ХАРА TAС ӰЗІГІ ЧОХ ТАРТЫЛЗЫН
10.11.2017
Хабарлар
Хакасия Пиидегі хара тастығ орынны тоғындырып пастааннаң, чылдаң чылға хара тас аниры ӧскірілче. Пӱӱл республикада 2016 чылның кӧзідіглерінең 3 миллион тоннаа кӧп анылары кӧріп парған, че чыл тоозыларына 1,5 ай ла халған, разрезтердең сығарылған хара тас, тізең, ирткен чылдағы пуох тустың кӧзідіглерінең асхынах. Чыл тоозылғанҷа кӧрілген хоза 3 миллионны толдыр полбазына хорғыс пар. Аннаңар Хакасия пазы Виктор Зимин хара тасты тохтағ чох тартарынҷа чыылығны иртірген, хайда разрезтернің паза тимір чол устағ-пастаанаң хада, ӧӧн сидіксіністерні ӱзӱріп, оларны пӧкчең оңдайлар табылған.
Хакасия пазы Виктор Зимин сурығ разрезтерге ле нимес, республикаа даа уғаа ӱрегліг полчатханын таныхтаан:
- Анылған хара тас чыылча, разрезтерге дее читіре парыстанарға пирбин, республика бюджедіне дее налогтарны толдыразынаң чыырға пирбин, хайзылары республикаа уғаа кирек!
Республикадағы разрезтер пӱӱнгі кӱнге ирткен чылдағызынаң 2,7 миллион тоннаа кӧп хара тас анып салғаннар, че оларның 200 муң тонназы ам даа складтарда чатча. Хара тасты тартарынҷа сидіксіністерні хайзы даа сари вагоннар чидіспинчеткенінең палғалыстырча. Кӧзідімге, пу тусха хара тасты тартчатханнар 3479 вагон хара тас читіре сығарбааннар. Ол пу чылға кӧрілген синні толдырарға читпинчеткен 250 муң тонна хара тасха тиңнелче. Тимір чол станцияларын алза, кӧбізінде разрезтернің чахығлары толдыразынаң иділбеені сығысхан. Чыл тоозылғанҷа «Ӱр нимеске тузаланыс пӧлии» ОАО сигіс муң вагон алып алар, андада хара тасты тартарға сала ниик полар.
Олох туста Виктор Зимин республика хара тасты анирын чылдаң чылға ӧскірердеңер пӧгін турғызылғанына хайығ айландырған. Килчеткен чылда хара тас пу чылдағызынаң нинҷе-де миллион тоннаа кӧп аныларға кирек. Аннаңар пӱӱнгі сидіксіністерні амох пӧгерге киректеен ол. Сидік сурығны пӧгерінҷе ӧнетін тоғысчы ӧме тӧстелер, хайзынаң устир республика пазының пастағы орынҷызының тоғызын толдырчатхан Олег Нам. Тоғысчы ӧмее ідӧк транспорт паза чол хонии министрі Александр Попов, разрезтер паза тимір чол кізілері кірер.
Пу сурығны табырах пӧккені Хакасияа Хызылчардағы экономика форумында транспорт инфраструктуразын тилідерінҷе проектті турыстыра кӧзідерге полызар. Чоохтирға кирек, пу проект ідӧк Пиидегі хара тастығ орынны тилідеріне теелче. Анылған хара тасты разрезтердең тартарға мыннаң мындар уламох чахсы оңдайлығ тимір чоллар киректелер. Чоох парча Сибирьдегі тимір чол магистральының ӱстӱнзархы чардығында транспорт инфраструктуразын тилідерінеңер. Ол кирексіністі республика ӱлгӱлері азынада паалааннар паза федеральнай синге сыхханнар. Проектті чуртасха кирерінҷе ам даа улуғ тоғыс апарарға киректелче.
Проектті чуртасха кирерінде ӧӧн инвестор «Россияның тимір чоллары» ОАО полча, хайзы 2017 - 2019 чылларда Междуреченск - Тайшет чолны алғыдарына 46 миллиард салковай хорадар. Ол, тізең, пістің республикаа хоза тимір чол тахтазын пирер, Хоных, Хамыстығ паза пасха станцияларны алғыдар.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде