АНЫҢ ЧУРТАЗЫ - ЧОННАҢ ХАДА ПОЛАРЫ
27.02.2018
Хабарлар
Улуғларыбыс. Иван Никитич Абдорин Шира аймаандағы Хара кӧл аалда чуртапча. Ол чииттең ала уғаа ӧткін кізі. 80 час ас парған аға ам даа чон аразында удаа хайынча
Иван Никитичтің, иң пастап, чайаачы кӧңнінеңер чоохтап пирерге чарир. Улуғ частығ кізі тахпахтар пасча, анаң оларны позыох толдырча. Ол ыр-сарынға саарбах тузынаң сығара тартылған.
- Тӧреем мин Тоғырхы аалда. Саарбах тузым андох ирткен. Аалда клуб чох полҷаң, че чииттерге чыылысчаң орын кирек ле. Пістің чуртыбыс, тізең улуғ полған. Аннаңар ууҷам оол-хыстарға пісте чыылызарға чаратчаң. Олар тураның пирілген пӧлиин постары одынҷаңнар. Одыңны хада-пірге тимнеҷеңнер. Лампаа керосинні теестезіп ағылҷаңнар. Анаң тахпахтазар ползалар чи... Тус ирткенін дее сизінмин халҷаңнар. Таң чарып парза, ооллар інек саапчатхан хыстарны тоғысха пістеңӧк сығара ӱдес салҷаңнар. Чоохчыл аалдаң даа чииттер килҷеңнер. Мин, оларны кӧріп, ідӧк тахпахтабыс турҷаңмын, - сағысха кирче Иван Никитич Абдорин.
Чазы чит парған оол анаң армияа парыбысхан. Андартын айланғанда, Хара кӧл аалзар кӧзібіскен. Совхозта Иван Никитич итпеен тоғыс чох таа полар, неке. Ол хойлар хадарған, скотник полған. «Тимір аттар» тінін тутханох. Пастап тракторның, анаң таарлағ машиназының. Ағаа пызо даа хадарарға киліскен. Тынаға сығар алнында Иван Никитич совхоз ӱртӱнін хадарған.
Че хайдағ даа туста ол тахпахтирын тастабаан. Ручканаң чаҷын хада чох пол парза, сыхчатчан сӧстерін ол позы алынҷа хыңнан чӧрҷең. Анаң, ибзер киліп, тетрадьха пазыбысчаң. Аалдағылар аның чайаачы кӧңнің чахсы пілчелер. Аннаңар Иван Никитичті пайрамнарда аралазарға полған на сай хығырҷаңнар. Ползын ол аймах алай республика синіндегі ӱлӱкӱннер. Ол, улуғлан таа парғанда, пір дее ӱлӱкӱнні иртірбеен.
Хакас чонның съездінде Иван Абдорин, хызылларның ӱчӱн турызып, ас саннығ чир-суғҷыларының ағырсымнығ сурығларын кӧдірҷең.
Амғы туста, частан парып, Иван Никитич ибдең сыхпинча. Че сигізон час ас парған аға республикада полчатхан киректердеңер «Хабар» газета пастыра піліп алча.
- Чалғыс хакас газетаны мин хаҷаннаң алчам. Анда чапсых хабарларны хығырып аларға чарир, - ӱлесче ол.
Россиядағы киректердеңер, тізең, Хара кӧл аалның улуғ частығ чуртағҷызы ӧӧнінде телевизор пастыра піліп алча. Иван Никитич хазнабыстың таңдағызынаңар тың сағыссырапча. Аннаңар чағдапчатхан табығлар кӱніне матап тимненче.
- Хазна президентін чон позы таапча нооза. Мин чоннаң халарға пір дее сағынминчам. Хайдағ даа синніг табығларға чӧрчем. Орындағы табығ комиссиязының араласчылары анзын ідӧк чахсы киречілеп пирерлер, - чооғын тоосхан Иван Никитич Абдорин.
Автор :
Александра СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде