РОССИЯНЫҢ ИС-ПАЙЫ - АНЫҢ АЙМАХ ЧОНЫ
19.12.2017
Хабарлар
АЭРОПОРТ. САҒЫҶАҢ ЗАЛ, САМОЛЕТСАР СЫҒАРЧАТХАН ТРАП, ДВИГАТЕЛЬ КӰӰЛЕЗІ ПАЗА МЫНА МИН КИИДЕБІН. КӦҢНІМДЕ, КІЧІГ ПАЛАНЫҢ НА ЧІЛИ, ЧӰРЕКСІНІС ПАЗА ОЛОХ ТУСТА ӦРІНІС. ІДИ МИНІҢ МОСКВАЗАР ЧОРИИМ ПАСТАЛҒАН. ПӰӰЛ МАҒАА РОССИЯ ПРЕЗИДЕНТӀ ВЛАДИМИР ПУТИННІҢ ПРЕСС-КОНФЕРЕНЦИЯЗЫНДА АРАЛАЗАРҒА ОҢ ПОЛҒАН.
ХАКАСИЯДАҢ МОСКВАЗАР МИННЕҢ ПАСХА ІДӦК «ХАКАСИЯ», «СЕЛЬСКАЯ ПРАВДА» ГАЗЕТАЛАРНЫҢ, «РТС» ТЕЛЕКОМПАНИЯНЫҢ, «ХАКАСИЯ-ИНФОРМ» ХАБАРЛАР АГЕНТСТВОЗЫНЫҢ ТОҒЫНҶЫЛАРЫ ПАРҒАННАР.
ХАЗНА ПАЗЫ ХАБАРҶЫЛАРНАҢ МЫНДАҒ ТОҒАЗЫҒ ИРТІРЕРІ КИБІРГЕ КІР ПАРҒАН. ПӰӰЛ ОЛ 13-ҷі ХАТИ ИРТТІ. ТАНЫХТИРҒА КИРЕК, ЧЫЛ САЙ ВЛАДИМИР ПУТИНЗЕР СУРЫҒНАҢ АЙЛАНАРҒА САҒЫНЧАТХАН СМИ ТОҒЫНҶЫЛАРЫНЫҢ САНЫ ӦЗІП ЛЕ ОДЫРЧА. ІДИ ПӰӰЛ, ПАСХА ЧЫЛЛАРНАҢ ТИҢНЕСТІРЗЕ, ИҢ КӦП ХАБАРҶЫ ЧЫЫЛЫС ПАРҒАН - 1640 КІЗІ. ОЛ САНДА РОССИЯНЫҢ ПАЗА ПАСХА ХАН ЧИРЛЕРІНЕҢ КИЛГЕН ХАБАРҶЫЛАР. ПРАЙЗЫНЫҢ ПІР ПӦГІН - ОЛАРНЫ САҒЫССЫРАТЧАТХАН СУРЫҒА ПРЕЗИДЕНТТІҢ НАНДЫРИИН АЛЫП АЛАРЫ.
ХАБАРҶЫЛАР ХАБАРҶЫЛАРНАҢ
Пресс-конференция пасталарына ам даа ӱс час сағирға. Че Чон аразындағы садығ кінінде, хайда тоғазығ полар, чон тығырама. Анда-мында камералар паза фотоаппараттар пызыңнасчалар. Хабарҷыларның тоғызы хыызында парча. Хынығ даа кӧрерге: хабарҷылар удур-тӧдір интервью алчалар, удур-тӧдірӧк сомға суурчалар. Итсе-де, минзер дее оларның пірсі пастырған, че англия тілінең ниме теенін оңнап полбаам. «Крым» сӧсті ле истіп, Хакасиядаңмын теем. Анзы алаң ас парғанға тӧӧй. Анаң хости турчатхан ипчізер кӧзітче паза «Сірер хада нимессер бе?» сурығнаң айланча. Сизінзем, хыримда минің осхас хызыл ӧңніг кофталығ хыдат ипчі турча. Алҷаастанғанын сизініп, хабарҷы пыросынған паза табырах чідібіскен. Мағаа, тізең, пасха чирдегі орыстар пісті хыдаттардаң пасхалап полбинчатханы хынығ ла пілдірт парған. Итсе-де, полған чыллар, хаҷан андағ тиңнестіріглер мині хомзындырҷаңнар.
Чон аразында таныс сырай кӧрін парған. НТВ каналның хабарҷызы Ирада Зейналова позының кӧзідиин суур парча. Чон аразынзар кіріп, ниме-де табырах чоохтанып, камеразар улуғ хаалағнаң пастырча. Че ниме-де киліспин парған осхас. Пазох ла, айланып, хаалапча. Анаң пазох, іди алтыҷа хатап. Пот хайди чахсы репортажтар иділчеттір.
Ол тусха СМИ тоғынҷылары зал ізиин прай саринаң абылапчатханнар. Полғаны ла, алнынзар кіріп, пастағызын кірерге хынған. Сағам на иптіг пазыс чӧрчеткен, удур-тӧдір чалахай хайчатхан чон, ізік хыринзар чидіп ле алар ӱчӱн, кізілер дее ӱстӱнҷе парарға тимде полған осхас. Ізік азылча, чон залзар «урылча». Кӧні чоохтаза, мындағ іткленісті студент тузынаң ала кӧрбеен полғам. Залзар кіріп алғаны чахсы, че мында пазох ла харбазығ - орын ӱчӱн. Ачырғасха, мин чахсы орыннарға маңнанмин халғам. Халғанҷы рядтарның пірсінде одырарға киліскен, че, соонаң сизінгенде, анзы даа чахсы полтыр. Іди хай піреезін орын чидіспееннеңер, залдаң сығарыбызып, пресс-центрзер ызыбыстырлар. «Якра, Собчакнаң аңмай халғам!» - хомзынчатхан пір хабарҷы.
Сценазар президенттің пресс-секретарьы Дмитрий Песков сых килген. Зал, хазна пазын сағып, сым пол парған.
ПРЕЗИДЕНТ ХАБАРҶЫЛАРНАҢ
Президент Владимир Путин залзар кірче. Хабарҷылар аны хол сабызынаң удурлапчалар. Олох туста телефоннарына суурчалар. Телефоннығ холлар ӱчӱн кистіндегілерге ӧӧн матырыбыс кӧрінминче. Турчабыс, че алнындағылар, турыбызып, прай кӧрімні стене чіли чабысханнар. Орын ӱчӱн сала ӧткін харбаспааннаңар пазох ла хомзынчабыс. Чон одырыбысты, че анзы ӧріндірбинче. Амды президенттің хайиин тартар пӧгіннең иділген плакаттар піске харығ полчалар.
Пастағы сурығны Дмитрий Песков «Москва чоохтапча» радиостанцияа пирерге чаратхан. Сурығ: «Ноға сірер табыға парчазар?» Табығлар алнында мындағ сурығ поларын прайзы даа сағаан полар. Хайди Владимир Путин таныхтаан, аның табығ программазы тимде, че пресс-конференция тузы ағаа чарыдылбаан.
- Ӧӧні, нимее ӱлгӱ паза тиксі чон хайығ айландырарға кирек - ол инфраструктура тилізі, хазых хайраллиры, ӱгредіг сурығлары, - теен хазна пазы.
Ідӧк национальнай тілдеңер сурығ полған. Анзы пістің республикаа кӧнізінең теелче. Владимир Владимировичтің искіриинең, кізілер пос тілінең ӱгренер оңдайлығ поларға киректер, пасхазы чоғыл, чечен тілі ол алай татар паза пасхазы даа.
- Пістің кӧп андағ тіллер. Олар - пістің поғдархазыбыс паза ис-пайыбыс, - таныхтаан хазна пазы.
Ідӧк президент национальнай регионнарны пасха регионнарнаң піріктірері кӧрілбинче тіп таныхтаан. Ол хазнанаң устапчатханда, андағ ниме полбас тіп ізендірген.
Хазнаның экономиказына паза социальнай кӧзідіглеріне чарыдылған кӧп сурығ кірген. Президенттің чооғынаң, пу сурығларҷа пістің сидіксіністер чоғыл: ӧдістер ӱс хати хызырыл парғаннар, резерв ахчазы, тізең, 30 хати ӧс парған; кізі ӱрепчеткені хызырылча, пала тӧріпчеткені хозылча.
Че мин полған на сурығда тохтабаспын. Аны кӧбізі телевизордаң кӧріп алған полар. Хабарҷылардаңар чоохтаза, пресс-конференцияа кіріп алғаны - ол пастағы ла хаалағ. Мында ідӧк президенттің хайиин тартып аларға кирек. Аның хайии ӱчӱн ідӧк улуғ харбазығ парған. Полған на хабарҷының позының оңдайы. Кем-де улуғ плакатта суриин пасча, кем-де ӧнетін пілдізі чох сӧстер алай сӧс пірігістерін. Минің хараама тасталғаннар мындағ плакаттар: «Арестованный Новороссийск», «Татарлар чох хайдар?», «Путин бабай», «Россия армиязы», «Рубль», «Хорғыс! Тағларны сайбапчалар». Кем-де национальнай кип-азахтығ килтір, кем-де пӧріктіг паза саналығ чылҷаң очкиліг. Алныбыста ідӧк «скворечниктіг» хыс паза оол одырғаннар. Олар дольщиктер суриинаң килтірлер. Миннең хости одырған Кемеров облазының хабарҷызы регионда туризмні тилідерінеңер сурығнаң килтір. Самарадағылар пістің спортсменнернің алнын аларға сағынчатханнар. «Ноға пістің спортсменнерібіске Олимп ойыннарына Россия флагынаң парарға чарабас?» - хомзынғаннар олар.
Минің суриим, тізең, пістің ӱгретчілер тоғызына теелген. Амғы ӱгретчілер олғаннарнаң айғазар орнына чаҷыннарнаң на тоғынып майыхчалар. Итсе-де, мындағ сурығ 2013 чылда полғанох. Сурығ пӧгілерге кирек полған, че пӱӱнге теере хоза пӧкчең сурығлар сығыс ла килчелер.
Мындағ пресс-конференция региондағы хабарҷыларға улам на аарлығ. Пос чирінде чылларнаң пӧгілбинчеткен сурығны хазна пазына читір пирер оңдай пар нооза. Аннаңар полғаны ла ол оңдайнаң тузалан халарға иткен. Іди пола-пола СМИ тоғынҷылары хысхырысха кірібіскеннер. Президент чооғын тоозарға даа маңнанминчатхан, че зал nip тиңе хысхырып пастапчатхан. Пірее туста футбол чазызының трибуназында одырчатхан чіли пілдіртчеткен. Тоғазығның соонзар, тізең, зал улам на кӱӱлеп сыххан.
Пресс-конференция тӧрт часча ирткен. Пу тусха хабарҷылар чаа хорадыныстарынаңар, Россияның паза пасха хазналарның хайызығларынаңар, спортсменнердеңер паза допингтеңер, аал хониинаңар, налогтаңар паза кӧп пасха нимедеңер сурығлар кӧдіргеннер.
Кӧбізінің хайиин тартхан полар тынаға сыхчаң тус кӧдірілерінеңер сурығ. Путиннің таниинаң, тынаға сығар тус 30 чыллардох алыл парған, андада чонның чуртапчатхан чыллары хысха полған.
Прай тилекейде тынаға сығар тус кӧдірілче, Россияда ла ол пір синде турча тіп искірген президент. Аның чооғынаң, пу сурығны прай саринаң чахсы, кӧріп, пӧгерге кирек. Че пір дее ниме иділбезе, соонаң тынағдағыларның парызы хызырыл таа парар осхас.
Кӧні чоохтаза, мин Владимир Путинге пірее ағырсымнығ сурығ пирерлерін сағаам, хайзына ол нандырығ таппас. Че андағ ниме полбаан. Пістің президентібіс полған на сурыға нандырығ таапчатхан. Итсе-де, хай пірее сурыға нандырчадып, ол пасха сурыға кірібісчең алай саннарнаң чоохтап сыхчаң, хайзы сурыға кӧнізінең теелбинче.
Чоох чоғыл, мынҷа чыл хазнанаң устапчатханда, прай даа сурығларға нандырығ пілчетпес пе. Тӧрт час пілдіртпин ирте халған. Пресс-конференция тоозылчатханда, президент Владимир Путин прайзын килчеткен Наа чылнаң алғыстаан паза хабарҷыларнаң тоғазар пасха оңдайлар полар тіп ізендірген.
Автор :
Екатерина ИНДЫГАШЕВА, Ағбан - Москва - Ағбан
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде