ХАКАСИЯНЫҢ АБАХАЙЛАРЫ МАРЫҒА ТИМНЕНЧЕ
30.03.2018
Хабарлар
Таллағ. С.П.Кадышевтің адынаң культура паза чон чайаачызы кінінде «Хакасияның пастағы короназы-2018» марығда аралазарға сағынчатханнар аразында таллағ ирткен.
Хакасияның национальнай политика паза культура министерстволары чииттер киреенҷе хазна комитеді хабазиинаң «Хакасияның пастағы короназы-2018» марығны пӱӱл пастағызын на иртірерлер. Марығның тӧстегҷілері - «Асхыр» хакас чииттернің халых пірігізі, Ағбанның абахайлар паза чайаачылар академиязы.
Таллаға илееде кізі килген. Марығда аралазарға сағынчатханнарның кӧбізі улуғ класстарның ӱгренҷілері паза студенттер. Школаа парғалах паза кічіг класстарда ӱгренчеткен хызыҷахтар тың кӧп полбаан.
Оларнаң хада іҷелері, ууҷалары килгеннер. Прай араласчылар спортнаң алай искусствонаң айғасчалар. Полғанына ла постаңар чоохтирына ікі минута пирілген. 1-ғы класстың ӱгренҷізі Эркелей Тюньдешева, «Алтын Арығ» алыптығ нымахтың ӱзігін кӧрбин хығырып, жюринің хайиин тартхан. Эркелей «Айас» теелбек ансамбльына ӱзінҷі чылы чӧрче, ідӧк хоостирға паза сарнирға хынча. Пу марығда аралазып, сценада орта тудынарға ӱгреніп аларға паза позын кӧзіт пирерге сағынча.
- «Хакасияның пастағы короназы» марығның ӧӧн пӧгіні - пістің республикада чуртапчатхан чоннарның культуразынаң таныстырары. Мында аймах чоннарның иң сіліг, ӧткін чайаачы хызыҷахтары паза хыстары аралазар. Пастағы орын алған кізі «Мисс Волга» тиксі Россиядағы марыға парар. Таллаға килгеннер уғаа чахсы тимнен килтірлер. Прайзы уғаа сіліглер паза чайаачы оңдайлығлар. Хызылдаң араласчылар килерге кирек полғаннар, че кил полбааннарында, сомнарын ыс пиргеннер. Олар, кастингке килбин, заочно араласчалар. Таллағда алты хакас хыс паза кічіг частығ хызыҷахтар полғаннар. Хакас хыстарнын мындағ улуғ марығда аралазары ӧріндірче, - сағыстарынаң ӱлескен жюри кізізі Айла Тюньдешева.
Таллағны иртібіскеннерні Ағбанның абахайлар паза чайаачылар академиязы пір ай чарым марыға тимнир: теелбектенерге, орта чоохтанарға, сценада ізестіг тудынарға, сырланарға ӱгредерлер. Оларға ідӧк экскурсиялар паза аймах-пасха мастер-класстар иртірілер.
Н.Ф.Катановтың адынаң Хакас хазна университедінің ӱгретчілер тимнеҷең колледжінің студенті Алина Аскаракова школада ӱгренчеткенде, абахайлар марығларында аралазып, ікінҷі паза ӱзінҷі орыннар алған. Че мындағ улуғ культура мероприятиезінде пастағызын на аралазар.
- Пу марығда кӱзімні сынап кӧрерге пӧгінчем. Мында аймах чоннарның абахайлары, аралазып, пос культуразынаң таныстырарлар.Марығ хынығ иртер тіп сағынчам. «Хакасияның пастағы короназы-2018» марығда хакас хыстар кӧп арах араласхан полза, уламох чахсы поларҷых, - таныхтаан Алина Аскаракова.
«Хакасияның пастағы короназы-2018» марығның финалы 5 майда иртер. Амды, тізең, марығ араласчылары марыға матап тимненерлер. Мероприятие чайаачы олғаннарның паза чииттернің устарын уламох тыыдар.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде