ӰӰС ААЛДА - НАА ШКОЛА
02.02.2018
Хабарлар
2018 чыл - Ӱгредіг чылы. Орджоникидзе аймаандағы Ӱӱс аалда наа школа азылды. Прай аал чуртағҷыларына ол ӱр сағаан сыйых полды
НАА ШКОЛАНЫ ПРАЙ ААЛ ЧИДІКПИН САҒААН. ИРГІЗІ, ТІЗЕҢ, ХАҶАНОХ ИЗЕЛЧЕТКЕННЕҢЕР, ЧАБЫЛ ПАРҒАН. ОЛҒАННАРНЫҢ ӰГРЕДИИН ТОХТАТПАС ӰЧӰН, ХАЙДА ЛА ӰГРЕНЕРГЕ КИЛІСПЕЕН. ШКОЛА ТОҒЫЗЫН ПИС АЙМАХ ТУРА ТОЛДЫР ТУРҒАН. ПАСТАЛЫҒ, ОРТЫН ПАЗА УЛУҒ КЛАССТАР ӰГРЕНҶІЛЕРІ АЛЫНҶА ТУРАЛАРДА ӰГРЕНҶЕҢНЕР, ФИЗКУЛЬТУРА ПАЗА ТЕХНОЛОГИЯ ІДӦК ПАСХА-ПАСХА ЧИРДЕ ИРТЧЕҢ. ОЛҒАННАРҒА, ТІЗЕҢ, ХЫСХЫЗЫН, НАҢМЫРЛЫҒ КӰСКӰДЕ, ЧИЛЛІГ ЧАСХЫДА ПІР ТУРАДАҢ ПАСХА ТУРАА ОЙЛАП ЧӦРЕРГЕ КИЛІСЧЕҢ. ХАЙДИ ПОЛАР, ӰГРЕНЕРГЕ КИРЕК!
Итсе-де, 2011 - 2013 чылларда наа школа пӱдірер сағыс полғанох. Ол пӱдіріліп тее пасталған, че 2014 чылда, ахча чох пол парып, тоғыс тохтадылған. Амды аннаңар читіре иділбеен тимір каркастығ пӱдіріглер ле киречілепчелер. Ол даа пӱдіріге амды пӧгіннер пар осхас. Хаҷан-полза анда пала тилізінің кіні полар тидірлер. Наа школа, тізең, мындох хости турыбысхан. Тоғыс чыл наа школа сағаан чон анзына ӱр киртінмеен.
2017 чылда февральда Хакасия пазы Виктор Зимин Россияның ӱгредіг паза наука министрі Ольга Васильеванаң, тоғазып, хазна ахчазына Ӱӱс аалда 150 орынға наа школа пӱдірердеңер чарадығ алғаннар. Ол тустаң пу сурығ орнынаң тибіреп пастаан. Чайғызын аал ортызында пӱдірігҷілер хайын сыхханнар. Андада ла орындағы чон наа школа поларына киртініп пастаан.
Ӱӱстегі ортымах школа директоры Тамара Михайлова 25 чыл ӱгретчі полып тоғын салған, аның 10-ын директор полча. Че ол даа кӧңнін, ӧрінізін тудын полбинчатхан.
- Школа пӱдірии 12 июльдаң пасталған, пӱӱн, тізең, ол тимде. Мин наа школазар кӧсчеткенібіске амға теере киртінминчем. Піс, школа пӱдірілгенҷе, пис алынҷа турада тоғынғабыс, уғаа сидік полған. Аннаңар ол піске, ӱгретчілерге, ӱгренҷілерге, іҷе-пабаларға - улуғ сыйых, - тіпче школа устағҷызы.
Школа чарым чылға ла пӱдіріл парған. Ӱгренҷілер паза ӱгретчілер наа піліс ӧргезінің иркінін алтадылар. Пу танығлығ кӱнде школа ээлері улуғ аалҷыларны удурлааннар. Оларны алғыстирға Хакасия пазы Виктор Зимин, Хакасиядаң Россияның Хазна Думазының депутады Надежда Максимова, регион пазының орынҷызы Ирина Смолина, республиканың ӱгредіг паза наука министрі Лариса Гимазутина, пӱдіріг паза чурт-коммунальнай хонии министрі Валерий Келин, Хакасияның Ӧӧркі Чӧбінің культураҷа, ӱгредігҷе паза наукаҷа комитет кнезі Лариса Карпова паза аал чуртағҷыла-ры килгеннер.
Школазар кіргендӧк, аалҷыларны сыйых сағаан. Кинетін саң сыңыри тӱскен. Класстардаң хара кӧгенектіг, ах фартуктығ хызыҷахтар сығара ойлас килгеннер. Олар теелбектерінең пӱӱнӧк ӱгренерге тимделерін кӧзіткеннер. Іди пір сыйых пасха сыйыхха алысчатхан. Школаның полған на клазында аалҷыларны кибелістер, теелбектер, чылығ сӧстер сағааннар. Андағ оңдайнаң школаның ӧӧн класстары кӧзіділ парған. Че пу туста хайди даа спортзалны таныхтирға кирек. Улуғ залда прай кирек тиріглер пар. Мында саналар, конькилер, клюшкалар, аймах-пасха меспектер паза пасха даа кӧп ниме. Андағ пай зал олғаннарға спортта чидіглер ағылар, неке. Ам даа оларның утхан кубоктары пір шкафха сыыспинчатханнар. Ӱӱсте уғаа ус холлығ ӱгренҷілер. Технология ӱгретчізі Александр Лалетин оолларның айдас тоғыстарын кӧзіткен. Ол ікі кізі чӧрҷең велосипед, сіліг кӧрімніг ит сістеҷең мангал, яблах одыртчаң тиріг, тимір кисчең тиріг. Прай ол нимелерні ӱгренҷілер, постары сағынып, ӱгретчінең хада итчелер.
Сыннаң, пу наа школада ӱгренҷілерге чахсы ӱгренер прай оңдайлар пар. Класстарда наа оборудование, ӱгретчілерге уғаа туза полчатхан наа ӱгредіг материаллары оларнаң тоғынып пастирын на сағыпчалар. Мында кинектерге ікінҷі хадылынзар кӧдірілер лифт турғызыл парған. Андағ ниме, тізең, республиканың пасха школаларында чох таа полар. Прай ниме чуртастың халғанҷы кирексіністерінҷе иділген. Хакасия пазы Виктор Зимин уғаа орта таныхтаан, ноға-да піс аалларда прай ниме сала тӧбін синде полчатханына ӱгрен парғабыс. Школалар, чоллар, прай ниме городтағызынаң тӧбін. Аны хоостыра тидірлер, аалға іди дее чарир. Че амды, республика аалларында наа школалар пӱдіріліп пастаанда, кӧрчебіс, аал чуртағҷылары ідӧк чахсы, истіг оңдайларға турыстығлар.
- Піс, школазар кіргенде, олаңай ла стенелерні нимес, че наа оңдайлығ класстар паза часкалығ олғаннарны кӧрчебіс. Ӱгренҷілер ӧнетін чайаачы номерлер тимнеп салтырлар. Пу туста сизінчезің, мында, аалда, Россия пасталча. Аннаңар аалларны тилітчеткені - ол орта хаалағ. Піс Хакасияда чыл сай наа школа асчабыс. Школа полза, аал полар, - таныхтаан республика пазы.
Ідӧк ол хазна пазына улуғ алғызын читірген. Президент тӧстеен программаҷа Ӱӱстегі школа пӱдіриине ахча позыдылған. Ідӧк Виктор Зимин пу школаның пӱдіриинде араласхан полған на кізіні алғыстаан.
Аның сӧстеріне Хазна Думазының депутады Надежда Максимова хозылған:
- Піс позыбыстың чирібісте пір дее ниме пӱдірбезебіс, пір дее ниме полбас, ааллар даа изел парарлар. Піс прайзы кӱстеніп істензебіс, прай ниме полар.
Ӱӱстегі школа пӱдіриинең «Панорама» пӱдіріг компаниязы айғасхан. Аның ӧӧн директоры Павел Разуваев пу тоғысха уғаа нандырығлығ хайған. Читпес сариларын сах андох тӱзетчең, чӧптер кірзе, оларны санға алҷаң. Ӱгретчілер паза ӱгренҷілер аны нинҷе дее алғыстирға тимделер. Тоғызын чахсы толдырған ӱчӱн Павел Викторович республика пазының алғыстас пічиинең таныхтатхан.
Амды ӱгренҷілернің паза ӱгретчілернің пір улуғ школа пар, паза пірдеезіне пір орыннаң пасхазынзар ойлирға кирек чоғыл. Пу кӱннерде ікі хадыллығ школа тоғынып пастир. Анда 17 кабинет, улуғ актовый зал, чахсы оборудованиеліг столовай, технология кабинеді, хызыҷахтарны ибде хайынарға ӱгретчең кабинет, кип-азах алыстырҷаң пӧліктер. Наа школада 130-ча олған ӱгренер. Ол Ӱӱс, Оспа паза Хоҷых ааллардағы палалар.
Пасталығ класстар ӱгретчізі Лидия Малинова позының клазын улуғ ӧріністе тимнепче. Таңда аның ӱгренҷілері наа парталар кистіне одырарлар. Мында оларға хайдағ ла ӱгредіг материаллары чоғыл. Прай ол ис-пайны ӱгретчі, паарсаснаң чыып, ипти салча.
- Нинҷе чыл піске аар-пеер чӱгӱр чӧрерге киліскен. Уғаа сидік полған. Наа школаа піс уғаа ӧрінчебіс, прай аалнаң чидікпин сағаабыс. Алғым класстар, че ӧӧні - прай ниме пір орында, - ӧрінізінең ӱлесче Лидия Карповна.
Ӱгренҷілер дее улуғ ӧріністе. Прайзы пір ӱннең амды пір чирдең пасхазынзар ойлап чӧрерге кирек чоғыл тіп таныхтапча. Паза мында оларның ӱгредии дее улам чахсы парарына киртінчелер.
Таныхтирға кирек, наа школа пӱдіриине паза ӱгредіг оборудованиезін аларына РУСАЛ компания улуғ хабазығ иткен, 40 млн азыра салковай пирген. Тиксі пӱдіріге 180 млн салковайҷа хорадылған, ол прай оборудованиелернең хада. Мындағ алғым пӱдіріг «Россия Федерациязының субъекттеріндегі тиксі ӱгредігліг организацияларда наа орыннар тӧстирге полызары» хазна программазынҷа чуртасха кирілген.
Автор :
Екатерина ИНДЫГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде