ПӀС АМЫР ЧУРТАС ӰЧӰН
20.02.2018
Хабарлар
Митинг. Ирткен неделяда Ағбанда, чир-суубыстың тастында служба апарып, чуртастарын пир салған чааҷыларны хумартхылир кӱнге чарыдылған митинг ирткен.
Митингте Хакасия пазы Виктор Зимин, Ӧӧркі Чӧп кнезі Владимир Штыгашев араласханнар. Ідӧк хумартхылас мероприятиезіне кизек чаалазығларның ветераннары, Хакасияның кӱс структураларының тоғынҷылары паза чааҷыларның туғаннары килгеннер.
Иртеннең тимір чол вокзалы ибіре чаадаңар сарыннар истілген. Хумартхы тас хыринда оол-хыстар, хазна тастында служба апарып, чуртастарын пир салған чааҷыларның сомнарын тутханнар. Хайди таныхтааннар митингте, Россияның 20-21 вектегі тархынында кӧп махачы паза чобағлығ киректер полған. Анзы пістің чааҷыларыбыс чир-суубыстың тастындағы кизек чаалазығларда араласханынаң палғалыстығ. Чағынғы Востокта, Африка хазналарында, Ӱстӱнзархы-Іскеркі Азияда, Кореяның чарым олтырығында, Венгрияда, Югославияда паза Афганистанда Хакасияның ооллары чаа чахиин турыстыра толдырыбысханнар. Оларның махачызы хаҷан даа ундулбас. Чааҷы-интернационалисттер кӱні тиктең нимес 15 февральда таныхталча. Пу кӱнде 1989 чылда СССР-ның войсколары Афганистаннаң сығыбысханнар.
- Пӱӱн піс, чир-суубыстың тастында служба апарып, чуртастарын пир салған чааҷыларны хумартхылапчабыс, - чооғында таныхтаан Виктор Зимин. - Пістің чир-суғҷыларыбыс кӧп «ізіг точкаларда» служба апарғаннар. Олар, пасха хазналарға полызып, хазнабыстың кирексіністеріне турысханнар. Хумартхы таста пазылған 29 чааҷының махачызы тӧлдең тӧлге читірілзін, аннаңар мындағ мероприятиеде чииттер араласчатханы уғаа кирек. Олар пістің республиканың паза хазнабыстың таңдағызы полчалар. Пістің махачы чааҷыларыбыстың паба-іҷелеріне улуғ алғызым читірчем. Олар чир-суубыстың турыстығ чуртағҷыларын ӧскіріп алғаннар. Кизек чаалазығларда араласхан полған на чааҷы улуғласха турыстығ. Чуртастарын пир салған чир-суғҷыларыбыс хаҷандаа чонның сағызында халзын.
«Ізіг точкаларда» служба апарған чааҷылар амғы чииттерге кӧзідім полчалар. Олар чаа чахығларын толдырғаннар. Оларның махачызы Илбек Ада чаада чиңіс тутхан ағаларыбыстың махачызына тиңнелче. Кизек чаалазығларда чуртастары ӱзілген чир-суғҷыларыбысты хумартхылап, чыылысхан чон пір минута сым турған. Чааҷылар, салют идіп, автоматтардаң тигірзер атханнар.
Митингтің халғанҷызынзар чаахылар паза чыылысхан чон хумартхы тас алнынзар гирляндалар, веноктар паза чахайахтар салғаннар.
Хумартхылас мероприятиезі тоозылғанда, чон таразарға маңзырабаан. Кизек чаалазығларның ветераннары хумартхы тас хыринда сомға суурынғаннар. Ол туста мин Афганистандағы чаалазығның ветераны Иван Конусовнаң чоохтазып алғам.
- Тӧреен чирім - Киндірліг пилтірі аал. Службаа 1981 чылда хығыртылғам. Чаа ӱгредиин Туркменистандағы Теджен городта, танк полкында, ирткем. «Учебканы» иртібіскенде, пісті Афганистанзар ызыбысханнар, - чоохтапча Иван Васильевич. - Піс андар парарын азынада пілгебіс. Пасха хазнада служба апарарына ӧрінгебіс. Че, Афганистанзар читкенде, ӧрінізібіс чіт парған. Анда мин танк полкында служба ирткем. Пастап тирігзер снарядтар кирҷеңмін, соонаң механик-водитель полыбысхам. Пістің батальон Кандагар хыринда турған. Пӧгінібіс чаа колонналарын арачылиры полған. Кандагар хыриндағы пір орында «душманнар» колонналарны удаа сахтаҷаң полғаннар. Аннаңар анда чачырап парған кӧп техника турған. 1982 чылда ол орында пістің ротаның пір танкын чара чачырадыбысханнар, ӱс кізі палығлат салған. Армия соонаң мин Ағбанзар кӧскем, КПД заводында тоғынғам. Амды пӱдірігнең айғасчам.
Митинг соонаң ветераннар паза туған-чағыннары С.П.Кадышевтің адынаң культура кінінзер чол тутханнар. Анда оларға концерт кӧзіділген.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде