90 ЧЫЛ ЧОННАҢ ХАДА
26.12.2017
Хабарлар
Ирткен неделяда «Хабар» газетаның редакциязы «90 чыл чоннаң хада» книгазының презентациязын иртірген. Танығлығ мероприятиее газетада кӧп чыллар істенген тоғынҷылар, хакас телевидениезі, радиозы, «Хакасия» газета, республиканың Журналисттер пірігізінің кізілері хығыртылған. Тоғазығны апарған «Хабар» газетаның ӧӧн редакторы Радион Дмитриевич Сунчугашев.
Книга тиктең нимес «90 чыл чоннаң хада» адал парған. Пу син тус аразына ол кӱннің сай хакас чонынаңар, тілінеңер, культуразынаңар, республикада полчатхан алызығлардаңар, алынҷа кізілердеңер, аал хониинаңар паза Хакасия чуртазының пасха даа сариларынаңар пас турған. 90 чыл аразына газетаның муңарлап страницазы сығарылған, оларда - пістің тархыныбыс. Амғы тусха теере газета мының алнында турғызылған пӧгіннерін алыстырбаан, хығырығҷыларның сын паза киртістіг нанҷызы полып, хакас тілін хайраллирында улуғ тоғыс апарча.
Че газета позы ла пазылбинча, кӱннің сай полған на сығарысты нинҷе-нинҷе кізі тимнепче. Олар - хабарҷылар ла нимес, ідӧк хачылар, корректорлар, компьютер пӧлиинің тоғынҷылары паза даа пасхазы. Аннаңар газетаның пайрамнығ чылына республика тархынынаңар пасхан кізілердеңер книга сығарарға чарадығ алылған.
Книга нинҷе-де чардыхтаң пӱтче. Пастағы чардығында газетаның тархынынаңар чоохталча. Мында 1927 чылдаң пӱӱнгі кӱнге теере газета хайдағ киректерні чарытханынаңар піліп аларға чарир. Ікінҷі чардығы газетаның ӧӧн редакторларына чарыдылған. Ӱзінҷі чардығында газетада кӧп чыллар тоғынған паза амғы туста мында істенчеткен тоғынҷылардаңар хығырып аларға чарир.
Таныхтирға кирек, газета тархынына паза аның тоғынҷыларына чарыдылған книга Хакасияда пастағызын на сыхча. Аннаңар мындағ тоғыс апарарынҷа пу пастағы опыт. Книга тимнелчеткенде, улуғ тоғыс идерге киліскен. Аның улуғ чардығын Анатолий Султреков апарған. Анатолий Егорович позы газетада 40 чыл тоғын салған, аның таниинаң, нинҷе-нинҷе чыл хада істенген арғыстарынаңар пазарға, полған нимелерні сағысха кирерге хынығ полған. Ідӧк книга чайирында ағаа полысханнар Альберт Толмашов, Елена Чезыбаева, Галина Чаптыкова, Елена Абдина паза даа пасхазы.
Сағынчам, пу книга хығырығҷыларға даа, редакцияның чиит тоғынҷыларына даа, ӱгренҷі-студенттерге дее хынығ паза тузалығ полар.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде