ЧЫЛ ПАЗЫНЫҢ ХООС ТЫНЫЗЫ
21.03.2018
Хабарлар
Кӧзідіг. С.П.Кадышевтің адынаң культура кінінде хоостар кӧзідии азылды.
Кӧзідіг. С.П.Кадышевтің адынаң культура кінінде хоостар кӧзідии азылды.
Чыл пазы ӱлӱкӱнге удур С.П.Кадышевтің адынаң республикадағы культура кінінде ӱс кӧзідіг азылды. «Хакасияның сувенирлері» республикадағы кӧзідіг-марығ тоғызын пастады. «Тустар палғалызы» хакас хоосчыларның тоғыстары паза сомҷы Юрий Амосовтың сомнары пу улуғ кӧзідігде араласчалар.
Мындағ кӧзідіглер хоосчыларның паза пос узаныс искусствозын тилідер пӧгіннең иртірілчелер. Пӱӱнгі кӱнде мында илееде ус араласча. Олар - пос хынғанни чайаачы тоғыснаң айғасчатханнар паза пӧзік ӱгредігліг устар.
«Хакасияның сувенирлері» кӧзідіг-марығны иртірері кибірге кір парған. Анда 16 частығдаң пасти араласчалар. Аймах номинациялар чарлалған. Соонаң жюри таллап алған иң чахсы тоғыстар устарынаң сувенирлерні алғым тимнирдеңер чӧптезіг иділер.
Культура туразының улуғ залынын фойезін хоостар чазапчалар. 17 хоосчының 70 азыра тоғызы сығарылтыр. «Тустар палғалызы» кӧзідіг килістіре адал парғанын таныхтирҷыхпын. Мында ӧӧнінде чир-чайаан хоостары полған.
Россияның Хоосчылар пірігізінің кізізі Виталий Кызласов наа авторлар хозылчатханын таныхтаан. Ол кӧрігҷілернін хайиин Олег Марткачаковтың ипчі пазы чайалған скульптураа хайығ айландырған, пӧзік синде толдырылған тіп чоохтаан. Ідӧк философия наукаларының докторы Лариса Анжиганованың тоғыстарын махтаан. «Хайдаң мындағ сағыс-кӧрістер тӧріпче, пу кізіні хайхатча, - теен Виталий Николаевич. - Лариса Викторовнаның тоғыстары кізіні тирең сағысха тӱзірче».
Сыннаң даа, Л.В.Анжиганованың улуғ нимес синніг тоғыстары постарынзар пілдізі чох кӱснең тартчалар. Олар обырастарға тӧӧйлер. Философ кӧрістіг пос оңдайли хоостапчатхан ус «Оӧркі чарғыҷы», «Монах», «Ымай», «Хам» омаларын чайап салтыр.
Лариса Баканованың ікі хоозы кӧзідігні чазапча. Пастағы тоғызы кӧзідігде иң улуғ хоос полған, анда ӱс кӧзее чайалых. Кӧзеелернің пір сари тигір кӧк ӧңнең, пасха чамдығы хызамдых ӧңнең сырлалтыр. Мин пу хоостың адын читіре хығырбин, тирең сағызын оңар полбин салғам. Анаң хоосчы-автор «хараамны ас пирген» тиирге чарир. Хоос «Ікі танығлығ кӱн. 17.08.2009 г. - 12.04.2015 г.» толдыразынаң адалча.
- 2009 чылдағы 17 августты прайзы пілче, Сойан-Сус ГЭС-та улуғ саай полған, - чоохтаан Лариса Баканова. - 12 апрельдегі ӧрттер ідӧк сағызыбыста хаҷанға даа халар. Піди сағынза, пӱӱнгі кӱнде андағ нимелер полбасха кирек, че мында чир-чайаан, кізі паза экология сурығлары сығыс килче. Мин пу хоосты ГЭС-ты стене чіли турыбысхан суғнаң кӧзіт салғам, ідӧк ӧрт-чалынны кӧрчезер. Ортызындағы пурунғы кӧзеелер - ундулбас тархынны таныхтапчалар.
ГЭС-тағы саай полар алнында Лариса андар экскурсияа чӧртір. Че ибзер айланар тус читкенде, ноға-да хумартхы чіли турғызылған суғда арачыланҷаң тегілек ӱт ӧтіре ГЭС-тың килкім кӧрімін сомға суурып алтыр. Ноға андада іди тудынғанын амға теере піл полбинча.
Россияның Хоосчылар пірігізінін кізізі Марат Бурнаковтың «Мадыр суғ хазында», «Асхыс аал хыринда» хоостары чылығ тустар чағдапчатханын таныхтапчалар. Пасха даа авторларның пейзажтары чылның аймах тустарынаң харах ӧріндірчелер. Геннадий Коковтың «Часхы» хоозында кӱн сустарына «чалғаттырған» кӧртік алтынаң сарығ оттығ чир сыға салғаны уғаа киртістіг чайал партыр.
Кӧзідіг 30 апрельге теере тоғынар. Хоостарны кӧріп алза, андар хати айланарың килче, уғаа чахсы паза наа тыныстығ кӧзідіг.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы