ОЛАРНЫҢ ТОҒЫЗЫ НАНДЫРЫҒЛЫҒ
27.10.2017
Хабарлар
АМҒЫ ТУСТА ИРЕННЕР ПИЛЕН ТОҒЫС САҒЫПЧАЛАР ТІПЧЕТКЕННЕРІН УДАА ИСТЕРГЕ КИЛІСЧЕ. АНЗЫ ПОЛАРОХ, ЧЕ КӦБІЗІ ТОҒЫНЧА. АНДАҒЛАРНЫҢ ПІРСІ ЕВГЕНИЙ КИЛЬЧИЧАКОВ ПОЛЧА.
ЕВГЕНИЙНІ МИН ХАҶАННАҢ ТАНЫПЧАМ. ОЛ ШКОЛАДА ӰГРЕНГЕН ТУСТА АНДА АВТОДЕЛО УРОКТАРЫ ПОЛҶАҢ, ОЛҒАННАР, ВОДИТЕЛЬ УДОСТОВЕРЕНИЕЗІН АЛЫП, ТОҒЫСХА ТИМДЕ ПОЛҶАҢНАР.
Ирткен тусты сағысха киріп, мына ниме чоохтапча Евгений Константинович:
- Школада ӱгренчеткенде, автоделоға чӧрҷеңміс. Анаң экзаменнерге Асхыстағы олтырыхсар аймахтың прай школаларынаң ӱгренҷілерні чыып алғаннар. Ол син паланы хайди прайзын сыныхтап аларлар тіп сағынғам. Ол туста піске тіпчелер: иң артых ӱгренҷіні таап алыңар, ол сірернің ӱчӱн экзамен тудар. Экзамен чахсы тудыбысса, прайзына - удостоверение, хомай тудыбысса - постарың пілчезер. Пістің школадаң Андрей Шмидтляйн экзамен тутхан.
Школа соонаң армияа хабылғам, служба соонаң института ӱгренгем, чӱрееме чатпаан, тастабысхам. Пабам ол туста Асхыстағы имнег туразында ӧӧн имҷі полған. Мин анда, тоғысха кіріп, «табырах полызығ» машина водительі полғам. Минің А, В, С категориялар полған. Чал ахчазын водительлерге класс ӱчӱн тӧлеҷеңнер. Минің ӱзінҷі класс полған. Андада мин автобуснаң чӧрҷең паза прицеп сӧӧртеҷең категориялар азып аларына ӱгренгем.
Тоғызон чыллар - ахчанаң сидік тус, чал ахчазын тӧлеп полбинчатханнар. Мин, сменаны тоғыныбызып, мороженай садып пастаам. Мороженайға Ағбанзар пабамның иргі ВАЗ-2102 машиназынаң чӧрҷеңмін. Ағбанға теере пассажирлер алып алҷаңмын. Ідӧк тоғынарҷыхпын неке, че смена соонаң Ағбанзар пар киліп, ибде мороженай сатчатхан туста пурнымнаң хан ағыбысчаң. Мороженай садарын тохтатхам. Амға теере таксиде тоғынчатхан поларҷыхпын, че «Газель» машиналар чӧріп пастабысханнар. Оолларға тіпчем: ӧменең пірее «Газель» алып алалар. Прайзы сым. Кирек киліспеен. Андада мин чалғызан ол кирекке тыыныбысхам. Маршрут азар ӱчӱн, республиканың транспорт паза чол хонии министерствозынзар айланғам. Минің пічіктерім чарым чылҷа кӧрілген.
Микроавтобус парда, Асхыс посёлоктаң Ағбанға теере маршрутча чонны тарт чӧрерге чаратханнар. Олох туста рыноктағы идінҷектер Новосибирсксер товарға чӧрҷеңнер. Мин оларны тарт сыххам. Микроавтобуста пис кізее паза товарға ла орын полған. Товарға парҷаң кізі кӧп. Андада мин Каскар туңмама тіпчем: киреең чап. Ол іпек идіп сатчатхаң кирее дее тың на айныбинчатхан. Ол прай оборудованиезін садыбысхан.
Находказар парып, сала улуғ «Хино» автобус садызып алғабыс. Анда кондиционер, телевизор полған. Туңмамнаң хада идінҷектерні Новосибирск, Хызылчар городтарзар тарт чӧріп пастаабыс. Сағынғам, пірее он азыра кізі пол турар, че 7-8 ле кізі апарарға килісчең. Садығҷылар ӧӧнінде ипчілер полған.
Андада маршрутнаң сала оой полҷаң. Новосибирсксер алай пасха чирзер парарға итсең, Ағбанзар диспетчерге автобус маршрутха сыхпас тіп искірібісчезің. Идінҷектердең пасха, туристтерні тартарға килісчең. Пасха хан чирінең килген туристтерні Тыва чирінзер удаа ал чӧрҷеңмін.
- Евгений, ол тустарда чолларда тонағҷылар хайынҷаңнар, олар сағаа тоғаспааннар ба? - сурығ пиргем ағаа.
- Худайнаң хайди-да чолларда тоғаспааннар. Новосибирсктегі базада чӧрҷеңнер. Че піс, водительлер, кӧп полҷаңмыс, аннаң-мыннаң машина толдыра, прайзы хости турғлапча. Ӧмелесчеңміс.
Че чолда пірее хынығ ниме пол парча. Пірсінде Асхыссар чит килгебіс, азынада чоохтазып алғабыс, пурнада Асхыс станциядағыларны иблерінзер апар саларға, анаң - асхыстағыларны. Руль кистінде туңмам полған, мин узубыстырбын. Кинетін исчем: «Аҷаа, кӧр, чол ортызында кресло турча!» Усхун чӧрібіскем. Асхыстаң тоғыр, аал ибіре парчатхан чолдабыс. Алныбыста кресло турча. Тӱзіп, аны чол тастына сӧӧртеп салдыбыс, автобус ізиине сыңминча. Аннаң андар парчабыс. Хурчағ чолны иртібіскенде, алныбыста диван турча. Чолдаң хыйа сӧӧртеп салдыбыс. Таарлағ машиназынаң тӱскен полар тіп чоохтасчабыс. Хыстарны тӱзірібіскебіс. «Хино» микро-автобусха одырыбыстыбыс, аның соондағы ізіктері азылчалар. Диван турған чирзер читтібіс. Пір табан, диванны «КамАЗ» машинаа таарлап, сірен парча. Піс ағаа пу пістің диваныбыс тіпчебіс. Пу оол пір дее таласпады, машиназына одырған, чӧрібіскен. Итсе, ол диван-креслонаң тузаланмаабыс таа.
- Автобустарны удаа алыстырарға килісче теезер. Ноға? - тӱптестіріп сурғам.
- 5-6 чыл мының алнында наа чарадығ алылған. Аны хоостыра, маршрут алып алар ӱчӱн, марығ (тендер) иртіп аларға кирек Анда прай ниме балларнаң саналча. Кӧзідімге, чолда сайбағ иткезің ме, чох па. Ноға маршрутха сыхпин салғазың? Ідӧк автобустың сыххан чылы, кӧрімі, хурлар, кондиционер пары прай санға алылча.
Автобуснаң ӱс чыл тузаланып алзаң, аның паазы саңай тӧбін тӱс парча. Автобусты ниик ле паанаң садарға килісче. Че ӱс чылға автобус позының паазын айландырған тиирге сидік. Аннаңар хыйға табаннар пір-ікі чыл пазынаң автобустарын алыстырып одырчалар.
Мына минің ікі микроавтобус: «Форд» паза «Газель». «Форд» ізестіг чӧрче, че пірее нимезі, уламох двигательі сайбал парза, Ағбанзар тыхтадарға апарчам, ол прай электрикадаң иділ парған. «Газель», тізең, ол саринаң маңат, позым тыхтап алчам.
Мин ам водитель, олох туста механик, слесарь, администратор полчам, машинаны рейске сығарчам, ідӧк прай бухгалтерияны апарчам. Тоғысха водитель алып аларҷыхпын, че килістіре кізі табылбинча. Чииттер істенерге хынминчалар алай тоғынар сағыстары пар, че водитель удостоверениезі чоғыл. Улуғларның анзы пар, че олар пір-ікі чыл пазынаң тынаға сых парарлар.
Асхыс станциязында Татьяна Петрова чуртапча, ол олғаннарнаң хада Сойан, Ырғах тағларынзар чӧредір. Пастап оларны апар салҷаңмын, сах андох айланыбысчаңмын. Пірсінде ол Ырғах тағларзар сых пар килгем. Ол сыынаң тағлар хайди-да мині постарынзар тартчатханға тӧӧй, тағҷа, хайа-тастарҷа чӧр килчем. Пеер инзе, кізі істі хайди-да алыс парчатханға тӧӧй Хобби теен ниме ол полбас па? Итсе, машинадаң чахсы пасха ниме пілбинчем. Пасха тоғысха парыбызарға итсе, ӱгренерге кирек, минің, тізең, ам андағ час нимес. Тынаға парғанҷа, чонны тартарбын. Чооғымның халғанҷызынзар прай автомобилисттерні ӱлӱкӱннең алғыстапчам.
Евгений Константинович сидік чылларда, холын пос салбин, устағ-пастаанаң ахча кілен чӧрбин, пос киреен пастаан. Аннаңар Евгений Кильчичаков чуртастың сидік оңдайларына хоптанарға хынчатхан улусха чахсы кӧзідім. Маршрут азып, чонны тарт чӧрче, налог тӧлепче, сіренче. Сағам ағаа очы оолғы паза Валерий Саражаков полысчалар.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде