АЙДАС ТЕЕЛБЕКТЕР, МАХТАҒЛЫҒ СЫЙЫХТАР
04.04.2018
Хабарлар
Чидіг. Москвадаң «Час ханаттың» олғаннары пӧзік сыйыхтар ағылдылар.
Март айның халғанҷы кӱннерінде Москвада «Россияның ис-пайы» паза «Тустар ис-пайы» чоннар аразындағы фестиваль-марығлар ирткен. Марығда тиксі Россиядаң паза СНГ хазналарынаң ӱс муңа чағын хор, теелбектер ӧмелері араласханнар. Хакасияның ӱчӱн «Час ханат» Россия чон чайаачызының саблығ ӧмезі турысхан. Чорыхха 45 олған чӧрген. Олар 25 - 29 мартта хазнабыстың ӧӧн городында ааллааннар.
Москвадағы «Космос» концерт залында фестивальның араласчылары устарын кӧзіткеннер. Марығны пӧзік профессионаллар жюризі паалаан. Олар Россия хореографиязынҷа ӧӧн специалисттер полчалар. 7 - 10 частығ олғаннарны теелбектенерге хореограф Алёна Тимофеева ӱгретче. Таныхтирға кирек, «Час ханаттың» кічіг частығлары мындағ улуғ марығда пастағызын на араластылар. Студияның улуғ частығ ӧмезінең Анна Тиникова устапча.
Пістің олғаннар I, II, III степеньніг 12 дипломға турысханнар. Сыйыхтарнаң прай он ікі теелбек таныхталған. «Олғаннар теелбегі», «Чон теелбегі», «Чонның амғы тустағы теелбегі» номинацияларда аймах сыйыхтығ орыннарны холға киргеннер. «Мода театры» номинацияда олғаннар I степеньніг дипломнаң сыйыхтатханнар.
Ідӧк «Час ханат» ӧмее, мастер-класста посты турыстығ кӧзіткен ӱчӱн, «Тустар ис-пайы» марығның сертификады читірілген. Студияның хоос устағҷызы Игорь Боргояковтың адына, балетмейстерлер Анна Тиниковаа, Алёна Тимофееваа Хакасияның этническай культуразын тилітчеткен ӱчӱн алғыстас дипломнары пирілген. «Россияның ис-пайы» фестиваль-марығ Россияның Хазна Думазы, культура, ӱгредіг паза наука министерстволары, «Содружество» фонд полызиинаң иртірілче.
Автор :
Елена САГАТАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде