УЛУҒ АЛЫЗЫҒЛАР ПОЛБАС
23.01.2018
Хабарлар
Хакасияның экономика тилізі министерствозының устаа журналисттерге улуғ пресс-конференция иртірген. Анда республиканың экономика тилізі министрінің пастағы орынҷызы Александр Терещенко, орынҷызы Наталья Неровных, министерствоның потребительскай рынокты сыныхтағда тутчатхан пӧлік пастығы Татьяна Карташова паза тарифтерҷе департамент устағҷызы Елена Лобань араласханнар.
Пастап Александр Терещенко министерстводағы алызығлардаңар искірген. Аның чооғынаң, пылтыр пасталған алызығлар ам даа тоозылбааннар, министерстваа тарифтерҷе паза энергетикаҷа хазна комитедінің чардығы пиріл парған. Ідӧк министерстваа потребительскай рынокты сыныхтағда тутчаң полномочиелер пирілген. Алызығлар ам даа узарадылчалар.
Пілдістіг, чон паза идінҷектер пастағы теесте пӱӱл тарифтер хайди алызарын піліп аларға сағынчалар. Аннаңар Наталья Неровных искірген. Хайди ол таныхтаан, пылтыр тарифтерҷе паза энергетикаҷа хазна комитеді прай полызығларға тарифтер турғыс салған. Чонға чарытхы, суғ пирерінҷе, сӧп-сап апарарынҷа льготалығ тарифтер полған на муниципальнай пӱдіске турғызылған. Хакасия пазының чарадиинаң 2018 чылға коммунальнай полызығлар ӱчӱн тӧлеглер ӧзізі пис процентке тиңнелген. Алынҷа муниципалитеттерде ол 2,5 процентке пасхалалар. Андағ оңдайнаң хайдағ даа муниципалитетте ӧзіс 7,5 проценттең аспасха кирек.
1 июльға теере иргі тарифтер полар, анаң наа тӧлеглер кирілер. Чарытхаа тарифтер ідӧк 1 июльдаң ӧс парар. Іди чонға чарытхы паазы пір киловатт/час ӱчӱн 2,08 салковай полар, аалдағыларға паза электроплиталығ квартираларға - 146 салковай (ӧзіс 7 ахчаа тиңнелер).
Пасха потребительлерге - идінҷектерге, бюджет организацияларына паза пасха даа структураларға 1 январьдаң алызығлар ам даа кӧрілбеен. Оларға тарифтер сині прай оптовай рыноктағы чарытхаа пааларнаң палғалыстығ полар. 1 июльдаң чарытхы пирчеткен компанияларның полызығлары ӱчӱн тӧлеглер ӱс проценттең азыра ӧспес.
- Бизнеске тарифтер сині тың ӧспес тіп сағынчабыс. Инфляциядаң кӧдіре полбас. Анзы ідӧк оптовай рыноктағы пааларнаң палғалыстығ. Регионда турғызылчатхан паалар пасха потребительлерге турғызылған тарифтер синіне тың теелбес, - тоосхан чооғын Наталья Неровных.
Елена Лобань республикадағы сӧп-сап тӧкчең полигоннардаңар чоох апарған. Хайди ол таныхтаан, пістің регионда андағ пис полигон тоғынча. 1 июльдаң андар тӧгерге апарған полған на кубометр сӧп-сап ӱчӱн тӧлеглер илееде ӧс парар.
Дачалардаңар сурыға мындағ нандырығ полған: городха кірчеткен дачалар городтағы пааларнаң тузаланарлар, ааллардағы - андағыох тӧлеглернең.
Татьяна Карташованың чооғынаң, аның пӧлии садығ киреен сыныхтағда тутча. Ӧӧн хайығ стационарнай садығ объекттеріне салылча. Ідӧк регионда удаа аал хонии ярмаркалары иртірілче, Наа чыл алнында кӧп орыннарда сыбылар садылған, оларны ідӧк сыныхтағда тударға киректелче. Россия президентінің чахиинҷа полған на регионның пазында потребительлернің праволарын арачылир чӧптер тӧстелер. Пӧлік ідӧк потребительлернің финанстарҷа пілізін кӧдірерінең айғасча.
Пассажирлер тартчатхан транспорттағы паалар ам даа алыспаан, аны алыстырарға транспортниктер постары айланарға киректер, амға теере андағ айланыс полбаан.
Пресс-конференцияны тоозып, Александр Терещенко таныхтаан:
- Піс прайзына азыхпыс, СМИ-ларға, бизнеске, прайзынаң чахсы палғалыс тударға кӱстенчебіс.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде