КӰМӰС КІРӦСНЕҢ, ИРБЕН ОТНАҢ, СУҒНЫ ЧАРЫТХАННАР
23.01.2018
Хабарлар
Арендай ТАБУРЧИНОВ суғ алча
МЫЛТЫХ ӰЛУКӰНІҢДЕ, 19 ЯНВАРЬДА, АҒБАННЫҢ ЧУРТАҒҶЫЛАРЫ ИРТЕННЕҢ СВЯТО-НИКОЛЬСКАЙ ТИГӀРИБДЕ, ЧЫЫЛЫЗЫП, ХУДАЙҒА ПАЗЫРҒАННАР. ПУ КӰҢДЕ АБЫСТАР КИБІРЛИ ӰЛӰКӰН ЛИТУРГИЯЗЫН АПАРЧАЛАР, ХУДАЙ СӦЗІН ЧОНҒА ЧИТІРЧЕЛЕР.
АНЫҢ СООНАҢ ХАКАСИЯНЫҢ ПАЗА АҒБАННЫҢ ИОНАФАН АРХИЕПИСКОБЫ УСТААНЫНАҢ КІРӦСТӀГ ЧӦРІМ ПАСТАЛҒАН. НИКОЛЬСКАЙ ТИГӀРИБНІҢ САННАРЫ СЫҢЫРАЗА ТӰСКЕНДЕ, ЧОН, ЧОЛЗАР СЫҒЫП, АҒБАН СУҒ ХАЗЫНЗАР ПАРҒАН.
ЧАР ХАЗЫНДА ИРТЕЕЗІНӦК КИЛГЕН КІЗІЛЕР ОЛАРНЫ УДУРЛААННАР. АНАҢ ПРАЙЗЫ ПУСТА КИРТІЛГЕН КІРӦС ТИЛТІЗЕР ЧАҒЫН ПАРҒАН. ИОНАФАН АРХИЕПИСКОП, АҒЫН СУҒНЫ ЧАРЫДЫП, ХУДАЙ СӦСТЕРІНЕҢ ЧОНЗАР АЙЛАНҒАН. «АМИНЬ».
СӦС СООНАҢ КІЗІЛЕР, КІРӦСТЕНІП, ПАЗЫРҒАННАР. ӦӦН АБЫСТЫҢ ПОЛЫСЧЫЛАРЫ, СУҒДАҒЫ ТИЛТІНІ ИРБЕН ОТНАҢ ЫСТАП, ИБІРЕ ЧӦРГЕННЕР ПАЗА БИБЛИЯДА ПАЗЫЛҒАН СӦСТЕРНІ ХЫҒЫР ТУРҒАННАР. ИРЕННЕР ПАЗА ИПЧІЛЕР ХОРЫ ХУДАЙ САРЫННАРЫН ТОЛДЫРҒАННАР.
Анаң епископ Ионафан полысчызынаң хада кӱмӱс кірӧсті нинҷе-нинҷе хати суғзар тӱзірген. Чон ол арада матап кірӧстенген.
Пӱӱлгі кірӧс тилті Ағбан суғ хазынзар чағын арах кизілтір. Анда пустың халыны чарым метрге читче тіп чоохтааннар. Аннаңар чонға анда турарға хорғыс чох полған. Кӱрген айының соох кӱннері дее турчатса, Ағбан суғ чахсы тоңминдыр, чар хазынҷа ахчатханы кӧрінче, ырах ниместе, суғ ортызында, тоңминдырох, пус чох орын харалчатхан.
Чарытхан суғдаңар чоох апарза, аны хоостыра Худайның чарых омазы паза кӱзі чонға читірілчеткеннеңер киртініс пар. Мындағ суғның тузазы улуғ полтыр: аны ізіп паза чуунынып, чазыхтардаң арығланчалар, имненчелер, кізі істі-тастынаң арығлалча осхас... Ызых суғ чыл ибіре киректелче. Мылтых хараазын хайзы-пірсі суға кірче, пасхазы ідістерін, чарытхан суғнаң толдырып, ибзер апарча.
Чарытхан суғ чыл ибіре пӱлестелбинчеттір, арығ позынаң турча. Хайдағ даа туста аны іссе, наа ла сустып алған час суғ чіли тадыпча. Пурунғы гректер чарытхан суғны агиасма тіп адаҷаңнар. Мындағ суғны тигіриблерде алып алчалар алай ағын паза хара сууҷахтардаң, сустып, ибзер апарчалар. Ағбан хазында чыылған чон аразында чыл сай андар суға чӧрчеткеннер пар. Оларнаң чоохтазып алғам, сағыс-кӧрістерінең ӱлескеннер.
Светлана Емельянова чарытхан суғны ісчем, паланың сырайын чуупчам, чахайахтарны даа суғлапчам тіп чоохтаан. Арендай Петрович Табурчинов ипчізі Елена Ивановнанаң хада суға килтірлер. Олар ікізі дее пенсионер. Пасхазыох чіли, Ағбан хазында Кірӧстіг чӧрім иртерін сағааннар. Ирепчі чарытхан суға чыл сай килчеттір.
- Піс абыстар килерін сағыпчабыс, соонаң кірӧснең чарытхан суғны алып аларбыс, - чоохтаан Арендай Петрович. - Пістің чуртыбыс тӧртінҷі микрорайонда даа полза, чыл сай Ағбанхазынаң суғны алып аларға кил парчабыс. Мин 10 чылмының алнында Преображенскай тигірибде кірӧске тӱскем. Іҷем пісті кічігде кірӧске тӱзіргем тіп чоохтаҷаңох.
Чарытхан суғнаң чыл тооза тузаланчабыс: ісчебіс, пірееде сырай чуупчабыс. Ибде ол турча, арығли пір дее хайтпинча.
Оолғым Благовещенскте чуртапча. Амур суғда сомғам тіп телефоннаң сығдыратхан (хатхырча. - Авт.). Хызым ағырсынча, иді ізии удаа кӧдіріл килче. Имҷілер ағыриин ілезіне сығар полбинчалар. Хызымны хайдар ла ал чӧрбеебіс, пірдеезі полыс полбинча. Амды чарытхан суға паза Худай сӧзінің кӱзіне ле ізенерге халча.
Чарытхан суғны, тізең, аның кӱзіне киртінминчеткен дее кізілер аладырлар. «Пасхазы алча, полысча тіпчелер», - чоохтан на салчалар. Суғ алар тус читкенде, чар хазындағы чон кірӧс тилтізер іділізе тӱскен. Мин дее ідістерімні чарытхан суғнаң толдырып алғам. Кӱрҷектер, ідіс-кӧнектер хоғдыразы Ағбан суғ хазын «тірілдірген».
Автор :
Елена САГАТАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде