ЧАСХЫ ООЙ ИРТПЕЕДЕГ
28.03.2018
Хабарлар
Чыылығ. Киҷее Хакасия правительствозының чыылии ирткен. Анда республиканың чуртазына хорғыс ағылчатхан прай сурығлар ӱзӱрілген. Чыылығны Хакасия пазының пастағы орынҷызы Олег Нам апарған Чыылығны пастап, Олег Нам 25 мартта Кемеровтағы садығ-ӱтертіс кінінде полған чобағны сағысха кирген. Анда улуғ ӧртте кӧп кізі, ол санда палалар, ӱреен. Кузбасста ӱс кӱнге траур чарлалған. Чыылығ араласчылары, ӱрееннерні хумартхылап, пір минута сым турғаннар.
Пастағы сурығҷа сӧс пирілген Хакасияҷа МВД-ның полиция пастығының тоғызын толдырчатхан Евгений Копыловха. Полиция устағҷызы пу айда хайдағ сайбағлар республикада полғаннаңар искірген. Ол кӧп саннар адаан, олар пылтырғы пуох тустағы тиңнестірігнең пирілгеннер. Іди мартта Хакасияда 581 сайбағ иділген, оларның 416-зы ілезіне сығарылған. Кӱҷӱрлер республикада кӧп хайынчаттырлар, іди 42 кӱҷӱрлес санға алылған, 18 кӱҷӱр тутыртыр. Чолларда полчатхан саайлар саны хызырылчатханы таныхталча.
Копыловтың чооғынаң, апрельде полиция чонның амыр чуртазын хадағда тудар тоғыс апарар. 1 апрельде Тал пазы таныхталар, 8 апрельде - Хызыл нымырха, 17 апрельде - Хара нымырха. Прай ол ӱлӱкӱннерде полиция тыыдылған режимде тоғынар.
Хакасияның гражданскай арачыланысча, сағыбаан саайларҷа паза ӧрттердең хорғыс полдыртпазынҷа управление пастығы Николай Старков суғлар тасчатханынаң тоғыр хайдағ мероприятиелер апарылчатханнаңар искірген. Аның таниинаң, чылығ кӱннер турыбысханда, хар хайылып, суғ Алтай, Асхыс, Пии, Таштып, Ағбан пилтірі, Шира паза Орджоникидзе аймахтарындағы аалларзар кірген. Амды Алтай, Шира, Асхыс аймахтарында чайылчатхан суғны тохтадар тоғыстар тоозылған.
Пии аймаанда тасчатхан суғлардаң тоғыр мероприятиелер ам даа узарадылча. Хар хайылғанда, Пии, Куйбышев, Новониколаевка, Новокурск, Новотроицкай, Солбы аалларда 73 тураның подвалынзар паза 41 участоксар суғ кірген. Андағы тоғыстарда министерство-ведомстволар устағҷылары, арачылағҷылар, ӧрт ӱзірҷеңнер, чааҷылар даа араласханнар. Прай 100-че кізі паза 37 техника тоғынған. Подваллардаң суғны насостар полызиинаң ағысханнар, хоза каналлар хазылған, дамбалар кӧдірілген. 26 мартта Новокурскта ікі участок ам даа суға пастырча, Новониколаевкада - тӧрт, Пииде - ӱс участок, Новотроицкайда - 37 участок. Тоғыс ам даа узарадылча.
Пии аймаандағыларны ӱр нимеске кӧзірерге ӱс пункт тимнелген. Че пір дее муниципалитетте кізілерні кӧзірерге киректелбеен. Полған на чуртағҷынаң алынҷа тоғыс апарылған. Амды муниципальнай пӱдістерде хайдағ ӱрег иділгенін паалир комиссиялар тоғынып пастапчалар. Сыныхтағлар соонда комиссия ӱреге кіргеннернің списогын тимнир, оларға ахчалығ полызығ пирілер.
Андағ чахығ пирген Хакасияның пазы Виктор Зимин.
- Туралары, участоктары суға пастырған кізілерге полызығ полар. Пірдеезі хайығ чох халбазын. Сидік туста Хакасияа сыбыра полызығ килҷең. Кӱскӱде, ирте хар чаап парғанда, аал хонии тоғынҷыларына улуғ полызығ пиргебіс. Амды, суға пастырып, хыйалға кіргеннерге ідӧк полыс пирербіс, - таныхтаан Виктор Зимин.
Пу тусха ӱреге кірген 219 кізіліг список тимнелген, оларға 1 миллион 125 муң салковайлығ полызығ полар.
Пӱӱн паза таңда Хубачар паза Абаза хыринда Ағбан суғдағы пус чара чачырадылар. Ол мероприятиелер, пус хайылып ин сыхса, тулғорлар полдыртпас пӧгіннең иртірілче. Чара чачырас тоғыстарын толдырарға Кемеров облазындағы организациянаң чӧптезіг иділген. Аның тоғынҷылары чара чачырас тоғыстарын апарарға тимделер.
МЧС-тың Хакасияҷа Ӧӧн управление пастығы Александр Мулл республикадағы садығ-ӱтертіс кіннерін сыныхтир мероприятиелердеңер чоох апарған. Хайди ол таныхтаан, Хакасияда 14 андағ кін тоғынча: Ағбанда - 11, Саяногорскта - 2, Харатаста - 1. Кӧбізін МЧС тоғынҷылары сыныхтабысханнар, халғаны чағынғы туста сыныхталар. Сыныхтағлар прокуратура органнарынаң хада апарылча. Идінҷектерні планға кирілбеен оңдайнаң сыныхтирға чарадылбинча, аннаңар оларны сыныхтирға Россияның Ӧӧн прокуратуразының чарадии киректелче. Андағ чарадығ республиказар ызылтыр.
Республиканың транспорт паза чол хонии министрі Олег Тропиннің чооғынаң, улуғ хар чаап парыбысханда, чолларда айғы пол парған. Подряд организациялары хараа-кӱнӧрте чолларны хардаң арығлапчалар, айғыдаң тоғыр материаллар чолға чайчалар. Пии паза Алтай аймахтарындағы Хубачар - Пии - Асхыс, Пии - Очыр, Хубачар - Аршаннар - Пии паза Ағбан - Саяногорск чоллар арығлалған. Асхыс аймаанда Ағбан - Палыхтығ суғ паза Ағбан - Тӧӧ пазы чолларда автобустар чӧрізі азылған. Пірее орыннарда тасчатхан суғ чол азыра аххан. Алтай, Пии паза Таштып аймахтарында 39 техника тоғынча. Ідӧк чол техниказы суға пастырчатхан аалларға полызарға ызылған. Чолларда тоғыс ам даа узарадылча.
Чыылығда ідӧк чоох тутханнар Хакасияның чир-чайаан ис-пайы паза экология министрi Юрий Соколов паза пӱдіріг паза ЖКХ министрі Валерий Келин. Юрий Соколов ӧрттердең тоғыр тимненіс тоғыстары хайди апарылчатханнаңар искірген, Валерий Келин хысхыда котельнайларда хайдағ саайлар, тудығлар полғаннаңар чоохтаан.
Чыылығны тоозып, Олег Нам Боград аймаан тилідеріне хайығ айландырған. Хакасияның пазы ол сурығны кӧдірче. Ідӧк прайзына, пос салынмин, саайлар полдыртпазына азынада тимненерге кирек полчатханын таныхтаан. «Прайзы сыбыра пӧзік тимненісте ползын», - теен Олег Нам.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде