СЫН РОК МЫНДАҒ ПОЛАДЫР
06.03.2018
Хабарлар
Культура. «Иренек Хан» рок ӧменің концерті ирткен.
Пу наада В.Г.Чаптыковтың адынаң Хакас филармониязында хайхастығ концерт полды. Кӧрігҷілерні чайаачызынаң Россияа саблан парған «Иренек Хан» рок ӧме ӧріндірген. Чалахай иирге кӧп кізі килген, оларның аразында улуғ частығлар даа, чииттер дее полғаннар.
Концертті Хакасияның культура министрі Татьяна Чаптыкова асхан. Ол музыканттарны, тиксі Россиядағы «Наа чылтыс» марығда узын сынап, хазнаның иң артых пис араласчызы санына кіргенінең алғыстаан. Чоохтирға кирек, пістің чайаачылар 10 чыл пос алынҷа ойнааннар, че пылтыр кӱскӱзін Татьяна Чаптыкованың кӱстенізінең «Иренек Хан» ӧме Хакас филармониязынзар тоғысха алылған. Амды ол профессиональнай ӧме полча. «Иренек Ханда» пис музыкант: хоос устағҷы Игорь Колесников (барабаннар), ырҷы Юлия Тиникова, музыканттар Аржан Туденев (хай паза хакас чонның кӧг тиріглері), Алексей Брюханов (гитара). Ӧмеде улуғ нимес алызығлар пол парған, амды Иван Коловтың орнына бас-гитаранаң Антон Воронин ойнапча.
Ойын ікі чардыхтаң пӱткен. Аның пастағы чардығында чайаачы устар хакас, алтай, казах, орыс чоннарның сарыннарын толдырғаннар. Кӧгліг ырларға кізілернің кӧңні толған, улуғ нимес таныҷах сабылчатхан чіли пілдірген. «Хорту палых», «Тананой», «Хоора палых» шор сарыннары рок-музыканаң хада хандыра килісчеттірлер. Мында Юлия Тиникованы махтирға кирек. Ол, хаҷаннаң толдырчатхан ырларның наа оңдайын таап, залдағы чонны чапсытхан. «Кусни Корлан» казах ырны хайди ол морсымнығ сарнабысхан. Тӧӧ чирінең сыххан ырҷыны истіп, кӧрігҷілернің чӱрее-паары хайылған. Пу ырны «Иренек Ханға» толдырарға полысхан симфоническай оркестрнің виолончелизі Анна Худоярова. Аймах кӧг инструменттерін піріктіріп, ӧмедегілер ойнирға хынадырлар.
Музыкант паза хайҷы Аржан Туденев харындас чонның оолғы полча, аннаңар «Иренек Хан» алтай ырларын тӧреміл толдырча. «Алтайым» ырны сарнап, ол тӧреен чиріне, аның сіліг паза кӱстіг чонына хынызын читірген. Таныхтирға кирек, чайаачы ӧме, «Наа чылтыс» марығда аралазып, улуғ чидіге читкенде, «Алтайның чолмоны» республика газетазы Аржанға паза аннаң хада тоғынчатхан арғыстарына чарыдылған улуғ статья сығарыбысхан.
Концерттің пастағы пӧлиинің халғанҷызынзар «Иренек Хан» Виктор Цойның саблығ «Кӧӧк» ырын сарнаан. Аны пістің чайаачылар «Наа чылтыс» марығның таллағ чардығында толдырып, композитор, марығның жюризінің кізізі Максим Дунаевскийні саңай аптап алғаннар. Ол, сағыстарынаң ӱлезіп, таныхтаан: «Сын рок мындағ поладыр».
Антракт соонда артисттер, сценазар сығып, ӧӧнінде эстрада ырларын сарнааннар. «Город обмана», «Помолимся за родителей» ырлар кӧрігҷілернің кӧңнін кӧдіргеннер. Че минің хайиимны «Алтон алып» музыка пьесазы тартхан. Аны композитор Татьяна Шалгинова шоорнаң фортепианоға пас салған. Сіліг кӧӧ кізіні часкалығ олған тузынзар, хаҷан-да кӧрген сіліг тӱстерзер айландырча. Хакас кӧгҷінін тоғызын изебі чох таланттығ музыканттар шоор, тимір хомыс, барабаннар паза гитаралар полызиинаң чалтырама толдырыбысханнар. «Иренек Ханның» репертуары улуғ, андар пістің композиторларның чайаачы тоғыстары кірчеткені махтағлығ.
«Сарын сарназа» паза «Айдым» тахпахтар чох «Иренек Ханның» концерттері иртпинче. Ол тахпахтарны хакас тілінең чоохтаспинчатхан даа улус чахсы пілче полар. Концертті музыканттар Игорь Корниловтың «Хайдазың син, хыныс?» сарынынаң тоозыбысханнар. Ол ырны «Иренек Хан» Россия марииның чарым финалында паза финалында толдырғаннар. Юлияның сіліг ӱні, залға чайылып, кӧрігҷілернің чӱреен кӧӧреткен, таңдағызына ізеніс пирген.
«Иренек Ханның» чалахай иирі пӧзік синде ирткен. Кізілер артисттерні уғаа чылығ удурлааннар. Полған на сарын соонда олар чайаачы устарға алғызын хазыр айа сабызынаң читіргеннер. Чалахай иир тоозылғанда даа, кӧрігҷілер, концертті ӱзӱріп, таразарға маңзырабинчатханнар. «Иренек Хан» ӧме чир-суғҷыларын узынаң чапсытхан, ӧрініс сыйлаан. Мыннаң мындар артисттер ідӧк хынығ ойыннарнаң хайхадарлар тіп ізенчебіс.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы