ХЫСХЫНЫҢ ХАЙХАСТЫҒ СЫЙЫХТАРЫ
13.12.2017
Хабарлар
Пу кӱннерде С.П.Кадышевтің адынаң культура кінінде чапсых кӧзідіг-марығ иртче. Ол «Хысхының хайхастығ абдыразы» адалча. Анда устарын чайаачы кӧңніліг паза сибер холлығ кізілер сынапчалар.
Культура кінінің ӧӧн методизі Клара Карамашеваның таниинаң, Наа чылға чарыдылған кӧзідіг кибірге кір парған, аның тоғызында Хакасияның прай чайаачы устары хынып араласчалар.
Марығ ӱс улуғ номинацияҷа иртче: хоостар, декоративно-прикладной искусство паза «2018 чылның таңмазы». Олар ідӧк нинҷе-нинҷе номинацияа чарылчалар. Пӱӱл марығда 254 кізі араласча, олар 500-ке чағын тоғыс тимнеп салтырлар.
Кӧзідіге сығарылған тоғыстарның аразында кӧрігҷілернің хайиин хоостар тартчалар. Мында пейзажтарны, натюрморттарны, Наа чылға чарыдылған хоостарны кӧрерге чарир. Ағбанның кічіг частығ чуртағҷызы Дарья Спиринаның «хысхы хараазы» тоғызы харах ӧріндірче. Анда ікі хусхаҷах кӧзіділ партыр. Олар, ағастың салаазында одырып, айға ӧкерсінчелер. Сорығ городта чуртапчатхан Екатерина Клюшина марыға «Сыын» хоосты чайаптыр. Тайғадағы аңны хызыҷах прай кӧңнін салып хоостаан.
Асхыс аймааның пилтірдегі олған искусство школазының ӱгренҷізі Юлия Тумоякованың тоғызы «Наа чылға сыйых» адалча. Мында часкалығ хызыҷахты кӧрерге чарир, ағаа іҷе-пабазы Наа чылға кӱҷӱгесті сыйлап пиргеннер нооза. таланттығ Юляҷах хызыҷахтың ӧрінізін чахсы кӧзіт пирген. Чоохтирға кирек, 2018 чылның ээзі адай полча, аннаңар ағаа кӧп тоғыс чарыдылған.
Юлия Тумоякованаң хада пір школада Валерия Иридекова паза Екатерина Терских ӱгренчелер. Саарбахтар батикнең айғасчаттырлар. Батик - ол хоос, че аны авторлар исте чайапчалар. хыстар тоғыстарында постарының адайларын кӧзіт салғаннар, неке. Уғаа «чылығ» хоостар.
Кӧзідіге сығарылған ойнаҷахтарның аймағы хайхатча. Сыбыҷахтар, Соох Апсахтар, хар хызыҷахтар, хар кізілер, адайахтар, Наа чылдағы ойнаҷахтар кізінің кӧңнін кӧдірчелер. илона Курносова Шира аалдаң, ол нинҷінең ӱріп, аннаң сувенирлер чайирға хынадыр. Минің кӧрізімнең, кічіг частығ ус иткен Соох Апсахнаң хар хызыҷах роботтарға тӧӧйлер. Кӧрігҷінің хайиин Доминика Кузьменконың тоғызы тартча. Ол ӱгретчізі Виктория Ерофееваның полызиинаң Барби кӧклӧні, пір хати тузаланчатхан самнахтарнаң паза азырахтарнаң чазап, тонандыр салтыр. Амды кӧрігҷілернің алнында хар королевазы турча. Піди кӧрзең, пір дее сидік ниме чоғыл, че анзын сағын таап аларға кирек.
Орта тидірлер, ус холлығ кізі хайдағ даа нимедең аймах ниме-ноолар чайап салар. Кӧзідімге, 7 частығ Матвей Широковтың хар кізізі макароннардаң иділген. Елена Травникованаң Валерия Пашина, хууннаң паза сызырнаң тузаланып, сіліг паннолар чайап салғаннар. таланттығ хыстарның тоғыстарында кӱҷӱгестер тіріге тӧӧйлер, хузурухтарынаң пулахтадарға тимделер. Пии аймаандағы Новокурск аалның чуртағҷызы Елена Гридасова кӧзідіге «тошка клоун» ойнаҷахты сығарған. Аның сырайы чаҷыннаң иділген, кип-азаа - фантиктердең.
Улуғларның аразында ирина Ботинаны таныхтирға кирек. Ол шира аймаандағы Наа аалның «Пазағас» олған садында істенче. Аның монҷыхтардаң иділген сыбыҷаа ырахтынох пызыңнапча. Идінҷек Галина Фразалиева ідӧк кӧзідіге сыбыҷахты чайаптыр. Сибер холлығ ипчі аны, истең идіп, монҷыхтарнаң, чаламаларнаң чазаптыр, аннаңар ойнаҷах уғаа сіліг кӧрінче. Елена Чихачева чапсых кӧклӧҷектер палғапча. Аның «хар кізілернің сӧбірезі» тоғызы кӧрігҷілернің чӱреен кӧӧретче.
Чоохтирға кирек, ӧсчеткен тӧлге С.П.Кадышевтің адынаң культура кінінің тоғынҷылары улуғ хайығ салчалар. Олғаннарны пос холынаң аймах сувенирлер идерге кӧніктірерге пӧгініп, олар палаларға мастер-класстар тикке иртірчелер. Кӧзідімге, пӱӱл ӧнетін хығыртылған ус олғаннарны ойнаҷахтар чайирға ӱгредер. Ӧӧн методист Клара Карамашеваның чооғынаң, Хакасияның школаларынаң кӧп сурыныс пічии кірче, ӱгренҷілер мастер-класстарда ӧткін араласчалар.
«Хысхының хайхастығ абдыразы» кӧзідіг-марығ 25 декабрьға теере иртер. Иң артыхтарын жюри I, II, III степеньніг дипломнарнаң таныхтир, пасхазына араласхан ӱчӱн ідӧк пічіктер читірілер. пірее ойнаҷах кӧңніне кірзе, аны садызып аларға чарир. Прайзын Хакасия устарының чапсых тоғыстарын кӧріп аларға хығырчабыс.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде