ПОСХА КИРТІНЕРГЕ, ПІЛІСТЕРНІ АЛҒЫДАРҒА
31.01.2018
Хабарлар
Ирткен неделяда, Студенттер кӱнінде, С.П.Кадышевтің адынаң культура паза чон узы кінінде чиит улус чыылысхан. Оларны Хакасия правительствозының паза республикадағы вузтарның устағ-пастаа алғыстирға килген.
Хакасия пазының орынӌызы Олег НАМ паза Хакас политехническай колледжтің студенті Алина ОТЫРГАШЕВА
ХАКАСИЯДА ЧИИТТЕР КИРЕЕ ХАҶАН ДАА ӦӦН СУРЫҒЛАРНЫҢ ПІРСІ ПОЛҒАН. РЕГИОН ПАЗЫ ВИКТОР ЗИМИН ОЛ СУРЫҒНЫ УЛУҒ ХАЙЫҒДА ТУТЧА. ТИКТЕҢ НИМЕС 2017 ЧЫЛ РЕСПУБЛИКАДА ЧИИТТЕР ЧЫЛЫ ТІП ЧАРЛАЛҒАН. ЧЕ ЧИИТТЕР ЧЫЛЫ ТООЗЫЛ ПАРҒАН ДАА ПОЛЗА, ЧИИТТЕРДЕҢЕР ЧООХ ӰЗІЛБИНЧЕ. ІДИ СТУДЕНТТЕР КӰНІНДЕ КУЛЬТУРА ПАЗА ЧОН УЗЫ КІНІНДЕ ЧОН ТЫҒЫРАМА ПОЛҒАН. ОЛАР СТУДЕНТТЕР ПАЗА ОЛАРНЫ АЛҒЫСТИРҒА КИЛГЕН ААЛҶЫЛАР - ХАКАСИЯ ПРАВИТЕЛЬСТВОЗЫНЫҢ, ӦӦРКІ ЧӦБІНІҢ ПАЗА АЙМАХ МИНИСТЕРСТВОЛАРНЫҢ КІЗІЛЕРІ.
Студенттерзер Хакасия пазы Виктор Зиминнің адынаң аның орынчызы Олег Нам алғыстас сӧстерінең айланған:
- Пӱӱн - Студенттер кӱні. Наа пілістер аларға тартылчатхан, науканы істесчеткен, позының пілістерін кӧдірчеткен чонны пу ӱлӱкӱннең алғыстапчам. Сірер - пістің таңдағы чуртазыбыссар. Сірернің хайынызыңардаң чидіглеріңнең республикабыс таңда хайдағ полары палғалыстығ. Хакасияда чииттер киректерінҷе хазна комитедін тӧстеені уғаа кирек хаалағ тіп санапчам. Ол сірерге полызар ӱчӱн тӧстелген. Мындағ кирек Чииттер чылында пол парғаны уғаа танығлығ.
Хакасияның иң артых студенттеріне Олег Нам республика пазының адынаң Аарластығ пічіктер читірген. Таныхтатханнар аразында Хакасияның политехническай колледжінің студенті - Алина Отыргашева. Ол ӱзінчі чылы программистке ӱгренче паза аймах-пасха марығ-конференцияларда аралазарға хынча. Ідӧк чиит хыс, волонтёрлар чӧрімінің ӧткін араласчызы полып, ГИБДД тоғынчыларына аймах акцияларнаң полысча. Студент тузынаңар ол піди чоохтапча:
- Студент поларға чахсы. Ол андағ тус, хаҷан син кічіг пала нимессің, че олох туста улуғларға читкелексің. Хаҷан кӧңнің толдыра, прай ниме идерге тимдезің, чуртазыңа наа кӧстеглер турғысчазың паза аны хайди даа толдырарға прай кӱзіңні салчазың.
ХГУ-ның искіріглер технологиязы паза инженерлер ӱгредии институдының студенті Александр Семериков пастағы ла чылы ӱгренче, че амох университетке саблан парған. Ол сіліг ӱнінең городтағы, республикадағы паза тиксі Россиядағы кӧг марығларында тӧреміл сыйыхтығ орын алча. Александр - Россия президентінің чахиинаң тӧстелген чиит чайаачылар сыйииның лауреады.
Ідӧк Хакасия пазының Аарластығ пічиине ХГУ-ның студенттері Ольга Абумова, Татьяна Граф, Ағбандағы чурт хонии паза сервис техникумының студенті Кирилл Митрофанов, Харатастағы тағ-пӱдіріг техникумының студенті Екатерина Карюкина турысханнар.
Соонаң чииттерзер чылығ сӧстернең айланған Хакас хазна университедінің ректоры Татьяна Краснова. Ол, студенттерні алғыстап, таныхтаан:
- Пу - прай студенттернің хынчатхан ӱлӱкӱні. Мының алнында пу кӱнде студент сыныхтаға тимде дее полбаза, ӱгретчі хайди даа ағаа «3» паалағ турғыс пирерге кирек полҷаң. Амды студенттернің кӧбізі ол кибірні айландырарға сурынча. Мин сағынчам, аны хоостыра сағын кӧрерге кирек!
Пу туста зал кӱӱли тӱскен. Оол-хыстарның айа сабызы, хысхырыстары пу сӧстерге чӧпсінгенін кӧзіткен.
Хакасиядағы техническай институттың директоры Елена Бабушкина, студенттеріне молчағлар пирбеен дее полза, посха киртінерге, чайаачы тоғыстарнаң айғазарға, пілістерін алғыдарға алғаан.
Алғыстас сӧстері аразында аалҷыларға чайаачы номерлер кӧзіділген. Концерт ӧнетін чииттерге тимнелген. Сценазар чайаачы студенттер паза республиканың артисттері сыхханнар. Полған на кӧзідіг соонаң залда айа сабызы тохтабинчатхан.
Таныхтирға кирек, Хакасияда 20 муң азыра студент ӱгренче. Оларны пӧзік паза ортын профессиональнай ӱгредіг учреждениелері 35 аймах профессия паза специальность хоостыра тимнепчелер.
Пӱӱн студенттер кӧгліг чон, че таңда оларға республикабыстың ағырсымнығ сурығларын пӧгерге, аймах проекттерні чуртасха кирерге, науканы тилідерге килізер. Оларның кӧбізі таңдағызына ізеніс полчатханын чахсы сизінче, аннаңар прай нимее кӱстеніснең хайча.
Автор :
Екатерина ИНДЫГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде