ОЛҒАННАРНЫҢ ХООСТАРЫ - ПӰӰНГІ КӰННІҢ ХЫЙҒЫЗЫ
03.04.2018
Хабарлар
Марығ салтарлары. Хакасияның ӱгренҷілері «Прайзы коррупциядаң тоғыр» хоостар паза видеороликтер мариинда араластылар.
Сибирьдегі федеральнай университеттің Хакас техническай институдының актовай залында студенттер, ӱгренҷілер паза ӱгретчілер чыылысханнар. Анда пӱӱнгі чуртас тилізіне харығ полчатхан коррупциядаңар чоох парған.
Чыылығда араласхан Хакасия МВД-зының прокуратура тоғынҷылары, коррупциядаңар чоохтап, хай пірее сурығларға нандыр пиргеннер. Хазнаның ӧӧн пӧгіннерінің пірсі - коррупциядаң тоғыр кӱрезері. Коррупция хазнаның экономика тилізіне, идінҷектернің тоғызына, бюджетке харығ полча. Халғанҷы он чыл аразына пу тоғыста алнынзар улуғ хаалағлар иділген. Амғы туста чиит тӧлні чуртасха сын паза орта кӧрістіг ӧскірерге кирек полча. Мындағ марығлар хоостыра профилактика тоғызы апарылча. Чииттерге кӱҷӱрлестердеңер, тоғыс орнынаң тузаланып, ахча алчатхан пастыхтардаңар чоохталған. Сайбағҷылар законны хыйыстырып алар оңдайларны сыбыра таап алчалар.
Законны сайбапчатханына тоғасса, полициязар айланарға чӧп пирілген. Прокуратура тоғынҷылары ідӧк ӱгредігліг видеороликтер тимнеп салтырлар. «Коррупция» сӧс пістің арабыста чуртапча, аның пілдірии дее алғым. «Коррупцияның чилегезі, законнарны сайбап, хайдағ даа туста паза хайдағ-да нимее хыҷаланып, холға киріп аларға кӱстенгені полча», - чуртастың ағырсымнығ киреенеңер піди чоохтаан философ Томас Гоббс.
Россияның Журналисттер пірігізінің Хакасиядағы пӧлиинің кнезі Ольга Ширковец мындағ марығ Хакасия правительствозының грант полызии сылтаанда иртірілче тіп искірген.
- Марығда адалған тема пос ондайлығ паза олаңай нимес, че ол пӱӱнгі кӱннің ағырсымнығ сурии полча, - таныхтаан Ольга Валериановна. - Уғаа чахсы паза хынығ тоғыстар полған. Марығ араласчыларының хоостары паза плакаттары тирең сағыстығлар.
Коррупциядаңар хоостирға олаңай ла нимес, неке. Олған оңнығ нимес нимені хоостирға хынминча тіп сағынчам. Актовай залның ізии алнында иң чахсы хоостар хызыл партыр. Оларда оғырлас-кӱҷӱрлес аймах-пасха саринаң кӧзіділтір.
«Олғаннар коррупциядаң тоғыр» хоостар мариинда Хакасияның прай даа аал-городтарының ӱгренҷілері араластырлар. Жюри араласчыларына иң чахсы тоғыстарны таллап аларға сидік полтыр, хазыр талазығлар партыр. Ӧӧн хайығ, тізең, хоостың тирең сағызына салылған.
10 часха теере олғаннар аразында марығда I орынны Харатастың кічіг чуртағҷызы Тайир Ибадулаев алған. Пуох городтың ӱгренҷізі Диана Калинина ікінҷі орынға турысхан. Саяногорсктағы, Ширадағы, Копьевтағы олғаннар махтатханнар. Чиңісчілерге дипломнар паза хоостаҷан чыындылар, тадылығ сыйыхтар читірілген.
Чапсых видеороликтерні улуғ класстар ӱгренҷілері тимнептірлер. Майнадағы паза Наа аалдағы ортымах школаның ӱгренҷілері видеороликтерні телефонға сууртырлар. Олғаннар постары актерлар полғаннар, сарыннар толдырғаннар. Видеороликтерні тимнеен ікі команда чиңісчі полыбысхан, оларға видеокамералар сыйлап пиргеннер.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы