ЧУРТАҒҶЫЛАРҒА ӦРІНІС СЫЙЛИРҒА КӰСТЕНЧЕЛЕР
23.03.2018
Хабарлар
25 мартта - Культура тоғынҷызының кӱні. Асхыс аймаандағы Ӱс чул аалның Культура туразынаң ікінҷі чылы устап парир Светлана Боргоякова. Анда ол наа кізі нимес, 2004 чылдаң сығара Культура туразында режиссер полған.
Ааллардағы культура учреждениелеріне ахча чидіспинчеткеннеңер сыбыра чоохталча. Андағ кирек пістің республикада ла нимес, Россияның пасха даа илееде регионында таныхталча. Аннаңар пу сферадағы оой нимес оңдайларда тоғынчатханнарны чахсы саринаң на таныхтирға кирек тіп санапчам.
Ӱс чулдағы Культура туразынзар кіргенде, анда тың на истіг пілдірбеен. Вестибюльда соох, коридорларында харасхы, ізіктер пиктіг. Тасхар ікі тоғысчы ағас чардылардаң хайдағ-да рама тимнепчелер. Тастынаң тура улуғ, морсымнығ даа кӧрінче. Мындағ улуғ Культура туразында чонға хайдағ мероприятиелер иртірілчеткенін, учреждениенің тоғызын піліп алар сағыснаң аның устағҷызын тілепчем.
Таап алдым. Улуғ нимес сӧрӧн кабинетте директор Светлана Боргоякова стол кистінде одырча. Чарытхыдаң чылытчаң прибор тоғынча. Устағҷынаң танызып алдыбыс. Светлана Семёновнаның чооғынаң, аалдағы котельнай школаа, ДК-ға, интернатха чылығ пирче, че аның пирчеткен кӱзі чидіспинче осхас, чылытчаң оборудование дее иргілен парған, кӧзенектердең, ізіктердең соох кірче. Пластик кӧзенектер турғызарға ахча кӧріл парған, пӱӱл наа кӧзенектер турғыс саларға киректер.
Пу культура учреждениезі толдыразынаң «Ӱс чулдағы кибірліг культураның «Солбан» кіні» адалча. Анда чайаачы тоғыснаң 12 кізі айғасча: хоос устағҷы, декоративно-прикладной искусство устағҷызы, музыка устағҷызы паза пасха даа кружоктарның устағҷылары. Ідӧк аалда музыка школазы тоғынча, ол аал чӧбі туразының пастағы хадылында орныхча. Ахча киреенең сидіксіністер полчатханда, кӧбізіне чарым ставкаа тоғынарға килісче. Амды чал ахчазы кӧдірілер тіп ізендірчелер. Культура кіні мының алнында бюджет учреждениезі полған, ам аны казённай ит салғаннар.
Ӱс чулдағы аал чӧбіне илееде ааллар кірче: Чоғархы Тӧӧ, Оот пилтірі, Илимор, Полит, Индіркі Тӧӧ. Хайзында постарының клубтары пар, Полит аалда - чоғыл. Индіркі Тӧӧде клуб пӱдірерге ахча позыдылтыр, че ол читіре пӱдірілбеен.
Хайди культура кінінің директоры таныхтаан, чуртаста ниме дее полза, культура тоғынҷылары аал чуртағҷыларына ӧрініс ағыларға кӱстенчелер. Прай ӱлӱкӱннерде улуғларға даа, чииттерге дее ӱтертістіг мероприятиелер иртірілче. Итсе, аалларда ӧӧнінде пенсионерлер, тоғыс чохтар ла хала парчалар. Чииттернің кӧбізі вахта оңдайынаң анда-мында тоғынча. Кирек андағ даа полза, ДК-да полған на субботада дискотека, теелбек мероприятиелері иртірілче.
Светлана Семёновна тоғызына хынчатхан, ағаа пирін салған кізі чіли пілдірген. Таңдағы кӱнзер киртініснең кӧрче, планнары, пӧгіннері кӧп. Чайаачы тоғысты мыннаң мындар улам тилідерге кӱстенче. Амды культура кінінің ӧмезі хакастарның кибірліг ас-тамаан тимнирінҷе пірдеезіне тӧӧй нимес, постарының брендін сағын таап аларға пӧгін тутча.
- Піс ам Потхы пайрамын позыбыстың бренді идіп аларға сағынчабыс. Пастап аны Аал ӱлӱкӱнінде иртірерге, анаң - аал чӧбіне кірчеткен аалларда, аның соонда аймах синіне сығарға пӧгінчебіс. Сағыс полған Талған пайрамын сығарарға, че пісті Казанов аалдағылар пуруннабысханнар. Айран пайрамын «Хуртуйах тас» музей иртірче, сағыс полған Чей пайрамын бренд идіп аларға, анзын, тізең, библиотекалар иртірчеттірлер, - чоохтаан Светлана Семёновна.
Мындағ чайаачы пӧгіннер постарының алнында культура кінінің тоғынҷылары турғысчалар. Хакас чонның ас-тамаан постарының бренді идіп алары - уғаа чахсы сағыс. Аны олар Тросинге алай Аал ӱлӱкӱнінде кӧзідерлер. Ідӧк ӧме пасха даа кӧп ойын кӧзідерге план тутча. Прай ойыннар хакас тілінең иртірілер. Хайди чоохтапча Светлана Боргоякова, олар хакас тілін пӧзік синге кӧдірерге, прайзын аннаң чоохтазарға кӧніктірерге сағынчалар. «Пістің аалда финнернің ӱс сӧбірезі чуртапча, оларның палалары хакас тілінең пістің чоннаң даа артых чоохтасчалар. Пос тілін тилідерге, аны, чідірбин, хайраллирға кирек», - тіпче Светлана Семёновна.
Хайди аннаң чараспассың.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде