ГАЗЕТА ТОҒЫНҶЫЛАРЫН АЛҒЫСТААННАР
16.01.2018
Хабарлар
Кӱрген айының 13-ҷі кӱнінде Россияда Печать кӱні таныхталча. Танығлығ кӱнге удур Россиядағы Журналисттер пірігізінің адынаң Ольга Валериановна Ширковец Хакасияда сыхчатхан газеталарның тоғынҷыларын алғыстаан.
- Піс прайзы печать паза газета хоостыра пір тоғысты апарчабыс, алғыстапчам сірерні профессиональнай ӱлӱкӱннең! - чоох тутхан О.В.Ширковец. - Журналисттің тоғызы олаңай нимес. Тоғыс тузы соонаң паза хараа даа ол таңдағы кӱннеңер сағыссырапча, чонны чахсы хабарларнаң ӧріндірерге кӱстенче. Тоғызына тиксі пирін салған кізі хаҷан даа пӧзік чидіглерге читче, профессионал атха турыстығ полча. Чуртазыңарда паза тоғыста прай киректерің киліс турзын, чайааныңар пӧзік ползын!
Мындағ танығлығ кӱнде Россияның Журналисттер пірігізінің кнезі В.Г.Соловьёвтың адынаң пӧзік профессиональнай чидіглері ӱчӱн паза Россияның печать кӱніне грамоталар «Хабар» газетаның ӱгредіг паза наука пӧлиинің редакторы Екатерина Индыгашеваа паза сомҷы Максим Ахпашевке читірілген. Чиит хабарҷыларны Россия синіндегі пӧзік сыйыхтарнаң таныхтапчатханы уғаа махтағлығ. Хайди таныхтапча Ольга Валериановна, чииттер - газетаның таңдағы кӱні паза ізенізі.
«Хакасия» газетаның журнализі Александр Дубровин, «Усть-Абаканские известияның» верстальщигі Николай Малунов грамоталар алғаннар. «Черногорский рабочий» газетаның ӧӧн редакторы Алина Корзунова пӧзік сыйыхха турысхан. Алина Николаевна пу газетада 40 чыл істен парир. «Аскизский труженик» паза «Земля Таштыпская» газеталарның хабарҷыларын ідӧк таныхтааннар. Олар - Анна Кутукова паза Наталья Ковалеванаң Виктор Пермяков.
Пу кӱнде Россияның Журналисттер пірігізінің кізізіне алылғаннаңар ікі кізее билет читірілген. Пірігістің наа кізілері хабарҷылар Екатерина Индыгашева паза Ольга Молина полыбысханнар.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы