САҒЫСТЫ АХЧАА САДЫП АЛБАССЫҢ
07.02.2018
Хабарлар
Кізілерні хаҷан даа ахча сурии сағыссыратхан. Ниме идерге кирек холда хаҷан даа ахча полар.
Полған на хығырығҷы «чахсы чуртас» сӧс пірігізіне позының таниин пирер, ӧӧнінде «чахсы» сӧс пастыра. Че хайдағ даа чахсы чуртастаңар чоох апарзабыс, ол кізінің ахча оңдайларынаң палғалыстығ. Пар ахча - чахсы, чоғыл - чахсы чуртастаңар чоох чоғылох.
Тіпчелер, пайлар холда ахча тутпинчалар, а хайда олар аны тутчалар? Ноға иң тӧбін чал ахчазын алчатхан пір хонҷых паза аннаң ікі хати кӧп алчатхан ікінҷі хонҷых ахча чидіспинчеткеніне хомзынчалар, ӱзінҷізі, тізең, оларнаң кӧп албин, пір дее ачырғанминча? Мында, неке, хыйға чоох килістіре таныхталарҷых: «Пос парызынҷа чуртирға кирек».
Кем сынында чахсы чуртирға сағынча, ол кӧп чазыт сағысты азарға сағынча.
Аймах кинделердең пасти (харын, пӱӱнгі кӱнде кӧбізінің Интернет пар. -Авт.) кирек искірігліг сайттарға теере позының «істезиин» апарча. Хомзынысха, ол искіріглернең тузаланғаннарның пір чардығы ла чахсы салтарларға читче. Ӧӧн чардығы ам даа тілегде. Чахсы чуртасха чидер ӱчӱн, алты ӧӧн кирексіністі толдырарға кирек. Олардаңар сала чарыда пас пирербіс.
• Ахча сірерзер тартылар ӱчӱн, орта пӧгіннер турғызарға кирек.
Кӧзідімге, кізі хаҷанох ниикке чӧрҷең чахсы машина алып аларынаңар сағынча. Ниме ол: пӧгін, хаҷаннаң ал чӧрчеткен сағыс алай толбас сағыс? Сынында, тізең, пу сағысты толдырар ӱчӱн кізее ахча кирек. Че машинаа ахча читіріп, аны садызып алза, кізінің паза пӧгін халбинча ба? Чуртас чахсыланған сай піс пірее наа нимедеңер сағынчабыс, машина орнына - наа машина, квартира орнына - алынҷа тура...
Кізінің сағыстары алызып одырча, пӧгін - ахча - халча. Андағ оңдайнаң, кізінің ӧӧн пӧгіні - ахча.
Олох туста ахчаны орта тудынарға ӱгретчеткен специалисттер таниинаң, ахча читкіҷе полары ӱс синге чарылча: пастағызында, кізінің, сӧбіренің чыған ахчазы пір айдағы хорадығларынаң алты хати кӧп; ікінҷізінде, чыған ахча хорадығларны 150 хати асча; ӱзінҷізінде, кізінің чыған ахчазы айдағы парызынаң (турыстыра парызынаң. - Авт.) 150 хати кӧп.
• Парыстарны ӧскірерге кізінің сағынчатхан оңдайы харығ полча.
Парызын ӧскірерге сағынчатхан кізі ахчаны тузалығ (ол кізее хоза ахча ағыларға кирек. - Авт.) хоратча, кирексіністерінеңер сағынчатхан кізі оларны толдырарға маңзырапча.
Эксперттер таниинаң, кізілер сағынчатхан оңдайларынаң ікі чардыхха чарылчалар: ырах кӧрістіглер паза пір кӱннеңер ле сағынчатханнар. Ахчанаң сидіксіністерге урунчатхан кізі пір кӱннеңер ле сағынча.
• Ахчанаң ікі саринаң устирға кирек: парыстарны ӧскірерге, хорадығларны пір синде тударға.
Кізі ахча сала кӧп тоғынып пастабысса, хорадығларын хозарға маңзырапча, сағынча, амды аның ахчазы читкіҷе наа телефонға, аарлығ тонға, наа машина аларға кредитке... Ол туста кізі, тізең, пір кӱннеңер ле сағынча.
Ниме идерге кирек?
Хорадынарға кирек ле нимее! Сағынчазар, ахчалығ кізі ӱзӱрлебинче - ӱзӱрлепче. Ол 500 салковайға алып алар нимені 1000 салковайға албас, сынап ол чахсы тимнелген ниме полза. Хорадығларны саниры сидік нимес, ӱгренерге орай нимес.
Халған ахчаны чыырға, «тоғындырарға» кирек! Парыстарны ӧскірерге чарир хоза тоғыс, пос кирее, инвестициялар полызиинаң, социальнай хабазығлар, сыйыхтар алып.
• Ахча хынча, хаҷан аны санапчалар.
Санап кӧрерге чарир, айда 1000, 2000, 3000... 10000 салковайнаң чығза,
пір чылға нинҷе чыыл парарын, 2, 3... 5, 6... 10 чылға. Чыылған ахчаа хоза 10, 20... 60 % хозыбысса?
Алай мындағ кӧніктіріг: пис чылға миллион салковай чыып аларына ай сай нинҷе ахча чыырға кирек?
Ырах кӧрістіг кізі, чыылған ахчанаң чылда 60 % хайди тоғынып аларынаңар сағынып, пос киреен пастир, фонд рыногын істезер, парыстығ кирек тілир... Кізінің пасхазынаң ӱлесчең дее пілізі табылар...
СӦС СОО: Пілістер пос алынҷа пирілбинчелер, оларны тілирге кирек. Таап алған пілістернең орта тузаланып пілерге. Мында кізінің сыдамағы сыныхталча. Чахсы чуртассар, часкалығ чуртассар чіли, чол ниик нимес, неке. Пу даа сағыстар кӧбізіне таныс полар, че аннаң хатап танысханы пірдеезіне артых полбас.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде