ПРАЙ ПАСТААН КИРЕКТЕРӀҢ КИЛІС ТУРЗЫН
13.12.2017
Хабарлар
КИҶЕЕ, РОССИЯ КОНСТИТУЦИЯЗЫ КӰНІНДЕ, ПРАВИТЕЛЬСТВО ТУРАЗЫҢДА ПАЙРАМНЫҒ ЧЫЫЛЫҒ ИРТКЕН. ХАКАСИЯНЫҢ ПАЗЫ ВИКТОР ЗИМИН РЕСПУБЛИКАДАҒЫ ШКОЛАЛАРНЫҢ ӰГРЕДІГДЕ ПӦЗІК ЧИДІГЛЕР КӦЗІТЧЕГКЕН ӰГРЕНҶІЛЕРІНЕ РОССИЯНЫҢ ГРАЖДАНИНӀ ПОЛЧАТХАНЫН ТАНЫХТАПЧАТХАН ПАСПОРТТАР ЧИТІРГЕН.
КИБІРГЕ КІР ПАРҒАН МЫНДАҒ МЕРОПРИЯТИЕ ЧЫЛ САЙ КОНСТИТУЦИЯ КӰНІНДЕ ИРТІРІЛЧЕ. ПАСПОРТТЫ 14 ЧАС ТОЛДЫР САЛҒАН ООЛ-ХЫСТАР АЛЧАЛАР, ЧЫЫЛЫҒДА ОЛАРНАҢ ХАДА ПАБА-ІҶЕЛЕРІ ПОЛҒАННАР. ЧУРТАСТА ПІР ХАТИ ПОЛЧАТХАН МЫНДАҒ ПАЙРАМДА ӰГРЕНҶІЛЕР СТОЛ КИСТІНДЕ ЧӰРЕКСІНІП ОДЫРҒАННАР.
ЧЫЫЛЫҒДА ІДӦК ХАКАСИЯ ПАЗЫНЫҢ ОРЫНҶЫЗЫ ИРИНА СМОЛИНА, РЕСПУБЛИКАНЫҢ ӰГРЕДІГ ПАЗА НАУКА МИНИСТРІ ЛАРИСА ГИМАЗУТИНА, МВД МИНИСТРІНІҢ ТОҒЫЗЫН ТОЛДЫРЧАТХАН СЕРГЕЙ РОМАШОВ, ТАБЫҒ КОМИССИЯЗЫНЫҢ КНЕЗІ АЛЕКСАНДР ЧУМАНИН (АНЫҢ ХЫЗЫҶАА ІДӦК ПАСПОРТ АЛҒАН), ХАКАСИЯҶА МВД-ның МИГРАЦИЯ СУРЫҒЛАРЫНҶА УПРАВЛЕНИЕ ПАСТЫҒЫ ЭДУАРД ФЕЛЬДЕ ПАЗА ДАА ПАСХАЗЫ АРАЛАСХАННАР.
Виктор Зимин ӱгренҷілерні, оларның паба-іҷелерін танығлығ кӱннең алғыстаан:
- Пӱӱн, 12 декабрьда, хазна ӱлӱкӱні - Россияның Конституция кӱні таныхталча. Мин пайрамнығ чыылыға килген полған на кізіні ӱрге сағыста халар мероприятиенең алғыстапчам. Мындағ пайрамнығ чыылығ правительствода чыл сай иртірілче. Мында поларға прайзына ӱлӱс тӱспинче, постарының ӱгредіг учреждениелерінде, олимпиадаларда, спортта, чайаачы тоғыста школадағы пос устаныста пӧзік чидіглерге читкен ӱгренҷілер пеер килгеннер.
Сірерге чидіглеріңнең поғдархирға кирек, сірернің пӧзік чидіглерің чох школалар даа чахсы кӧзідімнер кӧзіт полбасчыхтар. Мында полар правоны сірер постарыңның чидіглеріңнең алып алғазар. Сірерге мин ӱгредігде, тоғыста, чуртаста сыбыра иң артых поларға кӱстенерге алғапчам. Сірернің чуртазыңар ам даа уғаа узун полар, прай ниме сірернің алныңарда. Киртініңер мағаа, сірер тилекейдегі иң чахсы хазнада, иң чахсы регионда, иң чахсы сӧбіреде чуртапчазар. Пӱӱнгі пайрамда сірернең хада ӱгредіг паза наука министрі, МВД министрінің тоғызын толдырчатхан кізі, паба-іҷелерің. Сірер иң чахсы ӱгренҷілерзер. Иң чахсы полчатханыңарнаң уйатпаңар, тӧдір пазынмаңар.
Пеер килер ӱгренҷілерні мин таллабаам. Ӧнетін комиссия тӧстелген, ол комиссия сірерні таллап алған. Мин сірерге паба-іҷелеріңнең, арғыстарыңнаң, ӱгретчілеріңнең чахсы хайызығлар алғапчам. Хакасияны, Россияны чахсы чуртадарға прай кӱзіңерні салыңар, прай пастаан киректерің киліс турзын
Алғыстастығ чооғын тоозып, Виктор Зимин ӱгренҷілерге оларның чуртазында ӧӧн документ полчатхан паспорттар читірген. Полған на оол-хысха алынҷа алғыстас сӧстері чоохталған. Паспорттар алған иң чахсы ӱгренчеткеннернің аразында полғаннар Марина Кокова (Хубачардағы ортымах школаның ӱгренҷізі), Мария Боргоякова паза Денис Канзычаков (ікізі Н.Ф.Катановтың адынаң Хакас национальнай гимназия-интернаттың ӱгренҷілері).
Паспорттар читірілген соонда, Виктор Зимин прайзын пазох танығлығ кӱннең алғыстаан. Хайди ол таныхтаан, мындағ мероприятие Россия президентінің чахиинҷа иртірілче. Владимир Путин чахсы ӱгренчеткен прай ӱгренҷілерге паспорттар читірерге маңнанмас, аннаңар ол губернаторларға андағ чахығ пирче.
Ӱгренҷілерні ідӧк алғыстааннар Лариса Гимазутина паза Ирина Смолина. Ирина Геннадиевна прайзын, школа тоосса, республикада тоғынарға халарға сурынған. Устағҷылар прайзын Конституция кӱнінең алғыстааннар.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде