РЕСПУБЛИКАА 9,6 МИЛЛИАРД САЛКОВАЙ ПИРІЛЕР
08.11.2017
Хабарлар
Хакасияның пазы Виктор Зимин, тоғыс хоостыра Москвада полып, федеральнай ӱлгӱ органнарында ирткен тоғысчы тоғазығларның ӧӧн салтарларынаңар чоохтап пирген. Ӏдӧк республика устағҷызы вице-премьер Дмитрий Козак иртірген Россия правительствозыңдағы регионнар тилізінҷе комиссияның чыылиинда алылған чарадығлар хоостыра сағыс-кӧрізінең ӱлескен.
Ӧӧн салтарларның пірсі, хайди чоохтап пирген Хакасияның пазы Виктор Зимин, республикаа федеральнай бюджеттең 9,6 миллиард салковай ахчалығ полызығ пирілері.
- Ахча сині хайдағ полардаңар мин пілгем, Хакасияа ахчалығ полызығ пирердеңер чӧптезігліг комиссияда ол сан чарадыға алылған. Пӱӱн халғанҷы ӱзӱріг полған, хайда Россияның финанстар министерствозынаң пірге тоғынҷаң паза регионнарның бюджеттері тоғызын тӱзімніг идер прай оңдайлар кӧрілген, - таныхтаан Виктор Зимин. - Сан, хайзын піс арачылап алғабыс, уғаа улуғ, мының алнында андағ сан полбаан.
Регион устағҷызы республика чуртағҷылары адынаң ол хабазығ ӱчӱн Россия президенті Владимир Путинге паза Россия правительствозына улуғ алғызын читірген.
Хакасияа пирілчеткен ахчалығ полызығ сині иң улуғ - 9 миллиард 640 миллион салковай, - таныхтаан Хакасияның пазы. - Пасха регионнарға 2-3 миллиардча ла салковай полызығ пирілер. Ағаа хоза піс аның алнында 6 миллиард салковай полызығ алып алғабыс. Тиксі 16 миллиардха чағын салковай пол парча.
Республика устағҷызы искіриинең, федеральнай бюджеттең пирілчеткен ахча коммерческай кредиттерні алыстырарына парар. Салтарында республика 2 миллиард 400 миллион салковай ӱзӱрлеп алар, ол ӱзӱрлелген ахча регионның чуртас-экономиказын тилідеріне парар.
Олох туста Виктор Зимин амды республиканың алнында улуғ пӧгін турчатханын таныхтаан - обязательстволарны толдырары.
- Анзына чахсы арах тоғынарға кирек, кізілернің чуртазын улам чахсыландырарға, тоғыс чохтарның санын хызырарға паза пасха даа кӧп нимелерні, хайзын піс толдырарға кирекпіс, - теен Хакасияның пазы.
- Пу прай нимелер ӧӧнінде орындағы толдырығлығ паза закон сығарҷаң ӱлгӱлердең палғалыстығ. Аннаңар чахсы законнар тимнирге, ол законнарны толдырарға, пӱдірерге паза инвестициялар тартарынҷа тоғынарға кирек.
Республика пазы Виктор Зимин ідӧк вице-премьер Дмитрий Козак иртірген регионнар тилізінҷе комиссияның чыылии тузында хайзы налогтарны нандыра регионнарға пирердеңер чӧптер искірілгенін таныхтаан. Че сағам ол сурығҷа чарадығ алылбиндыр, тоғыс узарадылча осхас.
Республика пазы, чооғын тоозып, федеральнай ӱлгӱлердең тоғынарында араласханнарға прайзына алғызын читірген, регионның финанстар министерствозына, Хакасияның депутаттар корпузына паза даа пасхазына.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде