СУҒ ТАЗАРЫНАҢ ТОҒЫР ПРАЙ КӰС САЛАРҒА
27.03.2018
Хабарлар
Чыылығ. Ирткен неделяда МЧС-тың Хакасияҷа ӧӧн управлениезінде Хакасия пазының орынҷызы Владимир Крафт сағыбаан саайларҷа комиссия (КЧС) чыылиин иртірген.
Пу кӱннерде республиканың пірее аалларында суғ, тазып, тураларзар читкен. Хайди таныхтаан Владимир Крафт, киректер сидік парча, че хорғыс чоғыл. Тӧрт аймахтағы (Асхыс, Алтай, Шира паза Пии) тоғыс аалзар суғ чит килген. Иң сидік киректер Пии аймаанда парча. Суғ 78 тура хыринзар читкен.
Чыылығда искірілген, Ағбан пилтірі аймаандағы Пӱӱр пилтірі аалда 16 ӱӱҷік суға кір парған. Пазағы кӱнінде ол син сыххан. Московскай аалда ікі ӱӱҷікте суғ турған, аны ағызыбызар тоғыс апарылған.
Ағбан пилтірінде улуғ суғ четверг-пятницада турған, че субботада ӱӱҷіктерзер кірген суғ сығарылған. Прай суғны сығарар тоғысха суғ тартчаң ӱс автомобиль, ӱс самосвал паза грейдер тартылған.
Асхыс аймаандағы Хамыстығ станцияда суғ сигіс тураның подвалынзар кірген. Суғны сығарар тоғыстарға аал чуртағҷылары, тимір чол тоғынҷылары паза идінҷектер хозылғаннар. Андар суғ тартчаң тӧрт машина ызылған.
Полтах аалда суғ тӧрт тураа читкен. Анда ікі трактор паза 15 кізі тоғынған. 24 мартта кӧдірілген суғны пасха чолҷа ағысханнар. Индіркі Тӧӧде пір участок суға кір парған, че тураа читпеен. Анда экскаватор тоғынған.
Иң сидік кирек Пии аймаанда полған. Мында суғ 22 мартта чайыл сыххан. Пии аалда суғны тохтадар тоғыстарға аймах администрациязы паза аал чӧбі хозылғаннар.
24 мартта Новокурсктаң искіріг кірген. Анда ікі орамадағы 21 туразар суғ читкен. Андар кирек техника ызылған. Фермер суғ каналынзар хар тӧк салған сылтаанда, суғ аалзар пар сыххан. Саай салтарларын чох идерінде тӧрт техника тоғынған. Ідӧк Новониколаевкадағы ікі туразар суғ читкеннеңер искірілген. Андар суғ тартчаң ікі машина ызылған. Ідӧк Куйбышев аалда ікі участок суға кір парған. Анда тоғыстар аал чуртағҷылары кӱзінең толдырылған. Ідӧк Сабинка, Табат, Бондарев аалларда чайылған суғ сығарылған.
Роспотребнадзорның Хакасияҷа управлениезінің устағҷызы Татьяна Романованың чооғынаң, суға кір парған тураларда ісчең суғнаң тузаланарға чарадылбинча. Аннаңар чуртағҷылар ідістердегі ле суғнаң тузаланарға киректер. Суғ син парза, кізілер тузаланчатхан суғ орыннарында оохчаң нимелерні чох идер сурығлар ӱзӱрілер.
Чыылығда министерство-ведомстволарға паза пос устаныс органнарына суғ тазарынаң тоғыр мероприятиелерні прай толдырыбызарға чахығ пирілген. 30 мартха теере Хакасияның сағыбаан саайлар полдыртпас пірге тоғынчатхан системазы тыыдылған режимде тоғынар.
Киҷеегі танығлардаң, Алтай, шира аймахтарында паза Саяногорскта тура участоктарынзар суғ кірері тохтадылған. Асхыс паза Пии аймахтарында суғ тазарынаң тоғыр мероприятиелер ам даа апарылча.
Че олох туста Хакасиязар улуғ хар читкен. Анзы муниципалитеттерге пазох хорғыс ағылча. Суғ сині хараа-кӱнӧрте сыныхталча. Чуртағҷыларға ораларда хайраллалчатхан ас-тамахты хуруғ орынзар кӧзірібізерге чӧп пирілче. Ідӧк тура хыриндағы харны, канаваларны арығлабызарға кирек. Участоктардаң суғны ағызарға ідістер, электрона-состар паза кӱрҷектер тимнеп салыңар. Ибде мебельні полдаң кӧдірібізіңер, улуғ хайығ электроприборларға айландырарға кирек.
Суғ кӧдірілчетсе, ӧрт ӱзірҷеңнер паза арачылағҷылар службазынзар 101, табырах полызығ пирҷең службаларзар 112 номерлерҷе алай пірге тоғынчатхан диспетчер службаларынзар (ЕДДС) сығдырадыңар.
Алтай аймаандағы ЕДДС - 8(39041) 2-16-41;
Асхыс аймаандағы ЕДДС - 8(39045) 9-23-04;
Пии аймаандағы ЕДДС - 8(39044) 3-00-09;
Шира аймаандағы ЕДДС - 8(39035) 9-11-06.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы