ТИЛЕКЕЙ ЧИИТТЕРІНЕ ТІЛ ДЕЕ, ПОЛИТИКА ДАА ХАРЫҒ ПОЛБИНЧА
31.10.2017
Хабарлар
СОЧИДЕ ТИКСІ ТИЛЕКЕЙДЕГІ ЧИИТТЕРНІҢ ПАЗА СТУДЕНТТЕРНІҢ XIX ФЕСТИВАЛЬЫ ТООЗЫЛДЫ. АНДАР ХАКАСИЯДАҢ ПАРҒАН ЧИИТТЕР, ИБЗЕР АЙЛАНЫП, ФЕСТИВАЛЬ СООНДАҒЫ САҒЫСТАРЫНАҢ ӰЛЕСКЕННЕР.
ТАНЫХТИРҒА КИРЕК, ФЕСТИВАЛЬҒА ХАКАСИЯДАҢ 25 АРАЛАСЧЫ ПАЗА 11 ВОЛОНТЁР ПАРҒАН. ОЛАР АНДА ХАЙДИ ЧУРТААННАРЫНАҢАР, НИМЕ КӦРГЕННЕРІНЕҢЕР ПАЗА КЕМНЕҢ ТОҒАСХАННАРЫНАҢАР ЧООХТААННАР. ФЕСТИВАЛЬ АРАЛАСЧЫЛАРЫ АНДА 14 - 22 ОКТЯБРЬДА ПОЛҒАННАР.
Сочидең айланғаннар прайзы даа чахсы кӧңніліг паза хабарҷыларнаң чоохтазарға азых полғаннар. Чоохты пастаан Хакасия чииттерінің киреенҷе хазна комитедінің кнезі Ирина Церковная.
- Тилекейдегі чииттернің паза студенттернің фестивальы - уғаа танығлығ мероприятие. Ол Россияның чииттер политиказына ла нимес, тиксі тилекейдегі чииттерге улуғ хозым ағылған. Фестивальның ӱгредігліг площадкаларында 30 муң азыра чиит улус араласхан. Аннаң пасха, 8 муңа чағын волонтёр кӱннің сай, чахсы кӧңнілерінең ӱлезіп, прайзына ӧрініс ағылҷаң. Олар араласчыларға аймах мероприятиелердеңер искірҷеңнер. Таныхтирға кирек, пістің волонтёрларыбыс иң артыхтарның санында полғаннар, - чоохтаан Ирина Церковная.
Пістіңнер, сизінгенде, анда тың пасхалалғаннар. Сочиде олар фестивальға ӧнетін тігілген киптіг чӧргеннер. Аннаңар прай аалҷылар Хакасиядаң килгеннерні ырахтынох танып салҷаңнар. Пістің чииттерібіс фестиваль аалҷыларын хакас культуразынаң таныстырғаннар, оларға республикабыстаң апарған холға кисчең чазанҷыхтарны сыйлааннар. Кӧп чоннаң танызып, олар пасха хан чиріндегілер Хакасияа чолабит читірчеткеннерін видеоға пазып алтырлар. Он кӱн аразына андағ чолабиттер кӧп чыыл партыр.
Фестивальда аралазып, прайзы даа хайдағ оларға оң полғанын сизінген. Аннаңар пос туста прай чирде пол килерге кӱстенгеннер. Полғаны ла аймах проекттерде араласханын таныхтаан. Мында прайзы кӧңніне килістіре ниме тапхан. Программа аймаа уғаа пай полған. Спорт, культура, ӱгредігліг площадкалар кӧрімнері хоостыра хоза площадкаларға чарылғаннар: экологияа, экономикаа, ӱгредіге, архитектураа, дизайнға, робототехникаа, теелбектерге... Ідӧк саблығ кізілернең тоғазығлар, концерттер полғаннар. Хайди араласчылар таныхтааннар, фестивальның прай площадкаларында пол килерге оңдай чох полған.
Виктория Ерофеева прай хынығ орыннарда пол килерге сірентір, че аның ӧӧн пӧгіні саблығ Ник Вуйчичнең тоғазып алары полған. Андағох пӧгінніг кізілер фестивальда уғаа кӧп полтыр. Аннаңар, саблығ ораторнаң тоғазып алар ӱчӱн, Викторияа 6 час иртеннең ікі муң азыра чонның аразында теесте турарға килістір. Ник Вуйчич хол-азах чох тӧреен, че, андағ даа полза, ол чуртассар чарых кӧрізінең прай тилекейге саблан парған.
- Аның чооғын искен соонда, кізі позының чуртазынзар пасха кӧріснең кӧріп пастапча. Ол кізее позын піліп аларға полысча. Аны истіп, залдағыларның прайзы ылғаан, іди чӱрекке теерте чоохтанча ол, - сағыстарынаң ӱлескен Виктория. - Анда пол киліп, минің дее кӧңнім алысхан, кӱс тее хозылған осхас. Ибзер уғаа кӧп пӧгінніг айланғам, хайзыларын амох толдырып пастирым килче.
Ӧӧн программалардаң пасха, ідӧк аймах марығлар, флешмобтар полғаннар, хайзыларында хыринҷа иртчеткен олаңай кізілер араласханнар. Мындох чарир полған посты ГТО нормативтерін толдыр полчатханын сыныхтирға. Аны хоостыра чоохтаза, Хакасиядаң парған араласчы Денис Козлов «Тиксі тилекей ГТО-зы» площадкада ікі муң азыра араласчы аразында ӧнетін тимненіс чох чирдең кӧдірінерінҷе иң артых полыбысхан.
Асхыс аймааның чииттер киреенҷе ӧӧн специализі Ольга Бытотова, ідӧк ГТО нормативтерін чахсы толдырып, ӧнетін значокнаң таныхтатхан. Ол аны пос тузында иртерге маңнанған. Ідӧк волонтёрыбыс пос туста саблығ хоккеист Вячеслав Фетисовха тоғасханынаңар піске чоохтаан. Аннаң сомға суурынып, автогравын алған. Че прай чирде пол килер сағыстығ кізее фестивальда тус асхынах полған.
- Прай чирде полып аларға сағынғам, че мин ідӧк волонтёр тоғызын толдырғам нооза. (Фестиваль араласчыларына хайда ниме поларынаңар искіргем. Мин иң хынығ паза чиит площадкада - Скейт-паркта - волонтёр полып тоғынғам, - тіпче Ольга Бытотова. - Ол - наа спорт кӧрімі, хайзы ам на Олимп ойыннарының марығларына кирілген. Площадканың ӧӧн чарғыҷызы иң саблығ скейтбордист Стив Берра полған. Ол скейтбордингті, орамалардаң сығарып, мындағ пӧзік синге кӧдірген.
Пу площадкада тилекейге саблан парған тренерлер мастер-класстар кӧзіткеннер. Полған на кізі олардаң чӧп алар оңдайлығ полған. Араласчылар, тізең, ӧнетін велосипедтернең, самокаттарнаң, скейттернең уғаа ус паза хал тудынғаннар. Мындағ спорт кӧрімі пістің волонтёрыбысты тың чапсытхан.
Ольга Бытотова 500 артых волонтёрлар санына кір парған. Хайди ол таныхтаан, пасха хан тілін чахсы пілбезе дее, араласчыларнаң ниик тіл алысчаң, хайда орыс тілінең чоох апарҷаң, хайда англия тілінең, хайда салааларнаң даа. Тіл мында ӧӧні полбаан, анзын прай даа араласчылар таныхтааннар. Фестивальға аймах-пасха хазналарның чииттері килгеннер. Оларның полғанының на позының киртінізі, кибірлері, тудынчатхан оңдайы, че фестивальда олар прайзы пір чон полғаннар - тилекейнің палалары. Оларға ынағлазарға политика даа, тіл дее харығ полбаан.
Ирина Церковнаяның чооғынаң, ол ӧӧнінде чииттер политиказынаң тоғынчатхан устағҷыларнаң істенген, че нинҷе-де кӱн аразына ол даа устағҷылар прайзынаң пірге пол парғаннар. Прай хырығлар чох пол парғаннар тиирге чарир. Устағҷылар паза Зимбабведегі студенттер пір стол кистінде нанҷылар чіли одырғаннар. Амды Хакасиядағы чииттернің арғыстары аразында сербтер, немецтер, индустар, албанецтер паза даа кӧп пасха нанҷылар пар.
Чоох чоғыл, фестиваль прайзына тузалығ ирткен. Іди Юлия Ворошилова теелбекчі Егор Дружининнің теелбектерҷе мастер-клазында паза Россияның пасха ханнар киректерінҷе министрі Сергей Лавровтың лекциязында полған. Дмитрий Черных, бизнес ойыннарында аралазып, фристайл-баттлда чайаачы узынаң сынасхан.
Таныхтирға кирек, Тиксі тилекейдегі чииттернің паза студенттернің пастағы фестивальы 1947 чылда Прагада ирткен. Ол «Чииттер амыр чуртас ӱчӱн» темаа чарыдылған. Андада фестивальда 71 хазнадаң 17 муң кізі араласхан, пӱӱл, тізең, ол 188 хазнадаң 30 муң чиит улусты чыған. Пу фестивальда амға теере мындағ кӧп чон араласпаан полған. Пістің чииттерібіс анда пол килгеннеріне уғаа поғдархапчалар.
- Тиксі тилекейдегі фестивальда араласханы - ол полған на кізее улуғ кирек. Мындағ алғым мероприятиені пос хараанаң кӧрерге паза хаҷан оңдай полар, - таныхтапча Ольга Бытотова. - Аннаңар пу фестиваль сағыста хаҷанға даа халар.
Автор :
Екатерина ИНДЫГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде