ТЕХНИКА ПАР, ТОҒЫНАРҒА ЛА ХАЛЧА
04.04.2018
Хабарлар
Кӱн сурии. Хакасияның пазы Виктор Зимин 2 апрельде тоғыс чорығынаң Ағбан пилтірі аймаандағы Чапаев аалда полған. Анда ол чоллар хайди иптелчеткенін сыныхтаан.
РЕСПУБЛИКАНЫҢ ПАЗЫ ВИКТОР ЗИМИН ПАСТАП ЧАПАЕВ ААЛДАҒЫ НОВАЯ ОРАМАДА ХАЙДАҒ ТОҒЫСТАР ИДІЛ ПАРҒАНЫН КӦРГЕН. АНДА АМ СУҒ ТУРЧА, ЧУРТАҒҶЫЛАР ПАЛҒАСТЫҒ СУҒҶА РЕЗИНА САПОГТЫҒ ЛА ЧӦРЧЕЛЕР, ІДӦК ХАЙ ПІРЕЕЗІ ВЕЛОСИПЕДТІГ СУҒ ПЫРЛАТ ПАРЫБЫСЧА, АВТОМОБИЛЬЛІГ ИРТІСЧЕЛЕР. УЛУҒ ХАР ЧААП ПАРЫБЫЗЫП, АМДЫ ОЛ ХАЙЫЛ СЫХХАНДА, ЧӦРҶЕҢ ПАСХА ОҢДАЙ ЧОХ ПОЛЫБЫСХАН.
ВИКТОР МИХАЙЛОВИЧТІ ПУ ОРАМАДА ХАКАСИЯНЫҢ ТРАНСПОРТ ПАЗА ЧОЛ ХОНИИ МИНИСТРІ ОЛЕГ ТРОПИН, АҒБАН ПИЛТІРІ АЙМАА МУНИЦИПАЛЬНАЙ ПӰДІСТІҢ ПАЗЫ ЕЛЕНА ЕГОРОВА ПАЗА ТАЗОБА ПИЛТІРІ ААЛ ЧӦБІНІҢ ПАЗЫ ИВАН САЖИН УДУРЛААННАР. ТРАНСПОРТ МИНИСТРІ ХАКАСИЯ ПАЗЫНА ОРАМАДА ХАЙДАҒ ТОҒЫСТАР ТОЛДЫРЫЛҒАННАҢАР ИСКІРГЕН. АНЫҢ ЧООҒЫНАҢ, ОРАМАДАҒЫ ЧОЛҒА 16 МАШИНА САЙ УРЫЛҒАН, ГРЕЙДЕР ПАЗА БУЛЬДОЗЕР АНЫ ИПТИ ЧАЙҒАННАР. ТОҒЫСТАРНЫ ТООЗАРҒА ПОДРЯДЧИККЕ АМ ДАА ІКІ НЕДЕЛЯ КИРЕК.
ЧЫЛЫҒЛАР ПАСТАЛҒАНҶА, МАҢНАНАРҒА
Чыылыгның тоғызы алғыстастаң пасталған. Хакасияның пазы Виктор Зимин республиканың хазых хайраллаҷаң министрі Владимир Костюшты, 60 чазынаң алғыстап, кӧп чыллар тӱзімніг істенчеткені ӱчӱн «За заслуги перед Хакасией» орденнең сыйыхтаан.
- Чуртазын имнег киреене чарыт салған кізі, сын профессионал, аарласнаң тузаланчатхан паза опыттығ устағҷы. Владимир Фёдорович, алғыстапчам Сірерні ирт парған пайрамнығ тӧреен кӱніңернең! - алғыстас сӧстерін читірген Виктор Зимин. - Сірернің чылларнаң чыылған пай опыдыңар, пик кӱзіңер, тіспен істенчеткеніңер паза тоғысха нандырығлығ хайчатханыңар Хакасияа паза аның чуртағҷыларына туза ағыларында наа чидіглерге чит турарға полыссын.
Республика правительствозының чыылии чуртағҷыларның чуртазын хорғыс чох идер сурығларға чарыдылған. Хакасияның пазы улуғ хар чаап парғаны республиканың аал-городтарына хоза сидіксіністер ағылғанын таныхтаан. Хайылған хар суунаң кӱрезеріне хоза орамаларны паза чолларны чапчаң арығлирға киректелген. Виктор Зимин прай ведомстволарға, алынҷа МЧС-ха, МВД-ға паза ГИБДД-ға, алғызын читірген - сағыбаан саайнаң кӱрезерінде чапчаң паза нандырығлығ хайынғаннары ӱчӱн. Ідӧк муниципальнай пӱдістер устағҷыларының тоғызын таныхтаан.
- Че ол тоғыс ам даа тоозылбаан. Мин аал-городтарны хардаң арығлирға чахығ пир салғам, - пӧгін турғысхан республика устағҷызы. - Ол тоғысты соох арах кӱннер турчатхан аразына чапчаң толдыр саларға кирек.
Ідӧк Виктор Зимин чолларны табыраанҷа иптирге чахаан. Чоох парча Ағбан пилтірі аймаанзар кірчеткен Чапаев, Тазоба пилтірі, Тепличнай, Зеленай ааллардағы чоллардаңар. Хакасияның пазы ӱр ниместе, ол аалларзар чӧріп, андағы чоллар хайдағ оңдайда полғанын кӧріп алған.
Хакасия пазының орынҷызы Андрей Новоселов ол аалларда чолларны оңдайлирынҷа хайдағ тоғыс апарылчатханынаңар сан пиріс иткен. Аның искіриинең, пу ааллардағы 29 орамада чолларны, суға кірбес ӱчӱн, кӧдірерге кирек, тиксі 25 километр.
- Амғы туста 40 техника тоғынча, пір кӱнде ортымахти 3 орама оңдайлалар тіп кӧрілче, - чарытхан Новоселов. - Іди 10 кӱн аразына прай чоллар иптел парар.
Че Хакасияның пазы ол тоғыстарны 4-5 кӱн аразына толдыр саларға пӧгін турғысхан.
- Чылып сыхханҷа, маңнанарға кирек, кирек полза, хоза техника андар тартыңар, - таныхтаан Виктор Зимин. - Чапаевтеңер паза Тазоба пилтірінеңер чоохтаза, хати таныхтапчам - пу тоғыстар ол чолларны тыхтирынҷа планнарны хыйа итпинче.
Май айдох прайзы чолларны тыхтап пастабызарға кирек. Кӱскӱзін нимес, майдох!
Хакасияның транспорт паза чол хонии министрі Олег Тропин тиксі республикадағы чоллардаңар сан пиріс иткен. Аның искіриинең, амғы тусха Хакасиядағы прай автомобиль чоллары (2600 км) чӧріске азых. Хайылчатхан хар суу республикадағы ас нимес чолларға ӱрег ағылған. Кӧзідімге, Куйбышев -Хойбал, Табат - Киндірліг пилтірі чоллар суға кіргені таныхталған. Че, тыхтағ тоғыстары апарылып, олар тузаланысха кирілгеннер. Чолларны сыныхтағда тудары узарадылча.
Хакасия пазының орынҷызы Владимир Крафт суға кірген ааллардаңар, оларда хайдағ тоғыс апарылчатханынаңар сан пиріс иткен. Аның таниинаң, ікі кӱн аразына, 30-31 мартта, республикада харның айдағы сигіс нормазы тӱс парған. Іди пір квадрат метрге 27 литр суғ киліс парған тіп таныхтаан ол. Соох арах кӱннер турыбысханы аалларзар кірчеткен суғнаң кӱрезер киректі оңдайлабысхан. Че, іди дее полза, пӱӱнгі кӱнге тӧрт аалның 08 иб хыриндағы чир участогы, 25 тура ам даа суғда турча. Суға
кірген тураларның кӧбізі Пии аймааның Новотроицкай аалында - 19. Ол тураларда 72 кізі чуртапчаттыр, ол санда 18 пала.
- Че, таныхтирға сағынчам, чоох парча ол тураларның ораларынзар суғ кіргенінеңер, - чарытхан Владимир Крафт. - Иб істінде суғ турғаны, андағ ниме чоғыл.
Сағам, хар хайылбин сыхханда, кирек оңдайлан парған тіп таныхтаан ол. Че, вертолетнаң учуғып, авиаразведка иткені ӧрініс ағылбинчаттыр - суғ ағысчаң прай каналларда суғ толдыра, Хойбал чазызы прай суғда. Тӱрчедең чылып сығары кӧрілче, аннаңар суғ тасханынаң кирек хатабох сидіксіністіг пол парарға айабас.
Владимир Крафт ідӧк Алтай аймаандағы Аршаннар аалда пол парған чобағлығ киректі чарытхан. Анда ирепчі (57 паза 54 частығ), інек соонҷа чӧріп, суға саайлан парған.
- Ирепчі, малны ибзер сӱрчедіп, тирең суғлығ каналда пус алтынзар парыбысхан, - чоохтаан Крафт. - Чобағлығ кирек, че суғ тасханынаң пір дее палғалыстығ нимес.
Чыылығда алынҷа хайығ республикадағы кӧп кізі полчатхан объекттерні сыныхтирына салылған. Кемеровтағы чобағлығ кирек соонаң Россияның Ӧӧн прокуроры андағ сыныхтағны прай регионнарда иртірерге чахығ пирген нооза. Россия МЧС-ының Хакасияҷа ӧӧн устаа пастығы Александр Мулл республикада 800 артиинаң андағ объектті сыныхтирға кирек полчатханын таныхтаан. Специалисттер амғы тусха 84 объектті сыныхтабыстырлар, оларның 59-ында аймах сайбағлар табылтыр. Ол учреждениелернің устағҷыларына хысха тус аразына ол читпестерні тӱзедерге чахығ пирілтір.
Хакасияның пазы Виктор Зимин ідӧк ӱгредіг, хазых, культура паза спорт министерстволарына, оларның холындағы учреждениелер кӧп кізі полчатхан объекттер санына кірчелер нооза, ӧрттең хорғыс чох поларынҷа тоғыс апарарға пӧгін турғыс салған. Чоох парча ӧрттең тоғыр правилоларға тудынардаңар ла нимес. Виктор Зимин прайзына ӧнетін ӱгредіглер иртірерге чахығ пирген.
- Ол мероприятиелерні нандырығлығ иртірергекирек, олаңайла нимес, - таныхтаан Хакасияның пазы. - Чахсы поларҷых, ӧрттең тоғыр ӱгредіглерде ӱгренҷілернің іҷе-пабалары араласхан полза. Іҷе-пабалар сағыссырапчалар, аннаңар пос хараанаң кӧріп алзыннар - хайди ӱгредіглер апарылча. Арса, постарына даа тузалығ нимелерні піліп аларлар.
Чыылығның тоғызын тоозып, Хакасияның пазы прай устағҷыларға сағыбаан саай тузында республикадаң сыхпасха чахығ пирген. Ідӧк республикада пар прай аар техниканы санға аларға пӧгін турғысхан. Ол техника сағыбаан саайларнаң кӱрезерге, арса, киректелер тіп таныхтаан ол.
- Пір хорғыс тузын иртіп парыбызарға маңнанмаспыс таа, хайди пазағы хорғыс тузы чит килер - ӧрт сығызарынаң хорғыстығ тус, - теен Виктор Зимин, салтарлар идіп.
- Аннаңар прайзына тимде поларға кирек.
Автор :
Альберт ТОЛМАШОВ, Сом Максим АХПАШЕВТИ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде