ӰГРЕНҶІЛЕРНІҢ ЧИДИИ - ӰГРЕТЧІЛЕРНІҢ ӦРІНІЗІ
30.03.2018
Хабарлар
Ӱгредіг. Екатерина Фёдоровна Шушеначева Хара кӧлдегі ортымах школада директор тоғызын 2017 чылның 2 ноябрьынаң толдырча. Аның алнында ол пуох школада завуч полған.
Амғы туста Хара кӧлдегі школада 156 пала ӱгренче. Оларның чарымызы - хакастар. Школада 20 ӱгретчі паза ікі устағҷы тоғынча. Ӧӧн предметтердең пасха уроктағы нимес ӱгредіг апарылча. Анда олғаннар Хакасияның чир-чайаанын, тархынын паза амғы чуртазын ӱгренчелер.
- Школада олғаннар хакас тілін ӱгренминчелер, - чоохтапча Екатерина Фёдоровна. - Мының алнында Сеектіг аалдағы школа пістің филиалыбыс полған. Анда хакас тілі уроктары иртірілҷең. Ӱгренҷілер саны хызырыл сыхханда, ол школа чабыл парған, че ӱгретчілері пістің школада тоғынчалар. Амғы туста пістің школаның Тоғырхы аалдағы филиалында хакас тілі апарылча. Олғаннарны Мария Александровна Тайдонова ӱгретче.
Хара кӧлдегі школада хакас тілін кирерінең паба-іҷелер тоғырлар. Аалда интернат чохтаңар, олғаннарны Чабак, Сеектіг, Талкин хара суу ааллардаң кӱннің тарт чӧрчелер. Тӧреен тіл кирілзе, олғаннарға неделяда алты кӱн ӱгренерге килізер. Че пірее паба-іҷелер палалары хакас тілін, культуразын, тархынын пілзіннер тіп сағынчалар. Директорның таниинаң, школада кочегар полып тоғынчатхан орыс ирен хакас тілін ӱгренерге кӱстенче. Аннаңар ол школада хакас тілі уроктары иртірілзін тіп сағынча. Пазағы ӱгредіг чылына паба-іҷелер хакас тілін кирерге сурынзалар, оларның сурынызы толдырылар.
Пос туста олғаннар волейбол паза баскетбол секцияларына чӧрчелер. Оларны физкультура ӱгретчізі Николай Анатольевич Янгулов иртірче. Уроктар аразында олғаннар ідӧк стол теннизін ойнапчалар. Теннис столы школанын коридорында турча.
- Пістің ӱгренҷілер Ширазар аймах синіндегі спорт марығларына чӧрчелер, чооғын узаратча школа директоры. - Кӱскӱдегі кросста сыйыхтығ орыннарға турысханнар. Че ойыннығ спорт кӧрімнерінҷе марығларға чӧрбинчелер. Пістің школада пала асхынах ӱгренчеткеннеңер, командалар чыып аларға сидік.
Хара кӧлдегі школаның ӱгренҷілері аймах ӱгредіг марығларында, олимпиадаларда араласчалар. Математикаҷа олимпиаданың школа синіндегі чардығын утхан 10-ҷы класстың ӱгренҷізі Артём Попов аймахтағы олимпиадада ідӧк чиңіс тутхан. Республика синінде ол ӱзінҷі орынға сыххан. Паза Артём физикаҷа республика синінде В.И.Вернадскийнің адынаң наука-практикалығ конференцияда араласхан. Аны физика ӱгретчізі Ольга Олеговна Янгулова тимнеен.
- Аймах синіндегі конференцияда пістің школадаң тӧрт ӱгренҷі араласхан, - таныхтапча Екатерина Шушеначева. - Пірсі физика предмедінҷе араласхан, ікізі математикаҷа паза пір олған - географияҷа.
География предмедінҷе араласхан ӱгренҷі Вадим Иванов ӱгретчі Наталья Анатольевна Чирвонның устаанынаң Хакасияның чир-чайаанын істескен. Істезіг материалы чахсы полған, че Вадим конференция оңдайларын тооза толдырбаан, аннаңар ол аймах синінде сыйыхтығ орынға сых полбаан. Ідӧк конференцияда 11 класс ӱгренҷілері Ксения Козлова паза Александр Барабанов араласханнар. Оларны математика ӱгретчізі Нина Петровна Иванова тимнеен. 2015 чылда биология ӱгретчізі Екатерина Петровна Тарасова ӱгренҷі Мария Шушеначеванаң наука-практикалығ конференцияньщ «Тіріг биология» секциязында пастағы орынға турысханнар.
Хайди таныхтапча Екатерина Фёдоровна, олғаннар, аймах конференцияларда аралазып, чахсы ӱгренерге кӱстенчелер. 2015 чылда Мария Шушеначева школаны алтын медальға тоосхан. Амды ол Сибирьдегі федеральнай университеттің Хызылчардағы нефть паза газ институдында ӱгренче. Ідӧк 10 класстың ӱгренҷізі Артём Попов алтын медальға парча. Че ачырғасха, алтын медальға парчатхан Елена Бурикова, 9 класс тоозып, Ширазар ӱгренерге парыбысхан.
Ӱгретчілер школаны тоосхан олғаннар хайдар ӱгренерге парчатханын сыбыра хайығда тутчалар. Тоғыс классты тоосхан оолларның піреезі Ширадағы аал хонии техникумынзар ӱгренерге кірче. Хызыҷахтар - Ағбандағы училищелерзер. 10-11 класстарға саннығ ла ӱгренҷі парча. Амды Хара кӧлдегі школада 11 класста сигіс олған ӱгренче. Оларның піреезі пӧзік ӱгредіг аларға пӧгінче.
- Вячеслав Власов паза Александр Барабанов МЧС-тын Сибирьдегі Железногорсктағы ӧрт ӱзірҷең-арачылағҷылар академиязынзар кірерге пӧгін тутчалар. 2014 чылда школаны тоосхан Кристина Шенкнехт Хызылчардағы имҷілер академиязында ӱгренче, - чоохтапча Екатерина Шушеначева.
Хара кӧлдегі школаның ӱгретчілері ӱгренҷілерінің сағынған сағыстары толарына ізенчелер, аннаңар оларға чахсы пілістер пирерге прай кӱстерін салчалар.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде