ГОРОДХА ТУЗА АҒЫЛАРҒА, ТӰЗІМНІГ ТОҒЫНАРҒА
24.10.2017
Хабарлар
Ирткен неделя тоозылчатханда, 20 октябрьда, Абаза городтың наа табылған пазы Валентина Филимонованың инаугурациязы ирткен. Абазаның Культура туразында ирткен пайрамнығ мероприятиеде Хакасияның пазы Виктор Зимин.
Ӧӧркі Чӧп кнезінің пастағы орынҷызы Юрий Шпигальских, республикадағы министерстволарның устағҷылары, город-аймахтарның пастары, халых пірігістерінің кізілері паза город чуртағҷылары араласханнар.
Валентина Филимонова сентябрьда ирткен табығларда ізестіг чиңіс тутхан - аның ӱчӱн город чуртағҷыларының 81,71 проценті ӱнін пирген. Анзы тиктең нимес, абазадағылар Валентина Николаевнаны чахсы таныпчалар, ол ӱр чыллар Абаза городтың администрациязында тоғынған. Пастап ӱгредіг пӧлии пастығы полып, анаң - город пазының орынҷызы, пастағы орынҷызы. Ідӧк Хакасия пазының администрациязында істенген, халғанҷы тоғызы Таштып аймаа пазының пастағы орынҷызы полған.
Абазаның наа устағҷызы должнозына кірчеткені кибірли Россияның паза Хакасияның гимннері толдырылғанынаң пасталған. Анаң табығлар салтарларынҷа наа табылған устағҷаа удостоверение читірілген соонаң Валентина Филимонова чыылысхан чон алнында присяга пирген.
Городтың наа пазын иң пурун Хакасияның пазы Виктор Зимин алғыстаан.
- Абаза городтың саблығ кибірлері, чахсы чоны пар. Мында хаҷан даа пастағҷы кізілер чуртаан. Рудникнең палғалыстығ сидіксіністер пісті прайзын хомзындырған, че піс сыдасхабыс, городты паза рудникті арачылап халғабыс. Че алнында ам даа улуғ тоғыс. Сірернің городыңар, Россиядағы кӧп нимес городтарның санында, алнында тиліҷең орын статузын алып алған. Ол сын чиңіс, анзынаң кӱннің сай чуртирға паза тоғынарға кирек, монопрофильностьты тобырып алар ӱчӱн. Тоғынарбыстар хада, республика позының саринаң прай кирек нимелерні толдырар, - таныхтаан регион устағҷызы алғыстастығ чооғында.
Ідӧк Хакасияның пазы Виктор Зимин, Валентина Филимонованы тӱзімніг тоғысха алғап, Абазадағы олған туразына, анда 200 артиинаң кізі тоғынча, теңмеске чахығ пиргем тіп искірген. Ол искірігні город чуртағҷылары айа сабызынаң удурлааннар.
Хакасияның Ӧӧркі Чӧп кнезінің пастағы орынҷызы Юрий Шпигальских позының алғыстастығ чооғында Абазаның хайхастығ сарин таныхтаан.
- Сірер прайзы удур-тӧдір таныссар, Абаза - ол улуғ сӧбіре, хайда прайзы удур-тӧдір сағыссырапча, - теен Шпигальских. - Ол сӧбренең мындағ чахсы ипчі кізі устиры мині ӧріндірче.
«Абазадағы рудник» ООО-ның директоры Александр Жуков республика правительствозының, предприятиенің, город ӱлгӱлерінің паза Хакасия пазы Виктор Зиминнің пірге тоғызы рудникке, ідӧк тиксі Абаза городха, наа тиліс пиргенін таныхтаан. Ол улуғ тоғыстың салтарларының пірсі рудникке наа техника алылчатханы полча. Наа техника «ЕВРАЗ» компаниянаң хада иділген чӧптезігҷе алылча. Хайди искірген Жуков, 700 муң евроға турчатхан пастағы буровой машина рудниксер чит килир. Ікінҷі буровой машина Индіркі Новгород хыринда килчеттір. Рудниктің устағҷызы наа мэрге табылған Валентина Филимонованы чахсы устағҷыны чіли таныпчатханын таныхтаан паза ол, Абаза городха туза идіп, тӱзімніг тоғынарына ізенізін читірген.
Алғыстастар соонаң Валентина Филиминова, чоох тудып, городха туза ағыларға, аны тилідеріне пар кӱзін саларға молҷаан. Инаугурация пайрамнығ концертнең тоозылған. Концертте ниме чапсытхан? Хакас кип-азахтығ саңай орыс палалар хакас теелбектерін толдырғаны. Орыс чоннығ Абазада хакас культуразына, кибірлеріне хайығ саларға кӱстеніс иділчеткені ӧріндірче. Мында Хакасияның пазы Виктор Зиминні махтирға кирек, ол тӧреміл прай устағҷылардаң хакас чонына, пістің национальнай культураа хайығ саларға хысча нооза.
Автор :
Иван ТИННИКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде