, Ағбан пилтірі паза Боград аймахтарындағы котельнайларда сағыбаан саай салтарларын чох идерінӌе ӱгредіглер ирткен. Ӱгредіг хоостыра, городта чарытхы линиялары сайбал парған сылтаанда, чылығ пирӌең системада улуғ саай пол парған. Мында системаның тоғызы тохтадылбас ӱчӱн, кирек мероприятиелер толдырылча. Устапчатхан компаниялар паза топливо пирӌең организациялар пірге чахсы тоғынарға кирек. Ӱгредіг салтарлары устапчатхан компанияда чылығ пирӌең системаны хайраллап халар тоғысха кізілер саны читкіӌе нимезін кӧзіткен. Андағ улуғ саай пол парза, система сайбал парбас ӱчӱн, ізіг паза соох суғ тураларзар парчатханын табырах чабызарға киректелче. Орыннардағы ӱлгӱлер модульнай электростанциялар аларына чӧптезіглер идерлер. Устапчатхан компаниялар сағыбаан саай салтарларын чох идерінде хоза оңдайлар табарлар. Аннаңар дизель электростанцияларын тоғындырарынӌа хоза ӱгредіглер иртірері кӧріл парған.
Энергетика объекттерінде практика мероприятиезін иртірерінӌе «Хакасэнерго» предприятиенің тоғынӌылары араласханнар. Харатаста паза Боград аймаанда модульнай электростанциялар тузаланысха кирілген. Іди прай тоғыс тузында толдырылған. Ідӧк чарытхы пирчеткен организациялар тоғынӌылары, электросетьтерде сайбағ пол парған орынзар табырах киліп, саай салтарларын чох иткеннер.
Владимир Крафт дизель электростанцияларын орыннарзар тузында чи- тіреріне оңдайлар табарға чахығ пирген. Аннаң пасха, чылығ пирӌең система тооп парбас ӱчӱн, сағыбаан саай салтарларын табырах чох идерге кирек тіп таныхтаан. Ідӧк кізілер хараа-кӱнӧрте полчатхан объекттерге ӧӧн хайығ айландырарға чахаан.
Чыл пасталғаннаң республикада 497 ӧрт сыххан. Анда 30 кізі ӱреен, 20 кізі палығлатхан. Ӧрттер саны Алтай, Асхыс, Шира аймахтарында, Абазада, Сорығда ӧс парған. Профилактика тоғызы уйан апарылчатханы таныхталған. Абазада, Сорығда, Асхыс паза Ағбан пилтірі аймахтарында асхынах кізінең профилактика чоохтазығлары иртірілген. Алтай аймаанда ӧрт сыхпазына чарыдылған тоғыс чахсы апарылчатхан даа полза, ӧрттер саны ӧс парған. Ӧрттернің ӧӧн чардығы кізілер чурттарында сыххан. Улуғ частығларнаң профилактика тоғызы уйан апарылча. Аннаңар муниципальнай пӱдістерге пу тоғысты узарадарға, СМИ-ларда ӧрттер сыхпазына чарыдылған статьялар сығарарға, кӧп палалығ, чуға чуртапчатхан сӧбірелерге чурттарында ӧрт сыхханнаңар искірчеткен оборудование турғызарға чахаан. Хакасияның ГО, ЧС паза ПБ управлениезі орыннардағы пос устаныс органнарына профилактика тоғызын апарарынӌа полызығ пирер. КЧС кнезі, соохтар полғанӌа, ааллар ибіре чирні тартыбызарға паза, хазна учрежде- ниелерінде ӧрт сыхса, эвакуация тоғызын табырах иртірерінӌе мероприятиелер тимнеп саларға чахығ пирген.
Ідӧк чыылығда суғларда хорғыс чох поларын ӱзӱргеннер. Пӱӱл суға сомар тус хомай нимес ирткені таныхталған. Че, іди дее полза, чайғызын республикада нинӌеде кізі суғда саайланған. Владимир Александрович пазағы чайғызына суғлар хазында арачылағӌыларның хоза посттарын тӧстирге чахығ пирген.
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |