КӀЧӀГ ТӦЛГЕ ОЛ ХАҶАН ДАА КӦЗІДІМ ПОЛАР
21.02.2018
Хабарлар
Матырларыбыс. 15 февральда Асхыс аймааңдағы Ӱс чул аалда М.Е.Кильчичаковтың адынаң ортымах школа стенезіне хызылған чааҷы-интерңационалист, гвардияның улуғ сержанты, Хызыл Чылтыс орденінің кавалері Анатолий Бурнаковтың хумартхызына чарыдылған граниттең тимнелген хумартхы чарды азылған.
АДА ЧИР-СУУБЫСТЫҢ ТАСТЫНДА СЛУЖБА АПАРЫП, АНДАҒЫ КИЗЕК ЧААЛАЗЫҒЛАРДА АРАЛАСХАН ЧААҶЫ-ИНТЕРНАЦИОНАЛИСТТЕРНІ САҒЫСХА КИРҶЕҢ КӰНДЕ ӰС ЧУЛ ААЛДАҒЫ ШКОЛА ХЫРИНДА АВТОМОБИЛЬЛЕР ТОЛДЫРА ТУРЫБЫСХАН. ЧОН ДАА КӦП ЧЫЫЛЫС ПАРҒАН. ОЛАРНЫҢ АРАЗЫНДА АСХЫС АЙМААНЫҢ УСТАҒ-ПАСТАА КІЗІЛЕРІ ИЛЕЕДЕ КӦРІНЧЕ, ВОЕНКОМАТ ТОҒЫНҶЫЛАРЫН ДАА КӦР ТАБАРҒА ЧАРИР ПОЛҒАН.
ПРАЙ ПУ ЧОН ЧААҶЫ-ИНТЕРНАЦИОНАЛИСТ, ГВАРДИЯНЫҢ УЛУҒ СЕРЖАНТЫ, ХЫЗЫЛ ЧЫЛТЫС ОРДЕНІНІҢ КАВАЛЕРІ АНАТОЛИЙ БУРНАКОВТЫҢ ХУМАРТХЫЗЫНА ЧАРЫДЫЛҒАН, ШКОЛАДА ХЫЗЫЛҒАН ХУМАРТХЫ ЧАРДЫНЫ АЗАРЫНА ЧЫЫЛЫСХАН. МЫНДА ТАНЫХТИРҒА КИРЕК, ПУ МЕРОПРИЯТИЕНІ ИРТІРЕР ПАСТАҒНАҢ ХАКАС ТЕЛЕВИДЕНИЕЗІНІҢ ХАБАРҶЫЗЫ АЛЕКСЕЙ БОРГОЯКОВ СЫХХАН. ОЛ ПУОХ ААЛДАҢ. АЛЕКСЕЙ МИХАЙЛОВИЧ ЧИР-СУҒҶЫЛАРЫНЗАР ӰС ЧУЛДАҒЫ ШКОЛА СТЕНЕЗІНДЕ ХУМАРТХЫ ЧАРДЫ ХЫС САЛАРҒА ПАЗА ЧЫЛ САЙ МЫЛТЫХТАҢ АТАРЫНҶА МАРЫҒЛАР ИРТІР ТУРАРҒА ХЫЙҒЫНАҢ АЙЛАНҒАН.
Матыр чир-суғҷызының адын ундутпас айланысха чӧпсініп, аалдағы прай даа чуртағҷылар чапчаң ӱндескеннер. Ӱгретчілер, Анатолий Бурнаковнаң хада ӱгренген арғыстары, туған-чағыннары, пасхазы даа андағ чӧрімге хозылғаннар. Асхыс аймааның пазы Абрек Челтыгмашев ол сағысты чуртасха кирерге чахсы хабасхан.
Хумартхы чардыны азарына чарыдылған митингті школада хакас тілі уроктарын апарчатхан, Хакасияның саблығ ӱгретчізі Татьяна Тимофеевна Тюмерекова асхан. Ол, Анатолий Бурнаковтың чуртас чолынаңар хысхаҷахти искіріп, аалда мындағ танығлығ мероприятие иртірер пастағнаң сыххан ӱчӱн Алексей Боргояковха улуғ алғызын читірген, Алексей Михайлович пуох школада ӱгренгенін таныхтаан. Школа стенезінде материалнаң чабылған хумартхы чарды азылғанын чыылған чон айа сабызынаң удурлаан. Асхыс аймааның пазы Абрек Челтыгмашевке чоох тударға сӧс пирілген.
Абрек Васильевичтің чооғынаң, пу мероприятие республика синінде дее уғаа танығлығ полча. Анатолий Бурнаков - Ӱс чул аалның, прай даа аймахтың паза Хакасияның турыстыра оолғы. Аның Афганистанда махачы чааласханына амғы тӧл турызарға кӱстенче, оларға ол чахсы кӧзідім полар, олғаннар ағаа тиңнезерге, Чир-суубысха хынарға, патриотизмге ӱгренерге кӱстенерлер. Чиит тӧлні патриотизмге ӱгредерге пу уғаа чахсы кӧзідім полча.
Асхыс аймааның пазы ідӧк Алексей Боргояковтың хумартхы чардыны аалдағы школада азар пастаан, хайдағ улуғ тоғысты ол апарғанын таныхтаан. Аның тоғызы сылтаанда мында пу мероприятие иртче.
Митингте ідӧк чоох тутханнар Ӱс чулдағы школа директорының тоғызын толдырчатхан Алиса Никитична Туниекова, Ӱс чулдағы аал чӧбінің пазы Занета Ананьевна Ултургашева, Асхыс аймааның ӱгредіг управлениезі пастығы Ирина Петровна Кучугешева, Анатолий Бурнаков ӱгренген класстың устағҷызы Валентина Васильевна Бурнакова (ол орыс тілі уроктарын апарҷаң, амды тынаға сых парған), Анатолий Бурнаковтың пиҷезі Луиза Ананьевна Чебодаева.
Полғаны ла махачы чир-суғҷызының нымзах чӱреен, прайзына полызарға кӱстенгенін, олғаннарға ол хайдағ чахсы кӧзідім полчатханын таныхтаан. Прайзы даа матыр оолдаңар сағыстарын читір пирерге кӱстенген. Піреезінiң узун чооғын ведущайға тохтадарға даа киліс парчатхан.
Хумартхы чардыны азар пастағнаң сығып, аны чуртасха кирерге улуғ тоғыс апарған ӱчӱн, школа директорының тоғызын толдырчатхан Алиса Никитична Туниекова Алексей Михайлович Боргояковха алғыстас пічиин читірген. Школаның 8-ҷі класстағы ӱгренҷізі Артём Саражаков, матыр чир-суғҷызының чуртас чолын істезіп, улуғ тоғыс апартыр. Ол Анатолий Бурнаковтың чуртас чолынаңар толдыразынаң митингте искірген.
Митинг тоозылғанда, улуғлар, ӱгренҷілер спортзалда чыылысханнар. Анда ідӧк Алексей Боргояковтың кӱстенізінең пневматическай мылтыхтардаң атарынҷа Анатолий Бурнаковтың хумартхызына чарыдылған азых марығ пасталған. Анда аралазарға Таштыптағы 1 № школаның паза Мадырдағы ортымах школаның командалары килтірлер. Алексей Михайловичтің чооғынаң, амды мындағ марығ чыл сай Ӱс чулдағы школада иртіріл турар.
Мында чоохтирға кирек, пу иртірілген мероприятиенің улуғ тузазынаңар. Алғыс, улуғ алғыс Алексей Боргояковха, андағ хандыра пастағнаң сығып, аны читіре толдыр салған ӱчӱн. Амды чиит тӧлге кемнең тиңнезер матыр пар, аның ады хаҷан даа ундулбас. Олғаннарны Чир-сууна хынарға, патриотизмге ӱгредерге пу уғаа тузалығ полар. Пілдістіг, атысча марығларда чиңісчілер полар, оларға сыйыхтар читірілер. Марығ араласчылары Анатолий Бурнаков хайдағ мирген атыстығ разведчик полғанын чахсы пілерлер.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде